មនុស្សជាង១ម៉ឺននាក់ត្រូវបានឃាត់ខ្លួន ក្នុងយុទ្ធនាការបង្ក្រាបល្បែងស៊ីសងខុសច្បាប់
យ៉ាងហោចណាស់មានមនុស្សជាង១ម៉ឺននាក់ត្រូវបានឃាត់ខ្លួនជាបន្តបន្ទាប់ នៅក្នុងយុទ្ធនាការបង្ក្រាបល្បែងស៊ីសងខុសច្បាប់ជាង ៩.០០០ ទីតាំង រយៈពេល ១៧ ថ្ងៃ គិតចាប់ពីថ្ងៃទី១៥ ខែកញ្ញា ដល់ថ្ងៃទី ១ ខែតុលាម្សិលមិញ។ ក្នុងចំណោមមនុស្សដែលត្រូវបានឃាត់ខ្លួននេះ គឺមានមួយចំនួន ត្រូវបានធ្វើការអប់រំ និងធ្វើកិច្ចសន្យា ខណៈមនុស្សមួយចំនួនទៀត ត្រូវបញ្ជូនទៅតុលាការ ដើម្បីចាត់ការតាមនីតិវិធីច្បាប់។
ចុះផ្សាយនៅថ្ងៃ៖
ស្តាប់ - ០១:៥៣
នៅទូទាំងប្រទេស មានទីតាំងល្បែងស៊ីសង ខុសច្បាប់គ្រប់ប្រភេទ ប្រមាណជាង ៩.០០០ ទីតាំងត្រូវបានសមត្ថកិច្ចចុះត្រួតពិន្យ និងមនុស្សជាង ១ម៉ឺន ៣ពាន់នាក់ ត្រូវបានឃាត់ខ្លួន។
លោក សុខ ផល ប្រធានក្រុមការងារបង្ក្រាបការលេងល្បែងស៊ីសង ខុសច្បាប់គ្រប់ប្រភេទ បានប្រាប់កាសែតក្នុងស្រុកថា ក្នុងចំណោមមនុស្សចំនួន ១៣.០៣២ នាក់ ដែលត្រូវបានឃាត់ខ្លួន ក្នុងនោះ ចំនួន ១២.៧៨៦ នាក់ ត្រូវបានធ្វើការអប់រំ និងធ្វើកិច្ចសន្យា ខណៈចំនួន ២៤៦ នាក់ ត្រូវបញ្ជូនទៅតុលាការ។
បើតាម សុខ ផល រដ្ឋលេខាធិការក្រសួងមហាផ្ទៃ ខេត្តព្រះសីហនុ គឺជាគោលដៅចំបងមួយក្នុងការត្រួតពិន្យសកម្មភាពល្បែងស៊ីសងខុសច្បាប់ និង ស្វែងរកបទល្មើសជួញដូរមនុស្ស បទល្មើសសម្អាតប្រាក់ ឬលាងលុយកខ្វក់ជាដើម។
លោក អះអាងថា ម្ចាស់ទីតាំងខ្លះបានបញ្ឈប់សកម្មភាពដោយខ្លួនឯង ក៏ប៉ុន្តែនៅមានសេសសល់ទីតាំងតិចតួចមិនទាន់បញ្ឈប់។
លោក សុខ ផល បានគូសបញ្ជាក់ថា ខេត្តព្រះសីហនុគឺជាទីតាំងគំរូ ក្នុងការបោសសម្អាតបទល្មើសទាំងអស់នោះ។
សូមបញ្ជាក់ថា លោក ស ខេង រដ្ឋមន្ត្រីក្រសួងមហាផ្ទៃ កាលពីថ្ងៃទី១៤ ខែកញ្ញា បានចេញលិខិតបង្គាប់ការមួយចាត់ឲ្យលោក សុខ ផល រដ្ឋលេខាធិការក្រសួងមហាផ្ទៃ ដឹកនាំក្រុមការងារដើម្បីបង្ក្រាបល្បែងស៊ីសងខុសច្បាប់គ្រប់ប្រភេទនៅទូទាំងប្រទេស។ ប៉ុន្មានថ្ងៃក្រោយមកលោកនាយករដ្ឋមន្ត្រី ហ៊ុន សែន ក៏បានចេញមកព្រមានដកតំណែងមន្ត្រីមូលដ្ឋានណា ដែលមិនមានឆន្ទៈបង្រ្កាបល្បែងស៊ីសងខុសច្បាប់ ដែលកំពុងកើតមានយ៉ាងអណាធិបតេយ្យនោះ។ ទោះជាយ៉ាងណា អ្នកតាមដានសង្គម មិនចង់ឃើញ ចំណាត់ការនេះអាចអនុវត្តន៍ត្រឹមមួយភ្លើងចំបើង ដូចចំណាត់ការមួយចំនួនកន្លងមក ដែលរដ្ឋាភិបាលធ្លាប់បានដាក់ចេញនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ