អគ្គីភ័យឆេះកាស៊ីណូនៅប៉ោយប៉ែត៖ មកដល់ពេលនេះមានមនុស្ស១១នាក់ស្លាប់ និងជាង៥០នាក់របួស
អភិបាលក្រុងប៉ោយប៉ែតបានឱ្យដឹងថា ករណីអគ្គីភ័យឆាបឆេះកាស៊ីណូមួយកន្លែងចំកណ្តាលក្រុងប៉ោយប៉ែតគិតមកទល់ពេលនេះបានបណ្ដាលឱ្យមនុស្សស្លាប់យ៉ាងហោចណាស់១១នាក់ និងរបួសជាង៥០នាក់។ បើតាមអភិបាលក្រុងប៉ោយប៉ែត ក្រុមជួយសង្គ្រោះនៅបន្តរុករកជនរងគ្រោះដែលបានបាត់ខ្លួននៅក្នុងអគារកាស៊ីណូដដែល។ តែយ៉ាងណា អាជ្ញាធរ ក៏នៅមិនទាន់អាចបញ្ជាក់ពីទំហំនៃការខូចខាត និងដើមចមដែលបង្កឱ្យកើតមានករណីអគ្គីភ័យនេះនៅឡើយទេ។
ចុះផ្សាយនៅថ្ងៃ៖
ស្តាប់ - ០២:៤០
លោក គាត ហ៊ុល អភិបាលក្រុងប៉ោយប៉ែតបានឱ្យដឹងថា ក្រុមជួយសង្គ្រោះពីស្នងការខេត្តបន្ទាយមានជ័យ និងក្រុមការងារផ្សេងៗទៀតមកពីគណៈកម្មាធិការជាតិគ្រប់គ្រងមហន្តរាយនៅបន្តស្វែងរកជនរងគ្រោះបន្ថែមទៀត ខណៈអគារកាស៊ីណូដែលមានឈ្មោះហ្គ្រេនដាយម៉ិនស៊ីធី មានមនុស្សនៅខាងក្នុងប្រមាណ ១,៥០០នាក់ ក្នុងនោះ ៥០០នាក់ជាបុគ្គលិករបស់ការស៊ីណូផ្ទាល់។
ហេតុការណ៍ឆេះកាស៊ីណូនេះ បានកើតឡើងចាប់តាំងពីយប់ថ្ងៃទី២៨ ខែធ្នូ និងបានបន្ដឆេះរហូតដល់ថ្ងៃទី២៩ ខែធ្នូ ដែលបានធ្វើឱ្យខូចខាតនូវអគារចំនួន៣ រួមមាន៖ អគារក្រុមហ៊ុនហ្ក្រេនដាយមិនស៊ីធីចំនួន២ និងក្រុមហ៊ុនកាស៊ីណូប៉ោយប៉ែតស៊ីធីចំនួនមួយ។
តែយ៉ាងណា អាជ្ញាមិនទាន់អាចសន្និដ្ឋានពីមូលហេតុនៃការឆាបឆេះដែលបង្កជាការភ្ញាក់ផ្អើលខ្លាំងនេះ នៅឡើយទេ។ បើតាមខ្សែវីដេអូដែលបានផ្សព្វផ្សាយនៅលើបណ្តាញសង្គមមួយចំនួនបង្ហាញថា មូលហេតុដែលមានអគ្គីភ័យឆាបឆេះនេះឡើង គឺបណ្តាលមកពីការឆ្លងចរន្តអគ្គិសនីប៉ាណូជាប់ពីដាន នៅអគារជាន់ក្រោម នៃកាស៊ីណូហ្ក្រេនដាយមិនស៊ីធីខាងត្បូង ហើយបន្ទាប់មក ក៏ឆាបឆេះរាលដាលដល់អគារកាស៊ីណូខាងជើងផ្លូវ និងបន្ទាប់មកក៏ឆេះរាលដាលអគារក្រុមហ៊ុនកាស៊ីណូប៉ោយប៉ែតស៊ីធីដែលជាប់នៅខាងលិចបន្តទៀត។
នៅពេលដែលអគ្គិភ័យឆាបឆេះអគារហ្ក្រេនដាយមិនស៊ីធីដែលមានកម្ពស់១៧ជាន់នេះ បើតាមវីដេអូដដែល មានភ្ញៀវ និងបុគ្គលិកកាស៊ីណូដែលជាប់លើអគារ បានលោតចុះពីលើអគារ ដោយខ្លះបានស្លាប់ និងរបួស ហើយខ្លះទៀតត្រូវបានដឹកទៅកាន់មន្ទីរពេទ្យប្រទេសថៃ និងមន្ទីរពេទ្យបង្អែកក្រុងប៉ោយប៉ែត។
ដោយឡែកក្នុងការជួយសង្គ្រោះវិញ គណៈកម្មាធិការជាតិគ្រប់គ្រងគ្រោះមហន្តរាយបានបញ្ជាក់ថា មានក្រុមអ្នកជួយសង្គ្រោះនិង កម្លាំងជួយអន្តរាគមន៍ជិត១ពាន់នាក់ រួមមានកម្លាំងទាំងបីស្ថាប័នរបស់កម្ពុជា និងកម្លាំងភាគីថៃ ទាហ៊ានឈុតខ្មៅ និងក្រុមសង្គ្រោះកម្ពុជា-ថៃ និងមានរថយន្តពន្លត់អគ្គិភ័យចំនួន ៣០គ្រឿង ដោយប្រើប្រាស់ទឹកមិនតិចជាងរយឡាន និងរថយន្តសង្គ្រោះជាង២០គ្រឿងនោះទេ។
ជុំវិញករណីឆាបឆេះកាស៊ីណូនៅចំកណ្តាលក្រុងប៉ោយប៉ែតនេះ បើតាមសារព័ត៌មានក្រៅស្រុកបានរាយការណ៍ថា ចំនួនអ្នកស្លាប់អាចនឹងកើនឡើងពីចំនួនដែលអាជ្ញាធរកម្ពុជារាយការណ៍ចុងក្រោយ ពោលបើតាមសារព័ត៌មានថៃ អ្នកស្លាប់បានកើនឡើងយ៉ាងហោចណាស់១៦នាក់ និងរបួសជិត៦០នាក់។ ក្នុងនោះ មានជនជាតិថៃម្នាក់បានស្លាប់ក្នុងហេតុការណ៍នេះដែរ។
គួរជម្រាបជូនថា កាស៊ីណូហ្គ្រេនដាយម៉ិនស៊ីធី និង កាស៊ីណូប៉ោយប៉ែតស៊ីធីមានទីតាំងស្ថិតនៅភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ពោលគឺមានចម្ងាយប្រមាណ១០០ម៉ែត្រពីច្រកទ្វារអន្តរជាតិប៉ោយប៉ែត។ ហើយច្រកទ្វារអន្តរជាតិប៉ោយប៉ែតបច្ចុប្បន្នត្រូវបានផ្អាកជាបណ្តោះអាសន្នចំពោះការដឹកទំនិញរបស់រថយន្ត ខណៈអ្នកដំណើរថ្មើជើង អាចចេញចូលតាមផ្លូវខាងខ្លោងទ្វារដើមពុទ្ធ្រាជំនួស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ