គណបក្សតូចៗចាប់ដៃគូនយោបាយដើម្បីចូលរួមការបោះឆ្នោតឆ្នាំក្រោយ
គណបក្សនយោបាយដែលទទួលបានសំឡេងគាំទ្រតិចតួចកាលពីការបោះឆ្នោតឃុំ សង្កាត់ កន្លងមកនេះ កំពុងស្វែងរកចាប់ដៃគូនយោបាយជាមួយគណបក្សគីឡូប្រហាក់ប្រហែលគ្នា ដើម្បីចូលរួមការបោះឆ្នោតថ្នាក់ជាតិនៅឆ្នាំក្រោយនេះ។ ចរន្តរួបរួមរវាងគណបក្សតូចៗនេះ បានផុសឡើង បន្ទាប់ពីគម្រោងរួបរួមជាសម្ព័ន្ធរវាងគណបក្សនយោបាយច្រើនរួមបញ្ចូលគ្នាមិនអាចទៅរួច។
ចុះផ្សាយនៅថ្ងៃ៖
ស្តាប់ - ០២:១៣
យុទ្ធសាស្ត្រថ្មីនៃការស្វែងរកដៃគូនយោបាយ ឬការរួបរួមគ្នាតែពីរគណបក្សដែលអះអាងថាមាននិន្នាការប្រហាក់ប្រហែលគ្នានេះ គឺបានផុសឡើងជាបន្តបន្ទាប់នៅរយៈពេលចុងក្រោយនេះ។
គណបក្សខ្មែររួបរួមជាតិរបស់លោក ញឹក ប៊ុនឆៃ ដែលចាស់វស្សាយូរហើយនោះ កំពុងស្វែងរកការរួបរួមគ្នាជាមួយគណបក្សកម្ពុជានិយមរបស់ លោក យ៉ែម បុញ្ញរិទ្ធ ដែលទើបបង្កើតឡើងមុនការបោះឆ្នោតឃុំ សង្កាត់ ឆ្នាំ២០២២។ គណបក្សទាំងពីរនេះទទួលបានអាសនៈក្រុមប្រឹក្សាសរុបតែចំនួន១៤នាក់ប៉ុណ្ណោះគឺគណបក្សខ្មែររួបរួមជាតិទទួលបាន១៣អាសនៈ និងគណបក្សកម្ពុជានិយមទទួលបាន១អាសនៈ ដោយពុំទទួលបានតំណែងជាមេឃុំឬចៅសង្កាត់នោះឡើយ។
លោក ញឹក ប៊ុនឆៃ ប្រធានគណបក្សខ្មែររួបរួមជាតិ អះអាងថា គណបក្សទាំងពីរនេះ មាននិន្នាការ«និយមកណ្តាល»ដូចគ្នា គឺមិនផ្អៀងទៅលោកខាងលិច និងមិនប្រឆាំងចិន។ បើតាមលោក ញឹក ប៊ុនឆៃ ការរួបរួមរវាងគណបក្សទាំងពីរនេះគឺជ្រកក្រោមស្លាកគណបក្សខ្មែររួបរួមជាតិជាជំហានដំបូងដោយសារតែការបោះឆ្នោតជិតមកដល់មិនអាចធ្វើសមាជដើម្បីដូរឈ្មោះ និងស្លាកគណបក្សទាន់ពេល។ តែថាជំហានបន្ទាប់គណបក្សនេះទំនងនឹងកែសម្រួលលក្ខខណ្ឌមួយចំនួនព្រមទាំងឈ្មោះគណបក្សផងដែរ។
ជាការកត់សំគាល់ ចន្តររួបរួមរវាងគណបក្សតូចៗនេះ បានផុសឡើង បន្ទាប់ពីគម្រោងរួបរួមជាសម្ព័ន្ធរវាងគណបក្សនយោបាយច្រើនរួមបញ្ចូលគ្នា ដែលផ្តើមគំនិតដោយគណបក្សប្រជាធិបតេយ្យមូលដ្ឋានមិនអាចទៅរួច។ មិនអាចទៅរួចដោយសារតែគណបក្សភាគច្រើនមិនអាចរំលាយខ្លួនមកជ្រកក្រោមគណបក្សណាមួយ។
ប៉ុន្តែនៅទីបំផុតគណបក្សឆន្ទៈខ្មែររបស់លោក គង់ ម៉ូនីកា បានសម្រេចចិត្តមកជ្រកក្រោមស្លាកគណបក្សភ្លើងទៀនជាបក្សប្រឆាំងដែលគេមើលឃើញថាមានសក្តានុពលច្រើនបក្សដទៃទៀត ខណៈគណបក្សកែទម្រង់កម្ពុជារបស់លោក អ៊ូ ច័ន្ទរ័ត្ន និងគណបក្សជាតិនិយមរបស់ មេធាវី ផែង ហេង អះអាងថាបានឈានដល់ដំណាក់កាលជជែកគ្នារកការច្របាច់បញ្ចូលគ្នាជាគណបក្សតែមួយ សម្រាប់ការបោះឆ្នោតឆ្នាំ២០២៣។
ចំណែក គណបក្សប្រជាធិបតេយ្យមូលដ្ឋាន ដែលជាអ្នកផ្តើមគំនិតក្នុងការរួបរួមនោះ ទំនងនឹងមិនទៅជ្រកក្រោមគណបក្សនយោបាយណាមួយទេ ខណៈគណបក្សនេះចង់បានជម្រើសពីរផ្សេងទៀត គឺការរួមគ្នាជាបក្សតែមួយ និងការចែកមណ្ឌលគ្នាឈរឈ្មោះបោះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ