ដំណាំស្រូវជាង១៩ម៉ឺនហិកតារងផលប៉ះពាល់ដោយទឹកជំនន់ ខណៈជាង៦ម៉ឺនហិកតារងការខូចខាត
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានគូសបញ្ជាក់ឲ្យដឹងថា គិតមកទល់នឹងពេលនេះ មានដំណាំស្រូវប្រមាណជាង ១៩ម៉ឺនហិកតាហើយបានរងផលប៉ះពាល់ដោយសារទឹកជំនន់ ខណៈជាង៦ម៉ឺនហិកតារងការខូចខាតទាំងស្រុង។ ផលប៉ះពាល់នេះ កើតឡើងខណៈដែលខេត្តស្ទើរតែទាំងអស់បានរងការជន់លិចដោយជំនន់ទឹកភ្លៀង។
ចុះផ្សាយនៅថ្ងៃ៖
ស្តាប់ - ០២:០៥
ទឹកជំនន់បាននិងកំពុងលិចលង់នៅតាមបណ្ដាខេត្តមួយចំនួនរបស់កម្ពុជា ចាប់តាំងពីឈានចូលដល់រដូវវស្សាមកម្លេះ។ ទឹកជំនន់នេះធ្វើឲ្យដំណាំកសិកម្មផ្សេងៗរងផលប៉ះពាល់ និងខ្លះទៀតរងការខូចខាត ជាពិសេសដំណាំស្រូវ។ ក្រៅពីធ្វើឲ្យដំណាំកសិកម្មខូចខាត ទឹកជំនន់ក៏បានធ្វើឲ្យប៉ះពាល់ទៅប្រជាពលរដ្ឋជាច្រើនគ្រួសារនិងសម្លាប់មនុស្ស ព្រមទាំងធ្វើឲ្យខូចខាតទ្រព្យសម្បត្តិផ្សេងៗ រួមទាំងហេដ្ឋារចនាសម្ព័ន្ធផ្លូវថ្នល់ជាដើម។
បើតាមលោក សុទ្ធ គឹមកុលមុន្នី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានបញ្ជាក់ប្រាប់វិទ្យុបារាំង RFI នៅថ្ងៃព្រហស្បតិ៍នេះថា មកទល់នឹងពេលនេះមានដំណាំស្រូវជាង ១៩ម៉ឺនហិកតាហើយ ត្រូវរងផលប៉ះពាល់ដោយសារទឹកជំនន់ ហើយជាង ៦ម៉ឺនហិកតាត្រូវរងការខូចខាតទាំងស្រុង។ ជាគ្នានេះ លោក សុទ្ធ គឹមកុលមន្នី បានបញ្ជាក់ទៀតថា ដំណាំស្រូវនឹងបន្តរងផលប៉ះពាល់ និងខូចខាតបន្ថែមទៀត ពីព្រោះទឹកជំនន់ដែលលិចលង់នៅតាមបណ្ដាខេត្តរបស់កម្ពុជានៅពេលនេះ មិនទាន់ស្រកនៅឡើយ។
ទាក់ទងជាមួយនឹងបញ្ហាគ្រោះទឹកជំនន់នេះ លោកនាយករដ្ឋមន្រ្តី ហ៊ុន សែន នៅក្នុងទិវាជាតិគ្រប់គ្រងគ្រោះមហន្តរាយ បានអំពាវនាវចំនួន៩ចំណុច ដោយនៅចំណុចទី៧ លោក ហ៊ុន សែន បានឲ្យក្រសួងសេដ្ឋកិច្ចនិងហិរញ្ញវត្ថុ ក្រសួងកសិកម្ម រុក្ខាប្រមាញ់និងនេសាទ និងគណៈកម្មាធិការជាតិគ្រប់គ្រងគ្រោះមហន្តរាយ បន្តពង្រឹងនិងពង្រីកប្រព័ន្ធស្បៀងបម្រុងរបស់កម្ពុជា ដើម្បីធានាថា ប្រជាជនរងគ្រោះនឹងត្រូវបានដោះស្រាយបញ្ហាសន្តិសុខស្បៀង មានគ្រាប់ពូជសម្រាប់ស្ដាការដាំដុះ និងមានសាច់ប្រាក់បម្រុងដើម្បីដោះស្រាយតម្រូវការផ្សេងទៀត ដែលមិនមែនជាស្បៀងនិងគ្រាប់ពូជ។
សម្រាប់ដំណាំកសិកម្ម ជាពិសេសដំណាំស្រូវដែលរងផលប៉ះពាល់និងខូចខាតដោយទឹកជំនន់វិញ កាលពីពេលថ្មីៗនេះ លោក ហ៊ុន សែន បានណែនាំឲ្យមន្រ្តីជំនាញត្រៀមយកគ្រាប់ពូជស្រូវទៅចែកជូនប្រជាកសិករ ក្នុងការដាំដុះដំណាំស្រូវឡើងវិញ ក្រោយពីទឹកស្រក។ នេះជាផ្នែកមួយដែលជួយស្រោចស្រង់វិស័យកសិកម្ម ជាពិសេសលើដំណាំស្រូវ ដែលរងផលប៉ះពាល់និងខូចខាតដោយគ្រោះទឹកជំនន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ