យុទ្ធនាការ១៦ថ្ងៃបញ្ឈប់អំពើហិង្សាលើស្ត្រី៖ ស្ត្រីខ្មែរ១/៥នាក់នៅតែបន្តទទួលរងអំពើហឹង្សាធ្ងន់ធ្ងរ
អង្គការសង្គមស៊ីវិលលើកកម្ពស់ស្ត្រីនៅកម្ពុជាក្នុងអាទិត្យនេះ បានរៀបចំបើកព្រឹត្តិការណ៍នេះជាសាធារណៈ ក្នុងប្រមូលនិងបញ្ចេញសំឡេងក្រោកឈរឡើង បញ្ឈប់អំពើហិង្សាលើស្ត្រី និងក្មេងស្រី។ ថ្លែងនៅក្នុងពិធីប្រកាសបើកយុទ្ធនាការនៅថ្ងៃអាទិត្យនេះ អង្គការនារីដើម្បីសន្តិភាព បានគូសបញ្ជាក់ថា នៅប្រទេសកម្ពុជា ស្ត្រីនិងក្មេងស្រីនៅតែជាបុគ្គលងាយរងគ្រោះដោយអំពើហឹង្សាគ្រប់ទម្រង់។ តាមរបាយការណ៍ ស្ត្រីខ្មែរ ១/៥នាក់ នៅតែបន្តរងអំពើ ហឹង្សាទាំងផ្លូវកាយនិងផ្លូវចិត្ត។
ចុះផ្សាយនៅថ្ងៃ៖
ស្តាប់ - ០២:០៩
អង្គការសង្គមស៊ីវិល ព្រមទាំងស្ថាប័នជាតិនិងអន្តរជាតិជាច្រើនទៀតនៅទូទាំងពិភពលោក កំពុងប្រារព្ធយុទ្ធនាការ១៦ថ្ងៃ ដើម្បីបញ្ឈប់អំពើហិង្សាលើស្ត្រី និងក្មេងស្រី។
នៅប្រទេសកម្ពុជា មានអង្គការសង្គមស៊ីវិលចំនួន៥ស្ថាប័ន បានរួមគ្នាប្រកាសបើកយុទ្ធនាការលើកកម្ពស់ស្ត្រីនេះ ក្រោមប្រធានបទ «រួមគ្នាបញ្ឈប់អំពើហិង្សាលើស្រ្តីនិងក្មេងស្រី៖ ពីការយល់ដឹងឆ្ពោះទៅការអនុវត្ត»។ ជាយុទ្ធនាការសាធារណៈនិងតាមប្រព័ន្ធបណ្តាញសង្គម ដើម្បីប្រមូលជាសំឡេងក្រោកឈរ និងបញ្ចេញសំឡេង ដើម្បីទៅបញ្ឈប់អំពើហិង្សាលើស្ត្រី និងក្មេងស្រី។
លោកស្រី គ្រី ស៊ុយហៀង នាយិការបស់អង្គការនារីដើម្បីសន្តិភាព ដែលជាស្ថាប័នមួយក្នុងចំណោមស្ថាប័នរៀបចំយុទ្ធនាការនេះ បានគូសបញ្ជាក់នៅថ្ងៃទី២៦ ខែវិច្ឆិកា ឆ្នាំ២០២២ថា អំពើហិង្សាលើស្ដ្រីនិងក្មេងស្រីនៅកម្ពុជា មានស្ថានភាពកាន់តែធ្ងន់ធ្ងរឡើង ដែលទាមទារឱ្យមានការចូលរួមពីពលរដ្ឋគ្រប់គ្នា ទើបអាចបញ្ឈប់អំពើហិង្សាទាំងនោះបាន។
តាមរបាយការណ៍ ស្ត្រី១/៣នាក់ ទទួលរងអំពើហឹង្សា ជារួមនៅលើសកលលោក និងនិយាយដោយឡែក នៅកម្ពុជា មានស្ត្រី១/៥នាក់ ទទួលរងអំពើហឹង្សាទាំងផ្លូវកាយនិងផ្លូវភេទ។ នេះបើតាមលោកស្រីនាយិកាអង្គការនារីដើម្បីសន្តិភាព។
ជនបង្គោលនៃបណ្ដាញបុរសកម្ពុជានៃអង្គការយេនឌ័រ និងអភិវឌ្ឍន៍ដើម្បីកម្ពុជា លោក សិទ្ធ សុខា នៅថ្ងៃទី២៦ ខែវិច្ឆិកា បានបង្ហាញក្តីបារម្ភចំពោះស្ថានភាពហឹង្សាលើស្ត្រីនៅតាមសហគមន៍លោក។ ចំពោះលោកសុខា បញ្ហាសមភាពយេនដឺ នៅតែកើតមាន។ បុរសមានតួនាទីសំខាន់ នៅក្នុងការរួមចំណែកកាត់បន្ថយអំពើហឹង្សាលើស្ត្រីនិងក្មេងស្រី ហើយមនុស្សគ្រប់គ្នាត្រូវចាត់ទុកថា អំពើហិង្សាលើស្ត្រីគឺជាការរំលោភបំពានសិទ្ធិមនុស្ស។
គួរជម្រាបថា យុទ្ធនាការ១៦ថ្ងៃនេះ គឺជាយុទ្ធនាការអន្តរជាតិមួយដែលដំណើរការជារៀងរាល់ឆ្នាំចាប់ពីថ្ងៃទី ២៥ ខែវិច្ឆិកា ដែលជាទិវាអន្តរជាតិក្នុងការលុបបំបាត់អំពើហិង្សាលើស្ត្រី រហូតដល់ថ្ងៃទី ១០ ខែធ្នូ ដែលជាទិវាសិទ្ធិមនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ