លោក សុខ ឥសាន៖ ការដកតំណែងលោក វេង សាខុន អាចមកពីមិនចុះទៅកន្លែងទឹកជំនន់
ទោះជាមិនទាន់មានការបញ្ជាក់ចំៗពីមូលហេតុនៃការដកតំណែងរដ្ឋមន្ត្រីក្រសួងកសិកម្មក៏ដោយ តែការដែលលោក វេង សាខុន មិនមានវត្តមាននៅកន្លែងទឹកជំនន់ ខណៈដែលលោកនៅក្រៅប្រទេស គឺជាហេតុផលមួយដែលត្រូវបានលើកឡើង ដោយ លោក សុខ ឥសាន អ្នកនាំពាក្យគណបក្សប្រជាជនកម្ពុជា។ ការយល់ឃើញ របស់លោក សុខ ឥសាន ក៏ផ្អែកលើសារជាសំឡេងរបស់ប្រមុខរដ្ឋាភិបាលដែលបញ្ជាឲ្យលោក អូន ព័ន្ធមុនីរ័ត្ន ជារដ្ឋមន្ត្រីស្តីទី ក្រសួងកសិកម្ម ដោះស្រាយជាបន្ទាន់ករណីទឹកជំនន់ក្នុងខេត្តមួយចំនួន ក្រោយពីដកតំណែង លោក វេង សាខុន ភ្លាមៗ កាលពីថ្ងៃទី៨តុលា។
ចុះផ្សាយនៅថ្ងៃ៖
ស្តាប់ - ០១:៥៥
ទោះជាយ៉ាងណា មានទាំងប្រតិកម្មគាំទ្រ និងប្រតិកម្មរិះគន់ ចំពោះការដកតំណែង លោក វេង សាខុន ពីរដ្ឋមន្ត្រីកសិកម្មយ៉ាងតក់ក្រហល់នេះ។ មតិខ្លះយល់ថា ល្មមដល់ពេលហើយ ដែលត្រូវដកចេញមន្ត្រីដែលអសកម្ម ពិសេសមិនអាចដោះស្រាយបានបញ្ហាទីផ្សារកសិកម្មរបស់កសិករ។
ប៉ុន្តែមតិខ្លះទៀតយល់ថា លោក វេង សាខុន មានគុណសម្បត្តិច្រើនតាំងពីលោកកាន់តំណែងមក គឺធ្វើឲ្យផលិតផលកសិកម្មកើនឡើងទាំងដំណាំដាំដុះ ស្រូវ និងការចិញ្ចឹមសត្វជាដើម។ ក្រុមអ្នករិះគន់នឹងការដកតំណែងរដ្ឋមន្ត្រីកសិកម្ម យល់ថា មកពីលោក វេង សាខុន ជារដ្ឋមន្ត្រីម្នាក់ដែលហ៊ានចេញមុខប្រឆាំងនឹងការនាំជ្រូកចូលពីប្រទេសជិតខាង ដើម្បីការពារកសិករខ្មែរដែលចិញ្ចឹមសត្វក្នុងស្រុកឲ្យមានទីផ្សារ។
ទោះជាយ៉ាងណា សម្រាប់ លោក សុខ ឥសាន បញ្ហានេះជារឿងចាស់ទេ ចំណែករឿងថ្មីដែលឈានដល់ការសម្រេចដកតំណែងដោយឆន្ទានុសិទ្ធិរបស់ប្រមុខបក្សកាន់អំណាចនៅពេលនេះ គឺ ដោយសារ លោក វេង សាខុន អសកម្មក្នុងពេលដែលប្រជាជនកំពុងរងគ្រោះទឹកជំនន់។
សម្រាប់ លោក មាស នី អ្នកស្រាវជ្រាវពីការអភិវឌ្ឍសង្គម យល់ថា ប្រសិនបើការដកតំណែង លោក វេង សាខុន ដោយសារតែហ៊ានចេញមុខការពារកសិករខ្មែរ គឺជាគំរូមិនល្អសោះឡើយ។ លោកយល់ថា ប្រសិនបើដកដោយសារតែមិនមានវត្តមាននៅកន្លែងទឹកជំនន់ ខណៈ លោក វេង សាខុន នៅក្រៅប្រទេស គឺក៏ជាហេតុលផលមួយដែរ តែមានចំណោទត្រង់ថា តើលោក វេង សាខុន ជាអ្នកទទួលខុសត្រូវតែម្នាក់ឯងបញ្ហាទឹកជំនន់ ឬយ៉ាងណា?
ក៏ប៉ុន្តែគេនៅចាំបានថា លោក វេង សាខុន ត្រូវបាន លោក ហ៊ុន សែន ស្តីបន្ទោសជាសាធារណៈថា ជារដ្ឋមន្ត្រីដែលមិនព្រមសហការធ្វើការជាមួយក្រសួងផ្សេងទៀត តួយ៉ាង ជាមួយក្រសួងសេដ្ឋកិច្ច និងក្រសួងធនធានទឹកជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ