គណបក្សភ្លើងទៀន សុំអន្តរាគមន៍ពីលោក ចូ បៃឌិន ដោះលែងអ្នកទោសមនសិការដោយគ្មានលក្ខខណ្ឌ
គណបក្សភ្លើងទៀនជាបក្សប្រឆាំងឈានមុខគេនៅកម្ពុជា ស្វែងរកការអន្តរាគមន៍ពីប្រធានាធិបតីអាមេរិក លោក ចូ បៃឌិន ឲ្យរដ្ឋាភិបាលកម្ពុជាដោះលែងសកម្មជនដែលកំពុងជាប់ឃុំ និងបើកលំហសិទ្ធិនយោបាយ និងលទ្ធិប្រជាធិបតេយ្យឡើងវិញ។ ការស្នើបែបនេះ គឺក្នុងពេលដែល លោក ចូ បៃឌិន គ្រោងមានជំនួបទ្វេរភាគីជាមួយប្រមុខរដ្ឋាភិបាលកម្ពុជា លោក ហ៊ុន សែន នៅមុនកិច្ចប្រជុំកំពូលអាស៊ាន-អាមេរិកនៅថ្ងៃនេះ។
ចុះផ្សាយនៅថ្ងៃ៖
ស្តាប់ - ០២:០៦
តាមរយៈលិខិតជាភាសាអង់គ្លេសចេញថ្ងៃទី៩វិច្ឆិកា ទៅកាន់ លោក ចូ បៃឌិន គណបក្សភ្លើងទៀន ស្នើសុំការអន្តរាគមន៍ពីលោកប្រធានាធិបតីសហរដ្ឋអាមេរិក ជំរុញឱ្យរដ្ឋាភិបាលកម្ពុជា បញ្ឈប់រាល់ការធ្វើទុក្ខបុកម្នេញផ្នែកនយោបាយ ការគំរាមកំហែងផ្សេងៗ និងការប្រើប្រាស់ប្រព័ន្ធតុលាការ ដើម្បីបង្ក្រាបសំឡេងប្រឆាំង។
លើសពីនេះ គណបក្សភ្លើងទៀន ក៏ស្នើឲ្យទម្លាក់ចោលរាល់ការចោទប្រកាន់ហេតុផលនយោបាយប្រឆាំងនឹងសកម្មជននយោបាយ សកម្មជនសង្គម និងបរិស្ថាន ដែលត្រូវបានឃុំខ្លួនដោយអយុត្តិធម៌នៅក្នុងពន្ធនាគារ និងដោះលែងអ្នកទោសមនសិការទាំងអស់ដោយគ្មានលក្ខខណ្ឌ។
ការបង្កើតលំហនយោបាយ ដើម្បីធានាគោលការណ៍ប្រជាធិបតេយ្យ រួមទាំងសិទ្ធិក្នុងការបញ្ចេញមតិ និងការគោរពសិទ្ធិមនុស្ស ឯករាជ្យភាពរបស់គណៈកម្មាធិការជាតិរៀបចំការបោះឆ្នោត (គ.ជ.ប) ឆ្ពោះទៅរកការបោះឆ្នោតដោយសេរី ត្រឹមត្រូវ និងយុត្តិធម៌ នៅឆ្នាំ២០២៣ ក៏ជាអ្វីដែលគណបក្សប្រឆាំងមួយនេះ លើកឡើងទៅកាន់លោក ចូ បៃឌិន ផងដែរ។
លោក ជិន ម៉ាលីន អ្នកនាំពាក្យក្រសួងយុត្តិធម៌ បានឆ្លើយតបថា នេះជាសិទ្ធិរបស់គណបក្សភ្លើងទៀន តែថា អាមេរិកមិនអាចជ្រៀតជ្រែកកិច្ចការផ្ទៃក្នុងកម្ពុជាបានឡើយ។
ជាការកត់សំគាល់ នេះជាការសុំការអន្តរាគមន៍ដោយផ្ទាល់ទៅកាន់លោក ចូ បៃឌិន ពីសំណាក់គណបក្សភ្លើងទៀន ខណៈសេចក្តីថ្លែងការណ៍ដោយឡែកមួយទៀត របស់គណបក្សប្រឆាំង ទៅកាន់មេដឹកនាំអាស៊ាន បានអំពាវនាវឲ្យប្រទេសជាសមាជិក រួមគ្នាលើកកម្ពស់នីតិរដ្ឋ ប្រជាធិបតេយ្យ និងគោរពសិទ្ធិមនុស្ស ជាពិសេសធានាដំណើរការបោះឆ្នោតនៅកម្ពុជា២០២៣។
គួរឲ្យដឹងថា ប៉ុន្មានថ្ងៃមុនពេលមកដល់របស់លោក ចូ បៃឌិន នៅកម្ពុជា ក្រសួងការបរទេសអាមេរិក បានបង្ហាញកង្វល់របស់ខ្លួនជាថ្មីម្តងទៀតជុំវិញការឃុំខ្លួន កញ្ញា សេង ធារី មេធាវីសញ្ជាតិអាមេរិកាំង និងការកាត់ទោសក្រុមលើសកម្មជនគណបក្សប្រឆាំងនៅកម្ពុជា។
អ្នកនាំពាក្យក្រសួងការបរទេសអាមេរិកថ្លែងថា អាមេរិកអំពាវនាវដល់អាជ្ញាធរកម្ពុជា ឱ្យដោះលែងអ្នក ដែលត្រូវបានឃុំខ្លួនដោយអយុត្តិធម៌ រួមទាំងកញ្ញា សេង ធារី និងត្រូវធានានូវសេរីភាពនៃការបញ្ចេញមតិ សេរីភាពនៃការបង្កើតសមាគម និងការប្រមូលផ្តុំដោយសន្តិវិធី ដែលស្របទៅតាមរដ្ឋធម្មនុញ្ញរបស់កម្ពុជា និងកាតព្វកិច្ចជាអន្តរជាតិរបស់ប្រទេសនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ