ក្រសួងសុខាភិបាលសម្រេចដកហូតអាជ្ញាប័ណ្ឌគ្លីនិក«ដើមអង្គ្រង» ក្រោយវះកាត់ខុសបច្ចេកទេស
ក្រសួងសុខាភិបាលនៅថ្ងៃទី០៨ ខែធ្នូនេះ បានសម្រេចបិទ និងដកហូតលិខិតអនុញ្ញាតឲ្យបើកមន្ទីរសំរាកព្យាបាលឯកជនឈ្មោះ«ដើមអង្គ្រង» ស្ថិតនៅក្នុងស្រុកគងពិសី ខេត្តកំពង់ស្ពឺ ដែលមានលោកស្រីវេជ្ជបណ្ឌិត សួស ច័ន្ទរស្មី ជាអ្នកទទួលខុសត្រូវ។ ការបិទគ្លីនិក ដើមអង្គ្រងនេះ ត្រូវក្រសួងសុខាភិបាលរកឃើញថាគ្លីនិកនេះ បានប្រព្រឹត្តកំហុសនឹងក្រមសីលធម៌វិជ្ជាជីវៈសុខាភិបាល និងប្រាប់ឲ្យម្ចាស់គ្លីនិក និងគ្រូពេទ្យដែលគ្មានជំនាញទទួលខុសត្រូវចំពោះមុខច្បាប់។
ចុះផ្សាយនៅថ្ងៃ៖
ស្តាប់ - ០២:១០
ជាងមួយសប្តាហ៍បន្ទាប់ពីផ្ទុះហេតុការណ៍ពេទ្យឆ្មបនៅមន្ទីរសម្រាកព្យាបាលឯកជន«ដើមអង្គ្រង» នៅក្នុងខេត្តកំពង់ស្ពឺ បានធ្វើការខុសបច្ចេកទេសដោយមានការផ្សព្វផ្សាយថាច្រលំកាត់ពោះវៀនម្តាយ ថាជាទងសុកទារក ក្រសួងសុខាភិបាលបានសម្រេចបិទ និងដកហូតលិខិតអនុញ្ញាតធ្វើអាជីវកម្មវិស័យសុខាភិបាលចាប់ពីពេលនេះទៅ។
យោងតាមសេចក្តីសម្រេចរបស់ក្រសួងសុខាភិបាល គ្លីនិកដើមអង្គ្រងបានប្រើប្រាស់បុគ្គលិកផ្សេងដែលគ្មានការបណ្តុះបណ្តាល គ្មានការចុះបញ្ជីគណៈវិជ្ជាជីវៈ និងប្តូរទីតាំងដោយគ្មានការជូនដំណឹងដល់ក្រសួងសុខាភិបាល។ លិខិតដែលចុះហត្ថលេខាដោយលោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាលបញ្ជាក់ថា ចំពោះអ្នកទទួលខុសត្រូវ និងម្ចាស់មន្ទីរសម្រាកព្យាបាលដើមអង្គ្រង និងអ្នកដែលបានប្រព្រឹត្តខុសនឹងក្រមសីលធម៌វិជ្ជាជីវៈពេទ្យ ខុសបច្ចេកទេស ក្នុងការពិនិត្យព្យាបាលអ្នកជំងឺ ត្រូវទទួលខុសត្រូវចំពោះមុខច្បាប់ជាធរមាន។
បញ្ហាដ៏គួរឲ្យសោកស្តាយនេះ ត្រូវបានមហាជនរិះគន់យ៉ាងផុលផុសជាពិសេសលើបណ្តាញសង្គមថារឿងនេះជាផ្នែកមួយជាប់ពាក់ព័ន្ធនឹងអំពើពុករលួយនៃវិស័យសុខាភិបាល និងទាមទារឲ្យមានការទទួលខុសត្រូវពីម្ចាស់គ្លីនិក និងអ្នកប្រព្រឹត្ត។ ទោះយ៉ាងណាក្រសួងសុខាភិបាលបានប្រកាសផ្អាកសកម្មភាពគ្លីនិកដើមអង្គ្រងភ្លាមៗ បន្ទាប់ពីទទួលដំណឹង ព្រមទាំងបើកការសង្កេតមិនបង្អង់យូរផងដែរ។
សូមរំលឹកថា ស្ត្រីអាយុ ២២ឆ្នាំ ជាកម្មការិនីកាត់ដេរ មានអសយដ្ឋាននៅខេត្តកណ្ដាល បានចូលទៅសម្រាកនៅគ្លីនិកដើមអង្គ្រងកាលពីថ្ងៃទី១០ ខែវិច្ឆិកា ឆ្នាំ២០២២ ដោយរោគវិនិច្ឆ័យកូនស្លាប់ក្នុងស្បូន អាយុ១៨សប្តាហ៍។ ក្រុមគ្រូពេទ្យរបស់គ្លីនិកបានធ្វើការព្យាបាលដោយរំលូតយកកូនដែលស្លាប់ក្នុងផ្ទៃចេញ និងបន្តសម្រាកនៅគ្លីនិក រយៈពេលមួយយប់ហើយបានចេញទៅផ្ទះ។
ក៏ប៉ុន្តែនៅថ្ងៃទី២២ ខែវិច្ឆិកា កន្លងទៅ ស្ត្រីអ្នកជំងឺបានទៅគ្លីនិកដដែលម្ដងទៀត ដោយមានសញ្ញាឈឺពោះខ្លាំងនៅផ្នែកខាងក្រោម ដោយអាការៈធ្ងន់ធ្ងរ គ្លីនិកក៏បានបញ្ជូនស្ត្រីអ្នកជំងឺទៅព្យាបាលបន្តនៅមន្ទីរពេទ្យភ្នំពេញ។ មកទល់ពេលនេះ ស្ថានភាពសុខភាពរបស់ស្តី្រអ្នកជំងឺ នៅមិនទាន់មានការបញ្ជាក់ពីក្រុមគ្រូពេទ្យយ៉ាងណានៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ