គ.ជ.ប បំភ្លឺកង្វល់របស់បក្សនយោបាយ ពីសេចក្ដីព្រាងបទបញ្ជាសម្រាប់ការបោះឆ្នោតឆ្នាំក្រោយ
សេចក្ដីព្រាងបទបញ្ជា និងនីតិវិធីសម្រាប់ការបោះឆ្នោតឆ្នាំ២០២៣ មានខ្លឹមសារដូចទៅនឹងសេចក្ដីព្រាងបទបញ្ជាអាណ្ណត្តិមុន ស្ទើរតែទាំងស្រុង។ នេះបើតាមសេចក្ដីបំភ្លឺរបស់ គ.ជ.ប កាលពីថ្ងៃទី១៨ វិច្ឆិកា។ ការចេញសេចក្ដីបំភ្លឺនេះ ធ្វើឡើងបន្ទាប់ពីមានការស្នើឱ្យកែសម្រួលលើខ្លឹមសារសេចក្ដីព្រាងបទបញ្ជាមួយចំនួនពីខាងគណបក្សនយោបាយ ខណៈខាងសង្គមស៊ីវិលគ្រោងជួបជុំគ្នាដាក់សំណើរជារួមទៅ គ.ជ.ប។
ចុះផ្សាយនៅថ្ងៃ៖
ស្តាប់ - ០២:១៧
គណៈកម្មាធិការជាតិរៀបចំការបោះឆ្នោត(គ.ជ.ប) បានបញ្ជាក់ថា សេចក្ដីព្រាងបទបញ្ជា និងនីតិវិធីសម្រាប់ការបោះឆ្នោតជ្រើសតាំងតំណាងរាស្ត្រ អាណ្ណត្តិទី៧ ឆ្នាំ២០២៣ ខាងមុខនេះ មានខ្លឹមសារដូចទៅនឹងសេចក្ដីព្រាងបទបញ្ជា និងនីតិវិធី កាលពីអាណ្ណត្តិមុន ឆ្នាំ២០១៨ ស្ទើរតែទាំងស្រុង។ នេះបើតាមសេចក្ដីបំភ្លឺរបស់ គ.ជ.ប។
គ.ជ.ប ឱ្យដឹងថា មានការកែសម្រួលចំណុចមួយចំនួន រួមមាន ការធ្វើបច្ចុប្បន្នភាពខ្លឹមសារពាក់ព័ន្ធនឹងការងារសន្តិសុខបោះឆ្នោត ស្របតាមផែនការអន្តរស្ថាប័ន ក្រសួងកាពារជាតិ មហាផ្ទៃ និងគ.ជ.ប។ ការដាក់បញ្ចូលការប្រើប្រាស់ប្រព័ន្ធកំព្យូទ័រ សម្រាប់គ្រប់គ្រងបញ្ជីគណបក្សនយោបាយ បញ្ជីបេក្ខជនឈរឈ្មោះ និងដើម្បីគ្រប់គ្រងការស្នើសុំ រួមទាំងការចេញឯកសារបញ្ជាក់អត្តសញ្ញាណបម្រើឲ្យការបោះឆ្នោត។
បន្ថែមពីនេះ គឺការដាក់បញ្ចូលការប្រើប្រាស់ប្រព័ន្ធកំព្យូទ័រ សម្រាប់ជំនួយដល់ការត្រួតពិនិត្យ បូកសរុបលទ្ធផលបោះឆ្នោត ព្រមទាំងកែសម្រួលលក្ខខណ្ឌបច្ចេកទេសក្នុងការបំពេញ និងប្រើប្រាស់កំណត់ហេតុទម្រង់១១០២ ឲ្យមានសង្គតិភាពនឹងការបោះឆ្នោតឃុំសង្កាត់ឆ្នាំ២០២២។ នេះបើតាម គ.ជ.ប។
លោក សម គន្ធាមី នាយកប្រតិបត្តិអង្គការនិកហ្វិច យល់ឃើញថា សេចក្ដីព្រាងបទបញ្ជា និងនីតិវិធីសម្រាប់ការបោះឆ្នោតឆ្នាំ២០២៣ ពិតជាមានខ្លឹមសារដូចសេចក្ដីព្រាងបទបញ្ជាអាណ្ណត្តិឆ្នាំ២០១៨ ស្ទើរតែទាំងស្រុងដូចការបំភ្លឺរបស់ គ.ជ.ប មែន។
យ៉ាងណាមិញ នាយកប្រតិបត្តិអង្គការនិកហ្វិចរូបនេះឱ្យដឹងថា សង្គមស៊ីវិលគ្រោងនឹងជួបជុំគ្នាដើម្បីពិភាក្សា និងដាក់អនុសាសន៍ជារួមមួយទៅគ.ជ.ប ដើម្បីស្នើកែសម្រួលបទបញ្ជា និងនីតិវិធីសម្រាប់ការបោះឆ្នោតជ្រើសតាំងតំណាងរាស្ត្រខាងមុខនេះ។ កែសម្រួលដោយសារតែបទបញ្ជា និងនីតិវិធីនោះ មិនទាន់ល្អគ្រប់គ្រាន់។ នេះបើតាមនាយកប្រតិបត្តិអង្គការនិកហ្វិច។
ពាក់ព័ន្ធនឹងបញ្ហានេះ គណបក្សខ្មែររួបរួមជាតិ ក៏ធ្លាប់បានស្នើ គ.ជ.ប ឱ្យកែសម្រួលលើខ្លឹមសារ៣ចំណុចរួមមាន ទី១ សមាគម ឬអង្គការមិនមែនរដ្ឋាភិបាល ដែលចូលរួមសង្កេតការណ៍បោះឆ្នោត ត្រូវពាក់តែប័ណ្ឌដែលចេញដោយ គ.ជ.ប ប៉ុណ្ណោះ មិនត្រូវពាក់ឯកសណ្ឋាន ឬសញ្ញាសម្គាល់របស់ស្ថាប័នឡើយ។ ទី២ គឺត្រូវបិទផ្សាយទម្រង់១១០២ តាមច្រកចេញចូលទីតាំងការិយាល័យបោះឆ្នោត និងរាប់សន្លឹកឆ្នោត រួមទាំងចែកជូនភ្នាក់ងារគណបក្សនយោបាយ រហូតថ្ងៃប្រកាសលទ្ធផលផ្លូវការ។ និងទី៣ គឺដកចោលលិខិតបញ្ជាក់ការចុះឈ្មោះបេក្ខជន ព្រោះបញ្ចីរបោះឆ្នោត គឺផ្ដល់សុពលភាពដោយគជប រួចស្រេចហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ