WWF សាទរចំពោះការប្រកាសរបស់លោកនាយករដ្ឋមន្ត្រីឱ្យបង្កើតតំបន់សុវត្ថិភាពសម្រាប់សត្វផ្សោត
អង្គការមូលនិធិសកលសម្រាប់អភិរក្សធម្មជាតិ WWF នៅថ្ងៃទី២ ខែមករា ឆ្នាំ២០២៣ បានសាទរចំពោះការប្រកាសរបស់លោកនាយករដ្ឋមន្ត្រី ហ៊ុន សែន ក្នុងការបង្កើតតំបន់សុវត្ថិភាពសម្រាប់សត្វផ្សោត។ លោកនាយករដ្ឋមន្ត្រីនៅក្នុងពិធីបើកការដ្ឋានសាងសង់ស្ពានឆ្លងកាត់ទន្លេមេគង្គនៅខេត្ត បានតាសតឿន និងបង្គាប់ឱ្យអាជ្ញាធរបង្កើនការយកចិត្តទុកដាក់អភិរក្សសត្វផ្សោត ទប់ស្កាត់ការនេសាទខុសច្បាប់។
ចុះផ្សាយនៅថ្ងៃ៖
ស្តាប់ - ០២:២៣
លោក សេង ទៀក នាយកអង្គការមូលនិធិសកលសម្រាប់អភិរក្សធម្មជាតិ WWF បានសាទរចំពោះចំណាត់ការរបស់លោកនាយករដ្ឋមន្ត្រី ហ៊ុន សែន ដែលបានដាស់តឿនអាជ្ញាធរខេត្តស្ទឹងត្រែង និងក្រចេះឱ្យបង្កើនការយកចិត្តទុកដាក់អភិរក្សសត្វផ្សោត ដោយបានបង្គាប់ឱ្យបង្កើតតំបន់ស្នូលអចិន្ត្រៃយ៍ ឬគំនូសនៅតំបន់ដែលសត្វផ្សោតរស់នៅ ក្នុងទន្លេមេគង្គ។ នេះបើតាមទំព័រហ៊្វេសបុកផ្លូវការរបស់អង្គការ WWF។
លោកនាយករដ្ឋមន្ត្រីនៅក្នុងពិធីបើកការដ្ឋានសាងសង់ស្ពានឆ្លងកាត់ទន្លេមេគង្គនៅខេត្តក្រចេះ និងផ្លូវតភ្ជាប់ក្រោមឥណទានសម្បទានពីរដ្ឋាភិបាលចិន កាលពីថ្ងៃទី២ ខែមករា បានបង្គាប់ឱ្យក្រសួងកសិកម្ម សហការជាមួយអាជ្ញាធរខេត្តស្ទឹងត្រែង និងក្រចេះ ធ្វើការទប់ស្កាត់កុំឱ្យមានករណីសត្វផ្សោតងាប់ដោយសារជាប់មងនេសាទ និងធ្វើយ៉ាងណាកុំឱ្យមានការរំខានដល់ការរស់នៅរបស់សត្វផ្សោតទាំងនោះតទៅទៀត។
លោកនាយករដ្ឋមន្ត្រីបានបន្តថា ត្រូវហាមការរាយមងជាដាច់ខាត នៅក្នុងតំបន់ស្នូលអចិន្ត្រៃយ៍ ដែលតំបន់នោះត្រូវមានគំនូស ដោយការរាយនិងបណ្ដែតពោងក្នុងទន្លេ ដើម្បីឱ្យប្រជាជនបានដឹងថាជាតំបន់ដែលមានផ្សោតរស់នៅ។
ជាមួយគ្នានេះអង្គការ WWF ក៏បានបញ្ជាក់ពីការត្រៀមខ្លួនក្នុងការសហការជាមួយអាជ្ញាធរពាក់ព័ន្ធ រួមមានដូចជា គណៈកម្មការគ្រប់គ្រង អភិរក្ស អភិវឌ្ឍន៍តំបន់ទេសចរណ៍សត្វផ្សោតទន្លេមេគង្គ រដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ។ អង្គការ WWF ក៏បានត្រៀមសហការជាមួយរដ្ឋបាលខេត្តក្រចេះ និងរដ្ឋបាលខេត្តស្ទឹងត្រែង ដើម្បីអភិរក្សសត្វផ្សោត។
គួរជម្រាបជូនថា កាលពីថ្ងៃទី១៥ ខែធ្នូ ឆ្នាំ២០២២កន្លងទៅ សត្វផ្សោតឈ្មោលមួយក្បាលដែលមានអាយុប្រមាណចន្លោះពី១៥-២០ឆ្នាំ ដែលមានប្រវែង២៣០សង់ទីម៉ែត្រ ទម្ងន់១៦២គីឡូក្រាម បានងាប់នៅក្បែរអន្លង់កោះដំបង ព្រំប្រទល់រវាងខេត្តក្រចេះ និងខេត្តស្ទឹងត្រែង។ ហើយកាលពីថ្ងៃទី ២២ ខែធ្នូ សត្វផ្សោតអ៊ីរ៉ាវាឌីញីមួយក្បាលទៀតដែលមានអាយុចន្លោះពី៧-១០ឆ្នាំ ដែលមានប្រវែង១៩៣សង់ទីម៉ែត្រ ទម្ងន់៨៥គីឡូក្រាម បានងាប់ក្នុងឃុំកោះទ្រង់ នៃខេត្តក្រចេះ។ និងកាលពីថ្ងៃទី២៤ ខែធ្នូ ឆ្នាំ២០២២ សត្វផ្សោតញីមួយក្បាលដែលមានប្រវែង១៩៦សង់ទីម៉ែត្រ ទម្ងន់ប្រហែល៩៣គីឡូក្រាម បានងាប់នៅក្បែរកោះទ្រង់ ចម្ងាយប្រមាណ១០គីឡូម៉ែត្រប៉ែកខាងក្រោមអន្លង់កាំពី នៃខេត្តក្រចេះ។ ករណីងាប់សត្វផ្សោតទាំងនេះ គឺដោយសារការជាប់មងនេសាទ។ បើតាមអង្គការ WWF នៅក្នុងឆ្នាំ២០២២ កន្លងទៅនេះ មានសត្វផ្សោតចំនួន១០ក្បាលបានងាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ