អង្គការសង់ត្រាល់បដិសេធការចោទរបស់សហជីពមាននិន្នាការរដ្ឋាភិបាលរឿងអូសទាញសមាជិក
អង្គការសង់ត្រាល់ CENTRAL បានបដិសេធថា គ្មានមន្រ្តីរបស់ខ្លួនទៅដើរអូសទាញតំណាងសហជីពមូលដ្ឋានរបស់សហជីពមួយណានោះទេ។ ការបដិសេធនេះ ធ្វើឡើងបន្ទាប់ពីសហភាពសហជីព និងសហព័ន្ធសហជីពមាននិន្នាការរដ្ឋាភិបាលមួយចំនួន បានសរសេរលិខិតកាលពីថ្ងៃទី២៨វិច្ឆិកា ដោយចោទប្រកាន់ថា មានមន្រ្តីនៃអង្គការសង់ត្រាល់ បានកំពុងធ្វើចលនាលួចលាក់ក្នុងការញុះញង់អូសទាញតំណាងសហជីពមូលដ្ឋានជាសមាជិករបស់គេ។
ចុះផ្សាយនៅថ្ងៃ៖
ស្តាប់ - ០២:១៩
ក្រោយពីមានការចោទប្រកាន់ថាមានមន្ត្រីរបស់អង្គការសង់ត្រាល់ បានកំពុងធ្វើចលនាលួចលាក់ក្នុងការញុះញង់អូសទាញតំណាងសហជីពមូលដ្ឋាន លោក មឿន តុលា នាយកប្រតិបត្តិនៃអង្គការសង់ត្រាល់ បានបញ្ជាក់ថា គោលការណ៍របស់អង្គការសង់ត្រាល់ មិនមានការបំបែកសម្លេងរបស់កម្មករនោះទេ មានតែលើកទឹកចិត្តឲ្យកម្មករចេះសាមគ្គីគ្នា និងរួមគ្នាបង្កើតសហជីពដោយខ្លួនឯង ដើម្បីធ្វើការចរចាដោយសន្តិវិធីជាមួយភាគីពាក់ព័ន្ធ ក្នុងកែលម្អការងាររបស់ពួកគេដែលធ្វើការនៅទីនោះ នេះជាគោលការណ៍របស់សង់ត្រាល់។
មេដឹកនាំអង្គការសង់ត្រាល់រូបនេះ បានអះអាងថា អង្គការសង់ត្រាល់មានស្ថាប័នដៃគូមួយចំនួនដែលជាសហជីពក្នុងការធ្វើកិច្ចការងារជាមួយគ្នា ដោយឡែកសហជីពដែលដាក់លិខិតមកសល់ត្រាល់ ដោយចោទថា មានមន្ត្រីរបស់អង្គការសង់ត្រាល់បានដើរអូសទាញតំណាងសហជីពមូលដ្ឋានរបស់ពួកគេ មិនមែនជាដៃគូធ្វើកិច្ចការងារជាមួយនឹងអង្គការសង់ត្រាល់ឡើយ។ បើតាមលោក មឿន តុលា ការចោទប្រកាន់ថាមន្ត្រីអង្គការសង់ត្រាល់ដើរអូសទាញតំណាងសហជីពមូលដ្ឋានរបស់ពួកគេ គឺជាការចោទប្រកាន់មួយមិនត្រឹមត្រូវ និងគ្មានមូលដ្ឋានច្បាស់លាស់។
សូមបញ្ជាក់ថា ការបដិសេធរបស់លោក មឿន តុលានេះ បន្ទាប់ពីសហភាពសហជីព និងសហព័ន្ធសហជីពមួយចំនួនដែលមាននិន្នាការរដ្ឋាភិបាល បានដាក់លិខិតទៅលោក ដោយសម្តែងការខកចិត្តជាខ្លាំងបន្ទាប់ពីបានទទួលព័ត៌មាន និងពិនិត្យឃើញជាក់ស្តែងជាបន្តបន្ទាប់ថា បុគ្គលដែលបានតាំងខ្លួនជាមន្ត្រីរបស់អង្គការសង់ត្រាល់ កំពុងធ្វើចលនាលួចលាក់ក្នុងការញុះញង់អូសទាញតំណាងសហជីពមូលដ្ឋានជាសមាជិករបស់គេ ឲ្យទៅចូលរួមក្នុងកម្មវិធីបណ្តុះបណ្តាល និងសិក្ខាសាលានានា របស់អង្គការសង់ត្រាល់ ឲ្យធ្វើការផ្តាច់ខ្លួនទៅបង្កើតសហជីពថ្មី តាមរយៈការសន្យាផ្តល់ការគាំទ្រទាំងផ្នែកបច្ចេកទេស និងហិរញ្ញវត្ថុ។
សហភាពសហជីព និងសហព័ន្ធសហជីព ពួកគេចាត់ទុកថា សកម្មភាពលួចលាក់ទាំងអស់នេះ ធ្វើឲ្យមានការបែកបាក់សាមគ្គីភាព និងឯកភាពក្នុងចលនាកម្មករនិយោជិត និងធ្វើឲ្យសំឡេងឯកភាពរួមរបស់សហជីពចុះទន់ខ្សោយ ដែលផ្ទុយពីទិសដៅរួម និងកិច្ចខិតខំប្រឹងប្រែងរបស់ពួកគេទាំងអស់គ្នា ដែលជាយថាហេតុធ្វើឲ្យប៉ះពាល់ និងខូចខាតផលប្រយោជន៍បច្ចុប្បន្ន និងអនាគតរបស់កម្មករនិយោជិតនៅកម្ពុជា។ លើសពីសកម្មភាពទាំងនេះគឺផ្ទុយទៅនឹងគោលការណ៍ទូទៅនឹងការលើកកម្ពស់ចលនាកម្លាំងកម្មករនិយោជិត និងអាចឈានទៅរំលោភច្បាប់ជាធរមាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ