សមាជិកក្រុមស្រ្តីថ្ងៃសុក្រម្នាក់ទទួលមរណៈភាពក្រោយត្រឡប់ពីសួរទុក្ខប្ដីជាប់ឃុំនៅត្រពាំងផ្លុង
សមាជិកនៃក្រុមស្រ្តីថ្ងៃសុក្រម្នាក់ទទួលមរណៈភាព នៅថ្ងៃទី២០ខែធ្នូក្រោយត្រឡប់ពីសួរទុក្ខប្ដីដែលកំពុងជាប់ឃុំនៅពន្ធនាគារ ត្រពាំងផ្លុង ខេត្តត្បូងឃ្មុំ។ ក្រុមគ្រួសារអ្នកស្លាប់បានប្រាប់វិទ្យុបារាំងអន្តរជាតិនៅថ្ងៃទី២១ធ្នូនេះថា អ្នកស្រី សោម ចន្ធូ ដែលមានអាយុជាង៥០ឆ្នាំទទួលមរណៈដោយសារកត្តាពីររួមបញ្ចូលគ្នាវិបត្តិផ្លូវចិត្តព្រោះគិតលើសំណុំរឿងរបស់ប្ដីកំពុងជាប់ឃុំ ខណៈអ្នកស្រីកំពុងរួមរឹតដោយជំងឺប្រចាំកាយស្រាប់។
ចុះផ្សាយនៅថ្ងៃ៖
ស្តាប់ - ០២:៣០
លោក សុខ ចំរើន កូនប្រុសអ្នកស្រីសោម ចន្ធូ បានឲ្យដឹងថា នៅថ្ងៃទី២១ធ្នូនេះថា ពីរថ្ងៃក្រោយត្រឡប់ពីសុខទុក្ខលោក សុខ ចន្ថា ដែលត្រូវជាប្ដីនិងឱពុករួចមក អ្នកស្រី សោម ចន្ធូ ក៏ចាប់ផ្ដើមធ្លាក់ខ្លួនឈឺដោយជំងឺប្រចាំកាយទឹកនោមផ្អែមធ្វើទុក និងត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យភ្លាមដែរ តែបេះដូងលែងដំណើរការ។ លោក សុខ ចំរើន កត់សម្គាល់ទៀតថា មរណៈភាពរបស់ម្ដាយរួមរឹតដោយវិបត្តិផ្លូវចិត្តទៅជាមួយដែរ។ វិបត្តិផ្លូវចិត្តដែលគិតលើសេដ្ឋកិច្ចក្នុងគ្រួសារនិងមិនដឹងថា ថ្ងៃណាលោក សុខ ចន្ថា ដែលត្រូវជាប្ដីត្រូវបានដោះលែងឲ្យមានសេរីភាព។
នៅចំពោះមុខទុក្ខសោកនេះ លោក សុខ ចំរើន បានថ្លែងទាំងអួលដើមកសុំឲ្យដោះលែងឱពុកដើម្បីមកធ្វើជាបង្គោលគ្រួសារបន្ទាប់ពីការចាកចេញរបស់ម្ដាយ។ ប្រសិនបើឱពុកមិនត្រូវបានដោះលែងវិបត្តិសេដ្ឋកិច្ចក្នុងគ្រួសារនឹងកើតឡើង។ បើតាមលោក សុខ ចំរើន លោក សុខ ចន្ថា មិនទាន់បានដឹងពីមរណៈភាពប្រពន្ធឡើយ ទោះជាដឹងក៏ទំនងជាមិនអាចទទួលបានការអនុគ្រោះដើម្បីមកចូលរួមបុណ្យសពប្រពន្ធបានដែរ។
លោក អំ សំអាត នាយករងទទួលបន្ទុកកម្មវិធីឃ្លាំមើលនៃអង្គការលីកាដូ ចាត់ទុកមរណៈភាពអ្នកស្រី សោម ចន្ធូ ជារឿងគួរឲ្យអាណិតអាសូរសម្រាប់ក្រុមគ្រួសារអ្នកស្រីដែលម្ដាយស្លាប់ ឱពុកជាប់ឃុំ។ លោក អំ សំអាត បានមើលឃើញការលះបង់យ៉ាងធំធេងរបស់អ្នកស្រី សោម ចន្ធូ ដើម្បីឲ្យមានការដោះលែងប្ដី។ ម្ល៉ោះហើយឲ្យអ្នកនយោបាយថ្នាក់កំពូលគួរដល់ពេលគិតគូផ្ដល់ជីវិតឲ្យវប្បធម៌សន្ទនារស់ឡើងវិញដើម្បីប្រយោជន៍ពលរដ្ឋ និងអ្នកគាំទ្រដែលគ្នាកំពុងរងគ្រោះ។ ចំពោះករណី លោក សុខ ចន្ថា លោក អំ សំអាត យល់ថា គួរមានករណីលើកលែងឬបន្ធូរបន្ថយទោសដើម្បីឲ្យលោកមានឱកាសមកគ្រប់គ្រងគ្រួសារវិញបន្ទាប់ពីមរណៈភាពរបស់ប្រពន្ធ។
រៀងរាល់ថ្ងៃសុក្រអ្នកស្រី សោម ចន្ធូ និងស្ត្រីឯទៀតចេញទាមទារឲ្យមានការដោះលែងប្ដីនិងបានដាក់ញត្តិទៅស្ថាប័ននានានិងបណ្ដាទូតក្នុងរាជធានីភ្នំពេញ។ គ្រាមួយក្រុមស្ត្រីទាំងនោះបានប្រាប់អ្នកយកព័ត៌មានវិទ្យុបារាំងអន្តរជាតិថា «ជីវភាពគ្រួសាររបស់ពួកគេកាន់តែខ្សត់ទៅៗ ក្រោយស្វាមីដែលជាចន្ទល់គ្រួសារត្រូវជាប់ពន្ធនាគារជាង២ឆ្នាំ» ខណៈការគំរាមកំហែងដល់ផ្លូវចិត្តក៏កាន់តែខ្លាំងថែមទៀត។
សកម្មភាពក្រុមស្ត្រីថ្ងៃសុក្រកើតមាន បន្ទាប់ពីតុលាការកម្ពុជាបានកាត់ទោសនិងឃុំខ្លួនស្វាមីរបស់ពួកគេឱ្យជាប់ពន្ធនាគារចន្លោះពី៣ទៅ៧ឆ្នាំ ក្រោមបទចោទប្រកាន់ «ញុះញង់ និងរួមគំនិតក្បត់» ពាក់ព័ន្ធនឹងព្រឹត្តិការណ៍វិលចូលប្រទេសកម្ពុជារបស់លោក សម រង្ស៊ី កាលពីថ្ងៃទី៩ ខែវិច្ឆិកា ឆ្នាំ២០១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ