លោក ហ៊ុន សែន ព្រមានរំលាយគណបក្សនយោបាយដែលភ្ជាប់ខ្លួនជាមួយលោក សម រង្ស៊ី
ប្រមុខរដ្ឋាភិបាលកម្ពុជានៅថ្ងៃចន្ទនេះបានព្រមានជាសាធារណៈនៅចំពោះមុខនិស្សិតរាប់ពាន់នាក់ថានឹងរំលាយចោលគណបក្សនយោបាយណាដែលភ្ជាប់ខ្លួនជាមួយនឹងលោក សម រង្ស៊ី ខណៈលោក ហ៊ុន សែន ចោទថាជា«ពូជក្បត់ជាតិ៣ជំនាន់»។ ការព្រមានរបស់មេបក្សកាន់អំណាចបែបនេះគឺជាការឆ្លើយតបភ្លាមៗទៅកាន់ប្រមុខអតីតបក្សប្រឆាំងដែលអំពាវនាវឲ្យមានការផ្លាស់ប្តូរនៅឆ្នាំ២០២៣ និងអំពាវនាវសាជាថ្មីកុំឲ្យកងម្លាំងប្រដាប់អាវុធបាញ់សម្លាប់ពលរដ្ឋខ្មែរនៅពេលលោកទៅដល់កម្ពុជានៅពេលខាងមុខ។
ចុះផ្សាយនៅថ្ងៃ៖
ស្តាប់ - ០១:៤៩
នៅចំពោះមុខនិស្សិតរាប់ពាន់ក្នុងពិធីចែកសញ្ញាបត្រនៅថ្ងៃទី១៧តុលានេះ លោកនាយករដ្ឋមន្ត្រី ហ៊ុន សែន បានសំដែងការខឹងសម្បារទៅនឹងលោក សម រង្ស៊ី ចំពោះសេចក្តីការណ៍របស់ប្រមុខអតីតបក្សប្រឆាំងនៅថ្ងៃទី១៦តុលា។
តាមរយៈវីដេអូប្រមាណ៥នាទីលោក សម រង្ស៊ី ដែលអះអាងថាឈ្នះក្តីលើ លោក ហ៊ុន សែន នៅឯតុលាការបារាំង បានអំពាវនាវឲ្យមានការផ្លាស់ប្តូរមេដឹកនាំកម្ពុជានៅឆ្នាំ២០២៣ និងអំពាវនាវសាជាថ្មីកុំឲ្យកងម្លាំងប្រដាប់អាវុធបាញ់សម្លាប់ពលរដ្ឋខ្មែរនៅពេលលោកទៅដល់កម្ពុជានៅពេលខាងមុខ។
ការអំពាវនាវបែបនេះហើយ ដែលធ្វើឲ្យលោក ហ៊ុន សែន បានប្រតិកម្មដោយប្រកាសដាក់ចេញយុទ្ធសាស្ត្រ«កំចាត់ចោលមនោគមវិជ្ជា» ដែលលោកហៅ«ពូជក្បត់ជាតិ៣ជំនាន់» ដែលសំដៅចំៗទៅលោក សម រង្ស៊ី។
ក្រៅពីលោក សម រង្ស៊ី សម្រាប់គណបក្សនយោបាយណាដែលហ៊ានភ្ជាប់ខ្លួនជាមួយនឹងលោក សម រង្ស៊ី ត្រូវបានលោក ហ៊ុន សែន ព្រមានទុកជាមុនថា នឹងត្រូវរំលាយចោលដូចគណបក្សសង្គ្រោះជាតិនៅឆ្នាំ២០១៧។
ការព្រមានរំលាយគណបក្សនយោបាយដែលមាននិន្នាការគាំទ្រលោក សម រង្ស៊ី នេះគឺជាការឆ្លើយតបរបស់លោក ហ៊ុន សែន ទៅកាន់លោក សម រង្ស៊ី ដែលអះអាងថា លោកនឹងវិលទៅប្រទេសកម្ពុជាវិញនៅពេលខាងមុខ ហើយអំពាវនាវកុំឲ្យកងម្លាំងប្រដាប់អាវុធបាញ់សម្លាប់ពលរដ្ឋខ្មែរដែលជាអ្នកគាំទ្ររូបលោក។
ប៉ុន្តែលោក ហ៊ុន សែន ព្រមានថា គុកត្រូវបានរៀបចំរួចជាស្រេចហើយសម្រាប់ទទួលមេបក្សប្រឆាំងរូបនេះនៅពេលឈានជើងជាន់ទឹកកម្ពុជាភ្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ