ឆេះអគារកាស៊ីណូនៅប៉ោយប៉ែត៖ អ្នកស្លាប់កើនជិត២០នាក់ និងជិត១០០នាក់របួស
ករណីអគ្គីភ័យឆាបឆេះកាស៊ីណូនៅក្រុងប៉ោយប៉ែត ខេត្តបន្ទាយមានជ័យ គិតមកទល់នឹងពេលនេះមានអ្នកស្លាប់ជិត ២០នាក់ និងរបួសជិត ១០០នាក់ ខណៈប្រតិបត្តិការជួយសង្គ្រោះនៅតែបន្តរុករកជនរងគ្រោះដែលបានបាត់ខ្លួននៅក្នុងអគារកាស៊ីណូនេះ។ ចំណែកមូលហេតុ និងទំហំនៃការខូតខាតបណ្ដាលមកពីឆេះអគារនេះ អាជ្ញាធរនៅមិនអាចបញ្ជាក់បាននៅឡើយទេ។
ចុះផ្សាយនៅថ្ងៃ៖
ស្តាប់ - ០២:៤០
អ្នកស្លាប់ដោយសារឆេះអគារកាស៊ីណូនៅក្រុងប៉ោយប៉ែត ខេត្តបន្ទាយមានជ័យ ត្រូវបានលោកនាយករដ្ឋមន្រ្តី ហ៊ុន សែន បញ្ជាក់ថា គិតមកទល់ពេលនេះសាកសពដែលរកឃើញមានចំនួន ១២នាក់ និងរបួសជាច្រើនសិបនាក់ ខណៈការប៉ាន់ស្មានអាចមានអ្នកស្លាប់ដល់ ១៦នាក់។ ថ្លែងក្នុងពិធីបើកការដ្ឋានស្តារ និងលើកកម្រិតគុណភាពផ្លូវពីរខ្សែទៀត ស្ថិតក្នុងភូមិសាស្ត្រខេត្តកំពត និងខេត្តកែប នាព្រឹកថ្ងៃទី៣០ខែធ្នូនេះ លោកនាយករដ្ឋមន្រ្តីបញ្ជាក់ថា ករណីឆេះអគារកាស៊ីណូនៅក្រុងប៉ោយប៉ែតនេះ ត្រូវបានពន្លត់ និងគ្រប់គ្រងបានទាំងស្រុងហើយ។
យ៉ាងណាមិញតួលេខអ្នកស្លាប់ដោយសារឆេះអគារកាស៊ីណូនៅក្រុងប៉ោយប៉ែត ដែលបញ្ជាក់ដោយលោកនាយករដ្ឋមន្រ្តីនេះ ហាក់ខុសគ្នាទៅនឹងសារព័ត៌មាននៅក្រៅស្រុក ពោលបើតាមសារព័ត៌មានថៃ ចំនួនអ្នកស្លាប់បានកើនដល់ ១៩នាក់ ហើយអ្នកស្លាប់នេះអាចនឹងមានកើនឡើងបន្ថែមទៀត។ ក្នុងចំណោមអ្នកស្លាប់ទាំងនេះ ក៏មានជនជាតិថៃម្នាក់ផងដែរ ខណៈអ្នករបួសប្រមាណ ៥០នាក់បានបញ្ជូនទៅមន្ទីរពេទ្យ ក្នុងនោះមានអ្នករបួស ១៣នាក់មានសភាពធ្ងន់ធ្ងរ។
ទាក់ទិនទៅនឹងករណីឆេះអគារកាស៊ីណូនៅក្រុងប៉ោយប៉ែតនេះដែរ បើតាមលោក អ៊ុំ រាត្រី អភិបាលខេត្តបន្ទាយមានជ័យ បានបង្ហោះនៅលើទំព័រហ្វេសប៊ុក បានឲ្យដឹងថា ក្រុមរុករក និងសង្គ្រោះកម្ពុជា-ថៃ បានបន្តប្រតិបត្តិការជួយសង្រ្គោះ និងរុករកជនរងគ្រោះនៅក្នុងអគារដែលឆេះនេះបន្តទៀត។ លោក អ៊ុំ រាត្រី បានបញ្ជាក់ថា ករណីឆេះនេះ ជាករណីធ្ងន់ធ្ងរមិនធ្លាប់មានសម្រាប់ក្រុងប៉ោយប៉ែត ខេត្តបន្ទាយមានជ័យ។
សូមបញ្ជាក់ថា ហេតុការណ៍ឆេះកាស៊ីណូនេះ បានកើតឡើងចាប់តាំងពីយប់ថ្ងៃទី២៨ខែធ្នូ និងបានបន្ដឆេះរហូតដល់ថ្ងៃទី៣០ខែធ្នូ ទើបអាចពន្លត់ភ្លើង និងគ្រប់គ្រងបានទាំងស្រុង ខណៈក្នុងនោះអគារចំនួន៣ រួមមាន៖ អគារក្រុមហ៊ុនហ្ក្រេនដាយមិនស៊ីធីចំនួន២ និងក្រុមហ៊ុនកាស៊ីណូប៉ោយប៉ែតស៊ីធីចំនួនមួយបានរងការខូចខាតដោយសារភ្លើងឆេះ។ តែយ៉ាងណា អាជ្ញាមិនទាន់អាចសន្និដ្ឋានពីមូលហេតុនៃការឆាបឆេះដែលបង្កជាការភ្ញាក់ផ្អើលខ្លាំងនេះនៅឡើយទេ ខណៈអ្នកធ្វើការរស់នៅក្នុងអគារដែលឆេះ មានប្រមាណជាង ១ពាន់នាក់ឯណោះ។
បើតាមខ្សែវីដេអូដែលបានផ្សព្វផ្សាយនៅលើបណ្តាញសង្គមមួយចំនួនបង្ហាញថា មូលហេតុដែលមានអគ្គីភ័យឆាបឆេះនេះឡើង គឺបណ្តាលមកពីការឆ្លងចរន្តអគ្គិសនីប៉ាណូជាប់ពីដាន នៅអគារជាន់ក្រោម នៃកាស៊ីណូហ្ក្រេនដាយមិនស៊ីធីខាងត្បូង ហើយបន្ទាប់មក ក៏ឆាបឆេះរាលដាលដល់អគារកាស៊ីណូខាងជើងផ្លូវ និងបន្ទាប់មកក៏ឆេះរាលដាលអគារក្រុមហ៊ុនកាស៊ីណូប៉ោយប៉ែតស៊ីធីដែលជាប់នៅខាងលិចបន្តទៀត។
នៅពេលដែលអគ្គិភ័យឆាបឆេះអគារហ្ក្រេនដាយមិនស៊ីធីដែលមានកម្ពស់១៧ជាន់នេះ បើតាមវីដេអូដដែល មានភ្ញៀវ និងបុគ្គលិកកាស៊ីណូដែលជាប់លើអគារ បានលោតចុះពីលើអគារ ដោយខ្លះបានស្លាប់ និងរបួស ហើយខ្លះទៀតត្រូវបានដឹកទៅកាន់មន្ទីរពេទ្យប្រទេសថៃ និងមន្ទីរពេទ្យបង្អែកក្រុងប៉ោយប៉ែត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ