លោក គុណ ញឹម៖ រថយន្តចង្កូតស្តាំចុះបញ្ជីជិត៤ពាន់គ្រឿងមិនទាន់បង់ពន្ធ ខណៈថ្ងៃឱសាទវាទជិតមកដល់
នៅថ្ងៃទី៨ ខែតុលាខាងមុខ គឺជាថ្ងៃឱសានវាទនៃការប្រមូលពន្ធអាករលើយានយន្តចង្កូតស្តាំដែលមានស្រាប់ក្នុងប្រទេស។ តាមស្ថិតិរបស់អគ្គនាយកដ្ឋានគយ គិតត្រឹមថ្ងៃចន្ទម្សិលមិញនេះ គឺមានរថយន្តចង្កូតស្តាំចុះបញ្ជីជិត៤ពាន់គ្រឿងនៅមិនទាន់បង់ពន្ធ។ ជាតួលេខសេសសល់ច្រើន ខណៈអគ្គនាយករដ្ឋានគយ ថានឹងពិចារណាពិនិត្យលទ្ធភាពសុំគោលការណ៍ពីរដ្ឋាភិបាលដើម្បីពន្យារពេលមួយរយៈទៀត។
ចុះផ្សាយនៅថ្ងៃ៖
ស្តាប់ - ០២:២១
អគ្គនាយកគយដ្ឋាននិងរដ្ឋាករកម្ពុជាបានរៀបចំសន្និសិទកាសែត នៅថ្ងៃទី៥ ខែតុលា ឆ្នាំ២០២២ ប្រកាសលទ្ធផលនៃការងារប្រមូលពន្ធអាករលើរថយន្តគ្មានពន្ធមានស្រាប់ក្នុងប្រទេសកម្ពុជា។ លោក គុណ ញឹម អគ្គនាយកគយនិងរដ្ឋាករ ឱ្យដឹងថា គិតត្រឹមល្ងាចថ្ងៃទី៤ ខែតុលាម្សិលមិញ រថយន្តចង្កូតស្តាំគ្រប់ប្រភេទចំនួន ៩៨១៤គ្រឿង ដែល៩០% ជាប្រភេទរថយន្តដឹកបែន ត្រូវបានម្ចាស់យកមកចុះបញ្ជីបង់ពន្ធ។ តែក្នុងនោះគឺ បានបំពេញកាតព្វកិច្ចបង់ពន្ធអាករត្រឹមតែ ៥៩៧៦គ្រឿង ដែលគិតជាប្រាក់ពន្ធអាករមានចំនួន ១៩.៧៣ លានដុល្លារ។ ពោលគឺ នៅមានរថយន្តចង្កូតស្តាំសេសសល់ដែលបានចុះបញ្ជីហើយ តែម្ចាស់ខកខានមិនបានមកបង់ពន្ធអាករចំនួន ៣៨៣៨គ្រឿង។
នៅសល់តែ៣ថ្ងៃទៀតប៉ុណ្ណោះ ថ្ងៃឱសានវាទយុទ្ធនាការប្រមូលពន្ធលើយានយន្តគ្មានពន្ធនិងអាករនាំចូលដែលមានស្រាប់ក្នុងប្រទេសនឹងមកដល់។ លោក គុណ ញឹម បារម្ភថា រថយន្តចុះបញ្ជីមិនទាន់បង់ពន្ធជិត៤ពាន់គ្រឿងទាំងនោះ ច្បាស់ណាស់នឹងគ្មានពេលគ្រប់គ្រាន់មកធ្វើការបង់ពន្ធទាន់ពេលវេលាកំណត់នោះឡើយ។
ជាមួយនឹងក្តីបារម្ភនោះ អគ្គនាយករដ្ឋានគយ បញ្ជាក់ថានឹងពិចារណាពិនិត្យលទ្ធភាពសុំគោលការណ៍ពីរដ្ឋាភិបាលពន្យារពេលបន្ថែមទៀត ដើម្បីទុកពេលអោយម្ចាស់យានយន្តដែលខកខានបង់ពន្ធជិត ៤ពាន់គ្រឿងនោះ មានលទ្ធភាពមកបង់ពន្ធ ដោយហេតុផលពេលវេលារដូវកាលភ្លៀង ម្ចាស់យានយន្តបាត់បង់ចំណូលរកស៊ីអាជីវកម្ម។
ក្រៅពីនេះ អង្គភាពគយអះអាងថាកម្ពុជាលែងមានការនាំចូលយានយន្តកែច្នៃខុសច្បាប់ទៀតហើយ បន្ទាប់ពីមានការរិតបន្តឹងការការពារនៅតាមច្រកព្រំដែន ជាពិសេសគឺច្រកព្រំដែន កម្ពុជា-ថៃ។ នេះបើតាមការបញ្ជាក់ពីលោក គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា។
សូមជម្រាបថា អគ្គនាយករដ្ឋានគយកំពុងតែអនុវត្តយុទ្ធនាការប្រមូលពន្ធអាករលើរថយន្តគ្មានពន្ធ មានស្រាប់ក្នុងប្រទេស ដែលជាការអនុញ្ញាតលើកចុងក្រោយរបស់រដ្ឋាភិបាល ឱ្យម្ចាស់រថយន្តចង្កូតស្តាំគ្រប់ប្រភេទ បង់ពន្ធអាករ ដោយមិនតម្រូវឱ្យកែចង្កូត បន្ទាប់ពេលទុកពេល៣ខែ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ