លោក ហ៊ុន សែន៖ ដើម្បីធានាសន្តិភាពជម្រើសតែមួយគត់គឺបោះឆ្នោតឲ្យគណបក្សប្រជាជនកម្ពុជា
ប្រមុខរដ្ឋាភិបាលកម្ពុជា នៅថ្ងៃចន្ទនេះ បានប្រកាសថា ដើម្បីធានាសន្តិភាព មានជម្រើសតែមួយគត់ គឺបោះឆ្នោតឲ្យគណបក្សប្រជាជនកម្ពុជានៅឆ្នាំ២០២៣។ ប្រមុខបក្សកាន់អំណាចប្រកាសដូច្នេះនៅក្នុងពេលចុះជួបពលរដ្ឋដែលរងគ្រោះដោយសារទឹកជំនន់ក្នុងខេត្តបាត់ដំបង ខណៈលោកទទួលស្គាល់ថា លោកបានឃោសនារកសំឡេងឆ្នោតមុនរដូវកាលកំណត់ តែអះអាងថានេះ ជាសិទ្ធិរបស់លោកក្នុងឋានៈជានាយករដ្ឋមន្ត្រី។
ចុះផ្សាយនៅថ្ងៃ៖
ស្តាប់ - ០១:៥៨
មិនមែនជារឿងថ្មីទេដែលប្រមុខបក្សកាន់អំណាច លោក ហ៊ុន សែន បានព្រមានថា បើគណបក្សប្រជាជនកម្ពុជាចាញ់ឆ្នោតនឹងកើតមានសង្គ្រាមនោះ។
ជាថ្មីម្តងទៀតនៅក្នុងដំណើរចុះជួបពលរដ្ឋដែលរងគ្រោះដោយសារទឹកជំនន់នៅតាមបណ្តាខេត្តមួយចំនួនប៉ុន្មានថ្ងៃជាប់ៗគ្នានេះ លោកប្រមុខរដ្ឋាភិបាលបានទទួលស្គាល់ថា លោកធ្វើការឃោសនារកសំឡេងឆ្នោតមុនរដូវកាលកំណត់។ សម្រាប់លោក ហ៊ុន សែន គឺលោកមានសិទ្ធិឃោសនាបែបនេះក្នុងឋានៈលោកជានាយករដ្ឋមន្ត្រី ទោះចង់អ្នកណារិះគន់ក៏រិះគន់ទៅ។
លោក សោម សូរីដា អគ្គលេខាធិការរង និងជាអ្នកនាំពាក្យម្នាក់របស់គណៈកម្មាធិការជាតិរៀបចំការបោះឆ្នោតហៅកាត់ថាគ.ជ.ប ប្រាប់វិទ្យុបារាំងអន្តរជាតិRFIថា គ.ជ .ប មិនគ្រប់គ្រងសកម្មភាពរបស់អ្នកនយោបាយនៅពេលនេះទេ ពោល គ.ជ .ប មើលការខុសត្រូវតែអំឡុងពេលយុទ្ធនាការឃោសនាបោះឆ្នោតដែលច្បាប់កំណត់តែប៉ុណ្ណោះ។
ប៉ុន្តែសម្រាប់អ្នកឃ្លាំមើលការបោះឆ្នោត និងគណបក្សនៅក្រៅរដ្ឋាភិបាលយល់ថា ការឃោសនារបស់ប្រមុខបក្សកាន់អំណាចនៅមុនរដូវកាលកំណត់នេះ បង្ហាញថា ការប្រកួតប្រជែងក្នុងដំណើរការបោះឆ្នោតប្រព្រឹត្តិទៅមិនស្មើភាពគ្នា។ ការប្រកួតប្រជែងមិនស្មើភាពគ្នា តាំង ពីដំបូងនាំឲ្យលទ្ធផលបោះឆ្នោតនឹងមិនទទួលបានដោយសេរី យុត្តិធម៌ និងគោលការណ៍ស្មើភាពនោះទេ។ នេះបើតាម លោក កន សាវ៉ាង មន្ត្រីជាន់ខ្ពស់នៃអង្គការឃ្លាំមើលការបោះឆ្នោត ខុមហ្វ្រែល ដែល ទទួលស្គាល់ថា ច្បាប់បោះឆ្នោតមិនបានហាមអ្នកនយោបាយឃោសនាមុនរដូវកាលមែន តែលោកថា ច្បាប់សហលក្ខខណ្ឌមន្ត្រីរាជការ បានហាមមន្ត្រីរាជការ និងកងកម្លាំងប្រដាប់អាវុធ មិនឲ្យឃោសនាឲ្យគណបក្សនយោបាយណាមួយនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ