ខុមហ្វ្រែល៖ រដ្ឋសភាអាណត្តិទី៦ ជារដ្ឋសភាអសកម្ម មិនសូវបានលើកបញ្ហាពលរដ្ឋសួរនាំរដ្ឋាភិបាល
អង្គការខុមហ្វ្រែល នៅថ្ងៃព្រហស្បតិ៍នេះ បានបើកកិច្ចពិភាក្សាលើរបាយសង្ខេបបឋម ស្តីពីការសង្កេតរដ្ឋសភា និងតំណាងរាស្ត្រ នីតិកាលទី៦ ដែលហៀបនឹងអស់អាណត្តិ។ សម្រាប់អាណត្តិទី៦ អង្គការខុមហ្វ្រែលរកឃើញថា រដ្ឋសភា និងតំណាងរាស្ត្រ អាណត្តិនេះ មិនមានភាពសកម្មក្នុងការនាំយកបញ្ហាពលរដ្ឋទៅសួរនាំឲ្យរដ្ឋាភិបាល។
ចុះផ្សាយនៅថ្ងៃ៖
ស្តាប់ - ០១:៥៥
នៅក្នុងរបាយការសង្ខេបចំនួន១២ទំព័រ អង្គការខុមហ្វ្រែលបានកត់សម្គាល់ថា នៅអាណត្តិទី៦នេះ រដ្ឋសភាបានបើកកិច្ចប្រជុំចំនួន៤០លើក ដោយអនុម័តបាន១២៥របៀបវារ:។ ក៏ប៉ុន្តែក្នុង១២៥របៀបវារ: គឺរដ្ឋសភាធ្លាប់កោះហៅរដ្ឋមន្ត្រីតែមួយរូបប៉ុណ្ណោះ គឺរដ្ឋមន្ត្រីក្រសួងយុត្តិធម៌ ដើម្បីមកឆ្លើយបំភ្លឺ ដែលការណ៍នេះតិចជាងរដ្ឋសភាអាណត្តិទី៥ ដែលមានចំនួនពីរដង។
នៅរាល់កិច្ចប្រជុំនៃរដ្ឋសភា នាអាណត្តិទី៦ ខុមហ្វ្រែលសង្កេតឃើញថា ការបង្ហាញជំហគាំទ្ររបស់តំណាងរាស្ត្រ ទៅលើការស្នើសេចក្តីព្រាងច្បាប់អ្វីមួយ មានការកើនឡើង បើធៀបទៅនឹងអាណត្តិទី៥ ដែលមានការបង្ហាញជំហរជំទាស់ និងអព្យាក្រឹត មានចំនួនច្រើន នាគ្រាដែលរដ្ឋសភាអាណត្តិទី៥កន្លង មានកៅអីគណបក្សប្រឆាំង។
ដោយឡែក ការអង្កេតលើតួនាទីតំណាងរាស្ត្រវិញ ខុមហ្វ្រែលបានបង្ហាញថា មានតំណាងរាស្ត្រចំនួន១២៣រូបបានចុះតាមមូលដ្ឋានចំនួន ៤៤៦៧លើក ក្នុងចន្លោះខែកញ្ញា២០១៨ ដល់ខែសីហា២០២២។ តែទោះជាតំណាងរាស្ត្រទាំងនោះបានចុះមូលដ្ឋាន អង្កេតបញ្ហាពលរដ្ឋក្តី ក៏សំណើប្រជាពលរដ្ឋមិនត្រូវបានលើកទៅសួរនាំរដ្ឋាភិបាលនៅក្នុងរដ្ឋសភា ព្រមទាំងមិនមានរបាយការណ៍ដាក់ចូលរដ្ឋសភា ដើម្បីជជែកដេញដោល។
សម្រាប់ខុមហ្វ្រែល រដ្ឋសភាអាណត្តិទី៦ បាននាំឲ្យប្រព័ន្ធសភានិយម និងប្រជាធិបតេយ្យកម្ពុជា មានការធ្លាក់ចុះ បើធបទៅនឹងរដ្ឋាសភាអាណត្តិទី៥ ដែលមានតំណាងរាស្ត្រពហុបក្ស។
នៅក្និងកិច្ចពិភាក្សាជជែកដេញដោលអំពីការសង្កេតរដ្ឋសភា និងតំណាងរាស្ត្រអាណត្តិទី៦ មានការជជែកដេញថោលច្រើន ពីសំណាក់បណ្តាអង្គការសង្គមស៊ីវិល និងគណបក្សនយោបាយក្រៅរដ្ឋាភិបាល។ អ្វីជាមតិរបស់បណ្តាអង្គការសង្គមស៊ីវិល និងគណបក្សនយោបាយ ទៅលើភាពអសកម្មរបស់រដ្ឋសភាពេកនេះ ព្រោះជារដ្ឋសភាឯកបក្ស ដែលអាសន:ទាំង១២៥កៅអី ជារបស់គណបក្សប្រជាជនកម្ពុជា។
អ្វីជាកត់សម្កាល់ផងនោះ គឺការជជែកពេលនេះ មិនមានវត្តមានតំណាងរបស់រដ្ឋសភា និងគណបក្សប្រជាជនកម្ពុជា ដែលជាគណបក្សកាន់អំណាច ដោយខាងខុមហ្វ្រែលបញ្ជាក់ មិនទទួលបានការឆ្លើយតប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ