ក្រសួងការងារ៖ បញ្ហាជាប់គាំងនៅណាហ្គាវើលដ៍ដោយសារភាគីវិវាទគ្មានឆន្ទៈដោះស្រាយ
ក្រសួងការងារបានចេញសេចក្តីបំភ្លឺមួយនៅថ្ងៃសៅរ៍ម្សិលមិញនេះ ចំពោះការចោទប្រកាន់ថា ក្រសួងមានភាពអសកម្មក្នុងការដោះស្រាយបញ្ហាវិវាទការងារនៅក្រុមហ៊ុនណាហ្គាវើលដ៍។ តាមក្រសួងការងារ កិច្ចប្រជុំដោះស្រាយវិវាទការងារនេះនឹងបន្តធ្វើឡើងជាលើកទី១៨ នៅថ្ងៃទី៦ ខែតុលាខាងមុខ និងដោយរុញច្រានឲ្យភាគីវិវាទទាំងពីរប្តឹងទៅតុលាការដើម្បីជម្រះសេចក្តី ប្រសិនបើនៅតែមិនអាចរកច្រកចេញបានទៀតនោះ។
ចុះផ្សាយនៅថ្ងៃ៖
ស្តាប់ - ០២:២៦
នៅក្នុងសេចក្តីបំភ្លឺកម្រាស់៣ទំព័ររបស់ក្រសួងការងារមានរៀបរាប់ពីសវតានៃវិវាទផ្តើមចេញ នៅឆ្នាំ២០២១ក្រុមហ៊ុនណាហ្គាវើលដ៍ បានបញ្ឈប់បុគ្គលិកជាង១៦២៩នាក់ ក្រោមហេតុផលក្រុមហ៊ុនប៉ះពាល់សេដ្ឋកិច្ចដោយវិបត្តិកូវីដ១៩។
ក្រសួងការងារបានរៀបរាប់នៅក្នុងសេចក្តីបំភ្លឺនោះថា ក្រសួងការងារបានណែនាំឱ្យសហជីពអនុវត្តដោះស្រាយតាមនិតិវិធីដែលច្បាប់បានកំណត់ ប្តឹងទៅតុលាការដោយឆ្លងកាត់ក្រុមប្រឹក្សាអាជ្ញាកណ្តាល ប៉ុន្តែសហជីពបានសម្រេចរំលងចោលដំណាក់កាលនោះ មកធ្វើកូដកម្មខុសច្បាប់ទៅវិញ។ ក្រសួងការងារយល់ឃើញថា នោះជាការប្រព្រឹត្តិខុសពីច្បាប់ការងារ រហូតនាំឱ្យមានករណីចោទបទព្រហ្មទណ្ឌមកលើមេដឹកនាំសហជីពជាដើម តែក្រសួងនៅតែបន្តសម្របសម្រួលជាមួយក្រសួងយុត្តិធម៌ឱ្យមេដឹកនាំសហជីពមានទោសទាំងនោះបាននៅក្រៅឃុំ។
ក្រសួងការងារបន្តអះអាងថា បញ្ហាដែលបន្តជាប់គាំងនៅក្នុងការដោះស្រាយវិវាទការងារនៅក្រុមហ៊ុមណាហ្គាវើលរយៈពេល១ឆ្នាំមកនេះ មិនមែនជាការព្រងើយកន្តើយរបស់ក្រសួងឡើយតែ ដោយសារដៃគូភាគីវិវាទគ្មានឆន្ទៈក្នុងការអនុវត្តនិតិវិធីដោះស្រាយវិវាទការងាររួមឱ្យបានត្រឹមត្រូវ។ ហើយប្រសិនបើនៅតែមិនអាចរកច្រកចេញបានទៀតនោះ ដៃគូវិវាទទាំងពីរគួរប្តឹងបន្តទៅតុលាការ ដើម្បីជម្រះសេចក្តីឱ្យស្របតាមច្បាប់ការងារ។ នេះ បើតាមក្រសួងការងារ។
កាលពីថ្ងៃទី២៨ ខែតុលា ឆ្នាំ២០២២កន្លងទៅក្នុងសន្និសិទសារព័ត៌មានរបស់ក្រុមសហជីពតំណាងកម្មករតវ៉ាវិវាទណាហ្គាវើលដ៍ដែលមានការចូលរួមរបស់សហភាពការងារ សហព័ន្ធ សហជីព សមាគម សង្គមស៊ីវិល បានបញ្ជាក់ពីជំហរដើមក្នុងការបន្តធ្វើកូដកម្មទាមទាររកដំណោះស្រាយ ដោយជាជំហានដំបូង ក្រុមកម្មករគ្រោងរៀបចំវេទិកាសាធារណៈ ដោយអញ្ជើញភាគីពាក់ព័ន្ធទាំងអស់ មកជជែករកដំណោះស្រាយដែលជាប់គាំង។
គួរជ្រាបថា គិតត្រឹមពេលនេះ នៅមានអតីតបុគ្គលិកចំនួន ២៤៤នាក់ បានយល់ព្រមទទួលយកប្រាក់សំណងបញ្ចប់កិច្ចសន្យាការងារជាមួយក្រុមហ៊ុន ដោយនៅមានសល់បុគ្គលិកចំនួន១២៩នាក់ទៀត បន្តមិនទទួលយកប្រាក់សំណងបញ្ចប់វិវាទ។ ចំណែកស្ថានការណ៍កូដកម្មតវ៉ានៅតែបន្តធ្វើឡើង ដោយការបោះតង់ ចម្អិនម្ហូប នៅខាងមុខក្រុមហ៊ុនតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ