បក្សភ្លើងទៀន៖ ការចាប់ខ្លួនមេដឹកនាំសហជីពណាហ្គាគឺជាការគំរាមគំហែង និងធ្វើទុក្ខបុកម្នេញ
គណបក្សភ្លើងទៀន កាលពីថ្ងៃទី២៧ ខែវិច្ឆិកា បានអំពាវនាវឲ្យមានការដោះលែង និងចាត់ទុកការចាប់ខ្លួនប្រធានសហជីពកម្មករណាហ្គាវើលដ៏ជាថ្មី គឺជាការគំរាមគំហែង និងធ្វើទុក្ខបុកម្នេញមកលើក្រុមកម្មករក្រុមហ៊ុនល្បែងកាស៊ីណូណាហ្គាវើលដ៏។ ការលើកឡើងរបស់គណបក្សប្រឆាំងពេលនេះ គឺបន្ថែមពីលើការព្រួយបារម្ភរបស់ក្រុមសង្គមស៊ីវិលកាលពីម្សិលមិញ ដែលបានចាត់ទុកការចាប់ខ្លួននេះ គឺជាការបំភិតបំភ័យលើមេដឹកនាំសហជីព និងអតីតបុគ្គលិកណាហ្គាវើលដ៍ដែលកំពុងធ្វើកូដកម្មតវ៉ាទាមទាររកដំណោះស្រាយការងារ។
ចុះផ្សាយនៅថ្ងៃ៖
ស្តាប់ - ០២:៤៩
តាមរយៈចេញសេចក្ដីថ្លែងការណ៍របស់ខ្លួន គណបក្សភ្លើងទៀនបានចាត់ទុកការចាប់ខ្លួនកញ្ញា ឈឹម ស៊ីថរ ប្រធានសហជីពកម្មករណាហ្គាវើលដ៏ គឺជាការគំរាមគំហែង និងធ្វើទុក្ខបុកម្នេញពីសំណាក់អាជ្ញាធរចំពោះការតស៊ូមតិនៃក្រុមកម្មករក្រុមហ៊ុនល្បែងកាស៊ីណូណាហ្គាវើលដ៏ និងជាការរំលោភសិទ្ធិដែលមានចែងក្នុងរដ្ឋធម្មនុញ្ញមិនអាចប្រកែកបាន និងត្រូវបញ្ឈប់ជាបន្ទាន់។ គណបក្សភ្លើងទៀនក៏បានអំពាវនាវជាថ្មីទៀតឲ្យមានការដោះលែងរាល់កម្មជនការពារសិទ្ធិកម្មករ សកម្មជនសិទ្ធិមនុស្ស សកម្មជននយោបាយជាដើម ដើម្បីពង្រឹងនីតិរដ្ឋនៅកម្ពុជា និងដើម្បីភាពសុខសាន្តនៃពលរដ្ឋខ្មែរទាំងមូល។
ទាក់ទងករណីចាប់ខ្លួនកញ្ញា ឈឹម ស៊ីថរ ជាថ្មីម្ដងទៀតនេះផងដែរ សង្គមស៊ីវិល បានជំរុញឲ្យតុលាការដោះលែងជាបន្ទាន់ និងគ្មានលក្ខខណ្ឌ។ ពួកគេបានចាត់ទុកការចាប់ខ្លួននេះ គឺជាការគំរាមកំហែងសិទ្ធិសេរីភាពសហជីព និងជាសារព្រមានដល់ក្រុមកូដករណាហ្គាវើលដ៍មិនឲ្យចេញតវ៉ាទាមទារសិទ្ធិការងារដែលធានាដោយច្បាប់។
លោក អំ សំអាត នាយកទទួលបន្ទុកកិច្ចការទូទៅនៃអង្គការលីកាដូ (Licadho) បានថ្លែងប្រាប់វិទ្យុបារាំងអន្តរជាតិ RFI ថា ការចាប់ខ្លួន កញ្ញា ឈឹម ស៊ីថរ ហាក់ដូចជាការគំរាមកំហែង និងបំភិតបំភ័យបន្ថែមទៀតទៅលើមេដឹកនាំសហជីពណាហ្គាវើលដ៍។ លោកបន្ថែមថា ការចាប់ខ្លួននេះក៏បានគំរាមកំហែងដល់បុគ្គលិក និងអតីតបុគ្គលិកណាហ្គាវើលដ៍ដែលកំពុងធ្វើកូដកម្មទាមទារដំណោះស្រាយវិវាទការងារ។ បើតាម លោក អំ សំអាត អង្គការលីកាដូ នឹងបញ្ជូនមេធាវីរបស់ខ្លួនឲ្យទៅការពារក្ដីឲ្យកញ្ញា ឈឹម ស៊ីថរ នៅថ្ងៃចន្ទសប្ដាហ៍ក្រោយ។
ក្រៅពីគណបក្សភ្លើងទៀន និងអង្គការសង្គមស៊ីវិល ក៏មានលោក Phil Robertson នាយករងប្រចាំតំបន់អាស៊ីនៃអង្គការឃ្លាំមើលសិទិ្ធមនុស្សបានបង្ហោះសារលើបណ្ដាញសង្គម Twitter ទាមទារឲ្យដោះលែងកញ្ញា ឈឹម ស៊ីថរ ជាបន្ទាន់ និងដោយឥតលក្ខខណ្ឌ ព្រមទាំងអំពាវនាវឲ្យកម្ពុជាបញ្ឈប់ការបង្រ្កាបលើសហជីពឯករាជ្យផងដែរ។
យ៉ាងណាក៏ដោយករណីចាប់ខ្លួនកញ្ញា ឈឹម ស៊ីថរ ជាថ្មីម្ដងទៀតនេះ ត្រូវបានអ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា បានបញ្ជាក់ថា ដោយសារកញ្ញាមិនគោរពតាមដីការរបស់តុលាការដែលដាក់ក្រោមការត្រួតពិនិត្យរបស់តុលាការ និងហាមការចេញក្រៅប្រទេស។
សូមញ្ជាក់ថា កញ្ញា ឈឹម ស៊ីថរ ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ ត្រូវបានឃាត់ខ្លួនជាថ្មី កាលពីថ្ងៃទី២៦វិច្ឆិកា ដោយនគរបាលអន្តោប្រវេសន៍នៃអាកាសយាន្តដ្ឋានអន្តរជាតិភ្នំពេញ ក្រោយពីកញ្ញាបានវិលត្រឡប់ពីប្រទេសអូស្ត្រាលីមកដល់កម្ពុជា។ ការចាប់ខ្លួន នេះ គឺជាលើកទី២ហើយ ដោយកាលពីខែមករា កញ្ញាត្រូវបានចាប់ឃាត់ខ្លួនម្ដងហើយ អំឡុងពេលព្យាយាមចូលរួមធ្វើកូដកម្មជាមួយកូដករផ្សេងទៀត ហើយត្រូវបានជាប់ឃុំបណ្ដោះអាសន្នក្នុងពន្ធនាគារអស់រយៈពេល២ខែ ជាមួយនឹងថ្នាក់ដឹកនាំ និងសមាជិករបស់ខ្លួនចំនួន១០នាក់ផ្សេងទៀត មុនពេលមានការដោះលែងឲ្យនៅក្រៅឃុំវិញកាលពីខែមីនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ