អភិបាលខេត្តសៀមរាប ប្រាប់អ្នកជួបជុំនៅដីចម្ការត្រូវតែបំបែកហ្វូង ក្រោយវិធានការកន្លងមកគ្មានការស្តាប់បង្គាប់
លោក ទៀ សីហា អភិបាលខេត្តសៀមរាប បានដាក់បទបញ្ជាជាថ្មី ឲ្យអ្នកជួបជុំនៅដីចម្ការរបស់លោក ខឹម វាសនា ត្រូវតែបំបែកការជួបជុំ និងត្រលប់ទៅផ្ទះសម្បែងរៀងៗខ្លួន។ នេះបើតាមលិខិតរបស់លោក ទៀ សីហា នៅថ្ងៃទី២០ធ្នូ។ បទបញ្ជាជាថ្មីនេះ ធ្វើឡើងបន្ទាប់ពីការជួបជុំនៅដីចម្ការរបស់ប្រមុខគណបក្ស LDP នៅមិនទាន់រំសាយទាំងស្រុង តាំងពីចុងខែសីហា មក។
ចុះផ្សាយនៅថ្ងៃ៖
ស្តាប់ - ០១:៤៥
មានរយៈពេលជិត៤ខែទៅហើយ ដែលការជួបជុំនៅដីចម្ការលោក ខឹម វាសនា នៅខេត្តសៀមរាប មិនទាន់មានការរំសាយទាំងស្រុង ទោះបីជាអាជ្ញាធរខេត្តធ្លាប់ព្រមានប្រើប្រាស់វិធានការច្បាប់ក៏ដោយ។ នៅចំពោះមុខនៃបញ្ហានេះ លោក ទៀ សីហា អភិបាលខេត្តសៀមរាប បានផ្ញើលិខិតទៅកាន់តំណាងគណបក្សសម្ព័ន្ធដើម្បីប្រជាធិបតេយ្យ ត្រូវតែពិនិត្យ និងកំណត់គោលបំណងឲ្យបានច្បាស់លាស់ នូវការជួបជុំប្រជាពលរដ្ឋនៅក្នុងចម្ការម្រេចនោះ។
បើតាមលិខិតរបស់អភិបាលខេត្ត គឺ តំណាងគណបក្សសម្ព័ន្ធដើម្បីប្រជាធិបតេយ្យ ត្រូវប្រាប់ឲ្យប្រជាពលរដ្ឋទាំងអស់វិលទៅផ្ទះសម្បែងរៀងខ្លួនវិញ ព្រោះការជួបជុំកន្លងមកនេះ ពុំមានការអនុញ្ញាតពីអាជ្ញាធរនោះឡើយ។
យ៉ាងណាមិញ បទបញ្ជារបស់អភិបាលខេត្តពេលនេះ ត្រូវបានលោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ បានលើកឡើងថា អាជ្ញាធរកំពុងក្តៅក្រហាយនឹងការជួបជុំរបស់អ្នកគាំទ្រ LDP។ បើតាលោក ខឹម វាសនា គឺអាជ្ញាធរកំពុងគិតរកវិធី ដើម្បីចាប់កំហុសក្រុមពួកលោក។
សូមជម្រាបថា ការជួបជុំនៅដីចម្ការរបស់លោក ខឹម វាសនា បានធ្វើឡើងតាំងពីចុងខែសីហា ក្រោយតែប្រមុខបក្ស LDP បានលើកឡើងថា ភពផែនដីនឹងត្រូវជន់លិចនៅពេលខាងមុខ ហើយអំពាវនាវឲ្យអ្នកដែលគាំទ្រខ្លួនវិលមកជុំគ្នានៅលើដីចម្ការរបស់លោកនៅក្នុងខេត្តសៀមរាបទើបអាចរួចផុតពីគ្រោះមហន្តរាយ។ យ៉ាងហោចណាស់ មានអ្នកគាំទ្រប្រមាណជាង១ម៉ឺននាក់ រួមទាំងពលករខ្មែរមកពីក្រៅប្រទេសមួយចំនួន ក៏មកផ្តុំគ្នានៅដីចម្ការ តាមការប្រកាសរបស់លោក ខឹម វាសនា។
ភ្លាមៗ អាជ្ញាធរខេត្តបានព្រមានពីការប្រើប្រាស់វិធានការច្បាប់ ក៏ប៉ុន្តែត្រូវបានលោកនាយករដ្ឋមន្ត្រី ហ៊ុន សែន បញ្ជាកុំឲ្យធ្វើសកម្មភាព។ លោក ហ៊ុន សែន បញ្ជាក់ថាអ្វីដែលលោក ខឹម វាសនា ចង់បានគឺការចាប់បង្ខំឲ្យរដ្ឋាភិបាលប្រើប្រាស់កម្លាំង ផ្ទេរពីអបិយជំនឿរទៅជារឿងនយោបាយ ដោយបំបែកការជួបជុំ ហើយចាប់ខ្លួនលោក ខឹម វាសនា ដែលត្រង់នេះលោកប្រាប់មិនឲ្យអាជ្ញាធរចូលអន្ទាក់លោក ខឹម វាសនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ