ប្រធានគណបក្សឆន្ទៈខ្មែរ សម្រចចាកចេញពីបក្ស ទៅជ្រកក្រោមគណបក្សភ្លើងទៀន
ប្រធានគណបក្សឆន្ទៈខ្មែរ នៅថ្ងៃទី២០ ខែវិច្ឆិកា បានសម្រេចលាលែងពីតំណែងជាប្រធានបក្សឆន្ទៈខ្មែរ និងដឹកនាំសមាជិកទៅចូលរួមធ្វើនយោបាយជាមួយគណបក្សភ្លើងទៀន។ ការសម្រេចនេះធ្វើឡើងបន្ទាប់ពីមានកិច្ចប្រជុំវិសាមញ្ញរបស់គណបក្សឆន្ទៈខ្មែរ។ យ៉ាងណាមិញ គណបក្សឆន្ទៈខ្មែរ នៅតែរក្សាឈ្មោះផ្លូវការនៅក្រសួងមហាផ្ទៃដដែល។
ចុះផ្សាយនៅថ្ងៃ៖
ស្តាប់ - ០១:៣០
លោក គង់ ម៉ូនីកា ប្រធានគណបក្សឆន្ទៈខ្មែរ បានបញ្ជាក់ប្រាប់វិទ្យុបារាំងអន្តរជាតិ RFI នៅថ្ងៃទី២១ វិច្ឆិកានេះថា លោកនិងថ្នាក់ដឹកនាំ ប្រមាណ ២០នាក់របស់គណបក្សឆន្ទៈខ្មែរ នឹងទៅចូលរួមធ្វើនយោបាយជាមួយគណបក្សភ្លើងទៀន។ លោកបន្តថា ការសម្រេចនេះ គឺដើម្បីប្រមូលកម្លាំងអ្នកប្រជាធិបតេយ្យ និងអ្នកនយោបាយដែលមាននិន្នាការដូចគ្នា ទៅជាកម្លាំងប្រជាធិបតេយ្យមួយធំ សម្រាប់ប្រកួតប្រជែងនៅពេលបោះឆ្នោតជាតិខាងមុខ។
បើតាម លោក គង់ ម៉ូនីកា គឺមិនទាន់មានការជជែកពីតួនាទីរបស់លោកនៅក្នុងគណបក្សភ្លើងទៀននៅឡើយទេ ខណៈលោក គង់ គាំ ដែលជាឳពុក ត្រូវបានតែងតែជាទីប្រឹក្សាគណបក្សភ្លើងទៀន។
ជាមួយគ្នានេះ គណបក្សឆន្ទៈខ្មែរនឹងមិនត្រូវរំលាយទេ ពោលគឺនៅរក្សាឈ្មោះគណបក្សក្នុងបញ្ជីរផ្លូវការរបស់ក្រសួងមហាផ្ទៃដដែល។ ក៏ប៉ុន្តែគណបក្សនេះ នឹងមិនដាក់បញ្ជីរបេក្ខជនឈរឈ្មោះនៅក្នុងការបោះឆ្នោតជ្រើសតាំងតំណាងរាស្ត្រឆ្នាំ២០២៣ខាងមុខនេះទេ។ នេះបើតាមសេចក្ដីប្រកាសព័ត៌មាន។
លោក គង់ ម៉ូនីកា ថាការរក្សាគណបក្សឆន្ទៈខ្មែរគឺជារឿងប្រសើរ ដោយហេតុថា លោកមើលឃើញពីបទពិសោធន៍អាក្រក់កន្លងមកដែលធ្លាប់កើតមាននៅក្នុងការប្រកួតប្រជែងនយោបាយនៅកម្ពុជាដែលឈានដល់ការរំលាយគណបក្សសង្គ្រោះជាតិ។
គួរជម្រាបជូនថា គណបក្សឆន្ទៈ´´ខ្មែរត្រូវបានបង្កើតឡើងក្រោយពីរំលាយគណបក្សសង្គ្រោះជាតិ ហើយបានចូលរួមការបោះឆ្នោតឆ្នាំ២០១៨ តែមិនទទួលបានកៅអីតំណាងរាស្ត្រនោះឡើយ ខណៈដែលការចូលរួមបោះឆ្នោតឃុំ សង្កាត់ ឆ្នាំ២០២២ កន្លងមកនេះ ក៏មិនទទួលបានកៅអីក្រុមប្រឹក្សានោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ