លោក ហ៊ុន សែន សម្រេចមិនបន្តប្តឹងផ្តល់លោក គង់ គាំ ក្រោយលោក គង់ គាំ ប្រគល់ដីឲ្យរដ្ឋវិញ
លោក គង់ គាំ និងភរិយា បានសម្រេចប្រគល់ដី និងផ្ទះ ដែលលោករស់នៅសព្វថ្ងៃចំនួនកន្លះហិចតានៅសង្កាត់ទន្លេបាសាក់ រាជធានីភ្នំពេញ ឲ្យទៅរដ្ឋវិញបន្ទាប់ពីគ្រួសារលោកបានកាន់កាប់ដី និងផ្ទះនេះអស់រយៈពេល ៤ទសវត្សរ៍។ ការប្រគល់ដីឲ្យរដ្ឋវិញនៅពេលនេះ ត្រូវលោកនាយករដ្ឋមន្ត្រី ហ៊ុន សែន បញ្ជាក់ថាលោកមិនបន្តប្តឹងផ្តល់លោក គង់ គាំ ទៀតទេ។
ចុះផ្សាយនៅថ្ងៃ៖
ស្តាប់ - ០២:២៤
«ទីបំផុតដី និងផ្ទះដែលជាសម្បត្តិរដ្ឋត្រូវបានលោក គង់ គាំ និងភរិយា ផ្តិតមេដៃប្រគល់ជូនរដ្ឋវិញ បន្ទាប់ពីអង្គភាពប្រឆាំងអំពើពុករលួយធ្វើការជាមួយលោក គង់ គាំ និងគ្រួសាររយៈពេល៣ម៉ោងកន្លះ។ កុំឲ្យយប់យូរសុបិនច្រើនខ្ញុំសម្រេចមិនប្តឹងបន្តទៀតទេ គឺបញ្ចប់ត្រឹមការប្រគល់ផ្ទះ»។ នេះគឺជាការសរសេរបញ្ជាក់របស់លោកនាយករដ្ឋមន្ត្រី ហ៊ុន សែន នៅលើទំព័រហ្វេសប៊ុកផ្លូវការរបស់លោកនៅថ្ងៃនេះ។
តាមលិខិតដែលមានស្នាមមេដៃលោក គង់ គាំ និងភរិយា ចុះថ្ងៃទី១២ ខែមករា លោក គង់ គាំ សរសេរថាលោកមានការឆ្គាំឆ្គង និងយល់មិនបានអស់អំពីបែបបទនៃការសុំកាន់កាប់នូវផ្ទះ និងដី ម្យ៉ាងទៀត ដើម្បីកុំឲ្យអង្គភាពប្រឆាំងអំពើពុករលួយខាតពេលក្នុងការស្រាវជ្រាវ ហើយអាចបញ្ចប់ករណីនេះ លោក និងភរិយា ព្រមប្រគល់ផ្ទះ និងដីលេខ៧១ ដោយស្ម័គ្រចិត្តជូនមករដ្ឋវិញ។ តាមរយៈកិច្ចប្រជុំគណៈរដ្ឋមន្ត្រីនាព្រឹកថ្ងៃសុក្រនេះ លោកនាយករដ្ឋមន្ត្រី ហ៊ុន សែន បានសម្រេចប្រគល់ដីដែលលោក គង់ គាំ ប្រគល់ឲ្យក្រសួងការបរទេសវិញនេះ ទៅឲ្យគណៈកម្មាធិការជាតិរៀបចំការបោះឆ្នោត។
សូមរំលឹកថាដី និងផ្ទះជាង ៥ពាន់ម៉ែត្រការ៉េ ស្ថិតនៅក្នុងតំបន់លេខ១ នៃហាងឆេងអចលនទ្រព្យ ត្រូវបានលោក គង់ គាំ ចូលទៅរស់នៅកាលពីឆ្នាំ១៩៨២ ដោយសុំការអនុញ្ញាតពីលោក ហ៊ុន សែន ដែលជារដ្ឋមន្ត្រីការបរទេស ខណៈដែលលោក គង់ គាំ ជាសមាជិកជាន់ខ្ពស់នៃគណបក្សប្រជាជនកម្ពុជា និងជាអនុរដ្ឋមន្ត្រីក្រសួងការបរទេស។
ការទាមទារយកដី និងផ្ទះ ដែលលោក គង់ គាំ ស្នាក់នៅនេះ ត្រូវគេកត់សម្គាល់ថាធ្វើឡើងក្រោយពីមានទំនាស់នយោបាយស្រួចស្រាល់ ដែលផ្តើមចេញពីការរិះគន់វាយប្រហាររបស់លោក គង់ គាំ បច្ចុប្បន្នជាឧត្តមទីប្រឹក្សាគណបក្សភ្លើងទៀន ទៅលើគណបក្សប្រជាជនកម្ពុជាតាមរយៈវេទិកាសាធារណៈនានា និងជំនួបជាមួយសកម្មជនគណបក្សតាមបណ្តាខេត្ត។
លោក គង់ គាំ កាលពីពេលថ្មីៗនេះ ក៏ត្រូវគណបក្សប្រជាជនខេត្តត្បូងឃ្មុំប្តឹងទាមទារសំណងចំនួន៥០ម៉ឺនដុល្លារ។ ក្រោយមកក្រសួងការបរទេសក៏ដាក់ប្តឹងលោក គង់ គាំ ទាមទារប្រាក់១លានដុល្លារដែរ។ ក៏ប៉ុន្តែបណ្តឹងគណបក្សប្រជាជនខេត្តត្បូងឃ្មុំនេះ នឹងនៅបន្តឬយ៉ាងណាទេ ខណៈលោក ហ៊ុន សែន ប្រកាសជាទូទៅថាសម្រេចមិនប្តឹងបន្ត។ ទោះយ៉ាងណា ទាំងលោក គង់ គាំ និងក្រុមគ្រួសារកំពុងស្ថិតនៅដំណាក់កាលមួយស្ងៀមស្ងាត់នៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ