បក្សកាន់អំណាចត្រៀមរៀបចំមទ្ទិញ៧មករា ដោយមានមនុស្សជាង១០ម៉ឺននាក់ចូលរួម
គណបក្សប្រជាជនកម្ពុជានឹងត្រៀមរៀបចំអង្គមទ្ទិញធំ នៅថ្ងៃខួប៧មករាខាងមុខនេះ ដើម្បីអបអរជ័យជំនះរបស់ខ្លួនទៅលើរបបកម្ពុជាប្រជាធិបតេយ្យ។ នេះបើតាមការបញ្ជាក់របស់អ្នកនាំពាក្យគណបក្សប្រជាជនកម្ពុជា។ តាមគម្រោងនៅឆ្នាំ២០២៣នេះ គណបក្សកាន់អំណាចនឹងធ្វើមទ្ទិញ៧មករា នៅមជ្ឈមណ្ឌលកោះពេជ្រ ដែលអាចឲ្យមនុស្សជាង១០ម៉ឺននាក់ចូលរួម ក្រោយការអាក់ខានរៀបចំអស់ប៉ុន្មានឆ្នាំកន្លងមក។
ចុះផ្សាយនៅថ្ងៃ៖
ស្តាប់ - ០១:៣២
ខួប៧មករា នៅតែមានសារៈសំខាន់ និងអមតៈជាដរាបសម្រាប់គណបក្សប្រជាជនកម្ពុជា ដែលជាគណបក្សកាន់អំណាចនាពេលបច្ចុប្បន្ន។ នេះបើតាមលោក សុខ ឥសាន អ្នកនាំពាក្យគណបក្សថ្លែងប្រាប់វិទ្យុបារាំងអន្តរជាតិ នៅថ្ងៃពុធនេះ ដោយបន្ថែមថា អង្គមន្ទិញ៧មករា២០២៣ គឺគណបក្សប្រជាជនកម្ពុជានឹងរំលឹកឡើងវិញ អំពីជ័យជំនះ និងសមទ្ធិផលដ៏ត្រចះត្រចង់របស់គណបក្សក្រោមការទំនុកបម្រុងរបស់កងទ័ពវៀតណាម ដែលបានផ្តួលរំលំរបបប្រល័យពូជសាសន៍ ប៉ុល ពត។
បើតាមលោក សុខ ឥសាន នៅឆ្នាំនេះ គណបក្សប្រជាជនកម្ពុជានឹងរៀបអង្គមទ្ទិញធំមួយ នៅឯមជ្ឈមណ្ឌលកោះពេជ្រ ដោយប្រហែលជាអាចមានអ្នកចូលរួមជាង១០ម៉ឺននាក់។ នេះជាអង្គមទ្ទិញធំរបស់គណបក្សកាន់អំណាច ដែលនឹងរៀបចំឡើងវិញ ក្រោយអាក់ខានអស់ប៉ុន្មានឆ្នាំកន្លងមកនេះ ដោយសារការរាលដាលនៃជំងឺកូវីដ១៩ និងដោយសារដំណើរទស្សនកិច្ចរបស់លោកនាយករដ្ឋមន្ត្រី ហ៊ុន សែន ទៅប្រទេសភូមា កាលពីឆ្នាំ២០២២កន្លងទៅ។
នៅអំឡុងខែមករាឆ្នាំ២០២៣នេះដែរ គណបក្សប្រជាជនកម្ពុជា ក៏នឹងរៀបចំអង្គសន្និបាតធំមួយ ដើម្បីរៀបចំពិនិត្យមើលលើស្ថានភាពនយោបាយ និងការគូសវាសផែនការសម្រាប់ការបោះឆ្នោតថ្នាក់ជាតិនាខែកក្កដាខាងមុខ។ លោក សុខ ឥសាន បញ្ជាក់ថា អង្គសន្និបាតរបស់គណបក្ស នឹងរៀបចំដាច់ដោយឡែកពីអង្គមន្ទិញ៧មករា ដោយអាចធ្វើឡើងនៅចុងខែមករា។
បើតាមលោក សុខ ឥសាន អង្គសន្និបាតនៅពេលខាងមុខ ក៏ជាបញ្ហាដ៏សំខាន់របស់គណបក្សប្រជាជនកម្ពុជា ដើម្បីរកយុទ្ធសាស្ត្រឈានរកការដណ្តើមជ័យជំនះជាថ្មី នៅក្នុងការបោះឆ្នោតជ្រើសតាំងតំណាងរាស្រ្តអាណត្តិទី៧ឆ្នាំ២០២៣នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ