លោក ស ខេង៖ មន្ត្រីរាជការ និងបុគ្គលិកឯកជននឹងត្រូវធ្វើតេស្តរកសារធាតុញៀនជាមុន មុននឹងឲ្យចូលធ្វើការ
នៅក្នុងពិធីសម្ពោធអគារសិក្សាកាលពីថ្ងៃទី០២ ខែវិច្ឆិកា ម្សិលមិញ នៅស្រុកបាណន់ខេត្តបាត់ដំបង លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃបានថ្លែងបញ្ជាក់ថា នៅពេលខាងមុខទាំងស្ថាប័នរដ្ឋ និងស្ថាប័នឯកជន ត្រូវតែធ្វើតេស្តរកសារធាតុញៀនជាមុនសិន មុននឹងអនុញ្ញាតឱ្យចូលធ្វើការ។ លោក ស ខេង បន្តថាការធ្វើបែបនេះ ក៏ជាវិធានការមួយប្រឆាំងនឹងការជួញដូរគ្រឿងញៀនដែរ ខណៈដែលបញ្ហានេះនឹងត្រូវដាក់បញ្ចូលទៅក្នុងវិសោធនកម្មច្បាប់ស្តីពីការប្រឆាំង និងជួញដូរគ្រឿងញៀន ប្រយោជន៍ដើម្បីការពារសង្គម និងកូនចៅខ្មែរជំនាន់ក្រោយ។
ចុះផ្សាយនៅថ្ងៃ៖
សូមស្តាប់ប្រសាសន៍លោកឧបនាយករដ្ឋមន្ត្រី ស ខេង៖
សូមបញ្ជាក់ថា ឆ្លៀតឱកាសនៃវិបត្តិកូវីដ-១៩ និងវិបត្តិផ្សេងៗទៀត ដែលបណ្តាលមកពីសង្គ្រាមឈ្លានពានរបស់រុស្ស៊ីទៅលើអ៊ុយក្រែន ប្រទេសកម្ពុជាត្រូវគេសម្គាល់ថាជាភូមិសាស្ត្រដែលមានការរត់ពន្ធគ្រឿងញៀនឆ្លងដែន និងការផលិតគ្រឿងញៀនទ្រង់ទ្រាយធំមិនធ្លាប់មាន។ តាមរយៈការបង្ក្រាបរបស់សមត្ថកិច្ចជាបន្តបន្ទាប់បង្ហាញថា បរិមាណគ្រឿងញៀនដែលឧក្រិដ្ឋជនជួញដូរ និងផលិតកាន់តែធំទៅៗ រហូតដល់រាប់រយគីឡូក្រាម ឬរហូតដល់តោន ក្នុងករណីនីមួយៗ។ កំណើនៃការជួញដូរគ្រឿងញៀននេះ ភាគច្រើនបានទាក់ទងទៅនឹងជនបរទេស ជាពិសេសជនជាតិចិន។ អ្នកតាមដានសង្គមយល់ឃើញថា ប្រសិនបើគ្រឿងញៀនដ៏សន្ធឹកសន្ធាប់ទាំងអស់នេះ ហូរចូលទៅដល់សហគមន៍ប្រជាពលរដ្ឋ នោះអនាគតកូនខ្មែរនឹងត្រូវបំផ្លាញ មុខមាត់ និងកេរ្តិ៍ឈ្មោះប្រទេសជាតិនឹងអាប់ឱន ហើយកម្ពុជានឹងដើរក្រោយគេជាក់ជាមិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ