លោកហ៊ុន សែន ស្នើអភិបាលខេត្តទាំងអស់យកគំរូតាមការដោះស្រាយវិរាទដីធ្លីជូនពលរដ្ឋរបស់អភិបាលខេត្តកំពត
លោកនាយករដ្ឋមន្ត្រី ហ៊ុន សែនបានស្នើឱ្យអភិបាលខេត្តគ្រប់រូបទាំងអស់គួរយកគំរូតាមអភិបាលខេត្តកំពតដែលបានបង្កើតវេទិកាដោះស្រាយបញ្ហាជម្លោះដីធ្លីរបស់ពលរដ្ឋនៅក្រៅប្រព័ន្ធតុលាការ។ ការស្នើបែបនេះ បន្ទាប់ពីលោកនាយករដ្ឋមន្ត្រីហ៊ុន សែនកត់សម្គាល់ថា បញ្ហាវិវាទដីធ្លី និងបញ្ហាទំនាស់ផ្សេងៗទៀតរបស់ពលរដ្ឋថ្នាក់មូលដ្ឋានក្នុងខេត្តកំពត ត្រូវបានលោក ម៉ៅ ធនិនអភិបាលខេត្តកំពតចេញមុខដោះស្រាយស្ទើតែគ្រប់បញ្ហា ដែលនេះ លោកនាយករដ្ឋមន្ត្រីចាត់ទុកថា សកម្មភាពបែបនេះ នៅមិនទាន់ឃើញអភិបាលខេត្តរូបណាអង្គុយទល់មុខពលរដ្ឋដោះស្រាយវិវាទនានាក្រៅប្រព័ន្ធតុលាការនៅឡើយ។
ចុះផ្សាយនៅថ្ងៃ៖
ស្តាប់ - ០២:៤៦
ថ្លែងនៅចំពោះមុខអភិបាលខេត្តកំពត និងអភិបាលខេត្តមួយចំនួនទៀតដែលមានវត្តមាននៅក្នុងពិធីបើកការដ្ឋានស្តារ និងលើកកម្រិតគុណភាពផ្លូវជាតិលេខ៣១ និងលេខ៣៣ ស្ថិតក្នុងខេត្តកំពត និងខេត្តកែប ប្រមុខរដ្ឋាភិបាលកម្ពុជាលោកនាយករដ្ឋមន្ត្រី ហ៊ុន សែនសាទរទៅលើការដោះស្រាយទំនាស់រឿងក្តីក្តាំងក្រៅប្រព័ន្ធតុលាការរបស់អភិបាលខេត្តកំពត លោកម៉ៅ ធនិនជាមួយនឹងពលរដ្ឋមកគ្រប់មូលដ្ឋានទាំងអស់នៅក្នុងខេត្តផ្ទាល់។ ហើយទន្ទឹមនឹងការសាទរនេះ លោកនាយករដ្ឋមន្ត្រីក៏លើកទឹកឱ្យអភិបាលខេត្តកំពតរូបនេះបន្តបេសសកម្មរបស់ខ្លួនក្នុងការដោះស្រាយបញ្ហាជូនពលរដ្ឋរស់នៅក្នុងខេត្តបន្តទៀត។
ជាមួយគ្នាដែរនេះ លោកនាយករដ្ឋមន្ត្រីហ៊ុន សែន ក៏ចង់ឃើញអភិបាលរាជធានី-ខេត្តទាំង២៥ គួររៀបចំវេទិកាសាធារណដើម្បីចេញមុខដោះស្រាយវិវាទដីធ្លី និងបញ្ហាទំនាស់នានារបស់ពលរដ្ឋនៅតាមបណ្តាខេត្តដែលខ្លួនគ្រប់គ្រងឱ្យមានប្រសិទ្ធភាព តម្លាភាព និងអាចទទួលយកបានទាំងអស់គ្នា។ ហើយលោកបានស្នើឱ្យអភិបាលខេត្តទាំងអស់ត្រូវដោះស្រាយដោយឈរលើគោលការណ៍អព្យាក្រឹត្យ មិនលំអៀងទៅភាគីណាមួយទាំងក្នុងទំនាស់តូចតាច ឬមួយករណីនោះធំក៏ដោយ។
អ្នកនាំពាក្យសមាគមការពារសិទ្ធិមនុស្សអាដហុក លោក សឹង សែនករុណាយល់ថា ការជំរុញឱ្យអភិបាលខេត្តទាំងអស់បើកវេទិកាដោះស្រាយបញ្ហាជម្លោះដីធ្លីរបស់ពលរដ្ឋ គឺជាការចង់បានពីសាធារណជននិងពីអង្គការសង្គមស៊ីវិលផង។ ប៉ុន្តែលោកថា ភាគច្រើនដែលអភិបាលខេត្តមួយរូប(កំពត)ដោះស្រាយនាពេលកន្លងមក គឺគ្រាន់តែជាជម្លោះដីធ្លីរវាងពលរដ្ឋនិងពលរដ្ឋ ឬជាមួយមន្ត្រីដែលមានឋានៈតូចទាបប៉ុណ្ណោះ ដោយលោកកម្រឃើញអភិបាលខេត្តរូបនោះដោះស្រាយបញ្ហាវិវាទដីធ្លីរវាងពលរដ្ឋ និងអ្នកមានអំណាចណាស់។
តែយ៉ាងណា លោក សឹង សែនករុណាចាត់ទុកថា ការចេញមុខដោះស្រាយរបស់ថ្នាក់ខេត្តបែបនេះ គឺបានចូលរួមចំណែកកាត់បន្ថយជម្លោះដីធ្លីបានច្រើន ប៉ុន្តែលោកចង់ឃើញអភិបាលខេត្តគ្រប់រូបដោះស្រាយដោយមានតម្លាភាពប្រសិនបើករណីនោះមានជាប់ទាក់ទងនឹងក្រុមហ៊ុនមានអំណាចឈរកាងពីខាងក្រោយ ដែលលោកកត់សម្គាល់នាពេលកន្លងមកថា ភាគីអាជ្ញាធរតែងតែផ្អៀងជញ្ជីងម្ខាងទៅភាគីណាមួយដែលមានអំណាច។
ចំណែក លោក យ៉ង់ គឹមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាពបានលើកឡើងថា លោកនៅមិនទាន់អាចវាយតម្លៃអំពីឆន្ទៈ និងលទ្ធភាពនៃការចេញមុខដោះស្រាយបញ្ហារបស់ពលរដ្ឋនៅក្រៅប្រព័ន្ធតុលាការពីសំណាក់អភិបាលខេត្តផ្សេងទៀតបាននៅឡើយ។ ប៉ុន្តែ បើតាមការសង្កេតមើលដោយផ្ទាល់ លោកថាប្រសិនបើអភិបាលខេត្តទាំងនោះមានឆន្ទៈក្នុងការដោះស្រាយបញ្ហាជម្លោះដីធ្លីជូនប្រជាពលរដ្ឋមែន ម្ល៉ោះហើយមិនចាំដល់មេដឹកនាំស្នើឱ្យយកគំរូតាមអភិបាលខេត្តណាមួយនោះទេ។
តែយ៉ាងណា លោកនឹងនៅបន្តឃ្លាំមើលពីការអនុវត្ត និងឆន្ទៈក្នុងការដោះស្រាយបញ្ហាជូនប្រជាពលរដ្ឋរបស់អភិបាលរាជធានីខេត្តទាំង២៥បន្តទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ