សហជីពថាលិខិតរបស់កម្មករណាហ្គាវើលដ៍ជាការរៀបចំរបស់ភាគីក្រុមហ៊ុន
សហជីពតំណាងកម្មករដែលកំពុងធ្វើការតវ៉ាទាមទារសិទ្ធិចូលបម្រើការងារនៅក្រុមហ៊ុនណាហ្គាវើលដ៍ បានច្រានចោលចំពោះលិខិតរបស់កម្មករណាហ្គាវើលដ៍ ថាមិនបានឆ្លុះបញ្ចាំងពីឆន្ទៈពិតប្រាកដរបស់ពួកគេ។ ការច្រានចោលនេះ គឺបន្ទាប់ពីក្រុមកម្មករដែលកំពុងធ្វើការនៅក្នុងក្រុមហ៊ុនណាហ្គាវើលដ៍ បានធ្វើលិខិតប្រឆាំងនឹងការតវ៉ារបស់អ្នកដែលត្រូវបញ្ឈប់ពីការងារកន្លងមក និងចាត់ទុកទង្វើរបស់កម្មករដែលតវ៉ានោះ ថាបានធ្វើឲ្យប៉ះពាល់ឆ្នាំងបាយបុគ្គលិកជាង៦០០០នាក់។
ចុះផ្សាយនៅថ្ងៃ៖
ស្តាប់ - ០២:០៦
ថ្លែងប្រាប់វិទ្យុបារាំងអន្តរជាតិ នៅថ្ងៃសៅរ៍ ទី១៥តុលា កញ្ញា ឈឹម ស៊ីថរ សហជីពតំណាងកម្មករណាហ្គាវើលដ៍ លើកឡើងថា នេះគឺជាការរៀបចំរបស់ក្រុមហ៊ុន ក្នុងករណីបុគ្គលិកប្តឹងជំទាស់នឹងសកម្មភាពបុគ្គលិកបែបនេះ។ ទោះយ៉ាងណាកញ្ញា ឈឹម ស៊ីថរ ក៏ទទួលស្គាល់ដែរថា បុគ្គលិកមួយចំនួនក៏មានគំនិតផ្សេង ផ្ទុយពីការទាមទាររបស់ក្រុមកម្មករដែលកំពុងតវ៉ានៅខាងក្រៅ។
បើតាមកញ្ញា ឈឹម ស៊ីថរ ការធ្វើលិខិតរបស់ក្រុមកម្មករពេលនេះ គឺក្រោមរូបភាពបំភិតបំភ័យ និងរងការគំរាមកំហែងពីសំណាក់ក្រុមហ៊ុនផ្ទាល់ ដោយតាមអ្វីដែលសហជីពរូបនេះ អះអាង មានកម្មករមួយចំនួនត្រូវបានក្រុមហ៊ុនហៅទៅសួរនាំ ម្តងជាពីរម្តង នៅពេលចេញមកតវ៉ាជាមួយក្រុមកម្មករនៅខាងក្រៅនេះ។
ការអះអាងរបស់កញ្ញា ឈឹម ស៊ីថរ ជាការឆ្លើយតបទៅនឹងលិខិតបដិសេធមួយរបស់ក្រុមកម្មករដែលកំពុងបម្រើការងារនៅខាងក្នុងក្រុមហ៊ុនណាហ្គាវើលដ៍។ នៅក្នុងលិខិត កាលពីថ្ងៃទី១៤តុលា ក្រុមកម្មករមួយចំនួនបានចេញមកប្រឆាំងនឹងសកម្មភាពតវ៉ាដែលកំពុងកើតមាន ហើយទាមទារឲ្យបញ្ឈប់ជាបន្ទាន់។ ក្រុមកម្មករដែលកំពុងបម្រើការងារនោះ បានចាត់ទុកសកម្មភាពរបស់ក្រុមអ្នកតវ៉ាថា ជាសកម្មភាពបង្កអស្ថេរភាព និងបំផ្លាញដំណើរការអាជីវកម្មរបស់ក្រុមហ៊ុន ដោយមិនខ្វល់ពីប្រយោជន៍របស់បុគ្គលិកដែលកំពុងបម្រើការងារ។
លើសពីនេះ ពួកគេអះអាងថា សកម្មភាពតវ៉ានោះ បានប៉ះពាល់ដល់ឆ្នាំងបាយបុគ្គលិកប្រមាណជាង៦០០០នាក់ ដែលកំពុងបម្រើការងារនៅក្រុមហ៊ុនណាហ្គាវើលដ៍។
យ៉ាងណាមិញ កញ្ញា ឈឹម ស៊ីថរ បញ្ជាក់ថា សកម្មភាពរបស់ក្រុមកម្មករតវ៉ានៅខាងក្រៅក្រុមហ៊ុន គឺជាការសម្តែងសិទ្ធិសេរីភាពបញ្ចេញមតិ ក្នុងការទាមទារយុត្តិធម៌ ដែលក្រុមកម្មករ និងសហជីពមួយចំនួន ត្រូវបានថៅកែក្រុមហ៊ុនល្បែងស៊ីសងមួយនេះបញ្ឈប់។
កាលពីថ្ងៃសុក្រ ទី១៤តុលា ក្រុមកម្មករប្រមាណជាង១០០នាក់ ក៏បានចេញមកតវ៉ាជាថ្មីនៅមុខក្រុមហ៊ុនណាហ្គាវើលដ៍៍ ដើម្បីទាមទាររកដំណោះស្រាយដែលពួកគេចង់បាន។ ក្នុងការតវ៉ានោះ ក្រុមកម្មករបានដង្ហែស៊ុមដែលមានឈ្មោះស្ថាប័នរដ្ឋមួយចំនួន ដោយធ្វើពិធីកាន់ទុក្ខ។ កញ្ញា ឈឹម ស៊ីថរ អះអាងថា ការធ្វើបែបនេះ ព្រោះពួកគេយល់ថាស្ថាប័នរដ្ឋទាំងនោះ បានបាត់វិញ្ញាណ មិនព្រមអើពើទៅនឹងលក្ខខណ្ឌទាមទារដែលកម្មករចង់បាន ខណៈដែលក្រុមកម្មករបានដាក់ញត្តិ សុំការអន្តរាគមន៍ដំណោះស្រាយជាច្រើនលើកច្រើនសា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ