ពលរដ្ឋខ្មែរនៅក្រៅប្រទេសទាមទារឲ្យដោះលែងអ្នកទោសមនសិកា
ដូចរាល់ដងដែរ ពលរដ្ឋខ្មែរនៅក្រៅប្រទេសបានធ្វើបាតុកម្មជាថ្មីទៀតនៅថ្ងៃទី២៣កញ្ញា ប្រឆាំងវត្តមានប្រមុខរដ្ឋាភិបាលកម្ពុជាដែលទៅចូលរួមមហាសន្និបាតអង្គការសហប្រជាជាតិ ដោយទាមទារឲ្យដោះលែងអ្នកទោសមនសិកានៅកម្ពុជា។ ក៏ប៉ុន្តែអ្នកនាំពាក្យគណបក្សកាន់អំណាច ចាត់ទុកថា បាតុកម្មនេះមិនមានឥទ្ធិពលអ្វីមកលើរដ្ឋាភិបាលកម្ពុជានោះឡើយ ហើយគ្មានប្រយោជន៍អ្វីដល់ប្រទេសជាតិនោះដែរ តែធ្វើឲ្យខូចមុខមាត់ខ្មែរនៅលើឆាកអន្តរជាតិទៅវិញទេ។
ចុះផ្សាយនៅថ្ងៃ៖
ស្តាប់ - ០២:១៥
ពលរដ្ឋខ្មែរនៅក្រៅប្រទេសរាប់រយនាក់បានធ្វើបាតុកម្មរួមគ្នាជាមួយនឹងជនជាតិភូមា នៅថ្ងៃទី២៣កញ្ញា នៅក្បែរទីស្នាក់ការអង្គការសហប្រជាជាតិ ក្នុងបុរីញូវយ៉ក ជាទីដែលមេដឹកនាំរដ្ឋាភិបាលនៃប្រទេសនានាឡើងថ្លែងការណ៍ សម្រាប់មហាសន្និបាតអង្គការសហប្រជាជាតិ លើកទី៧៧។
ដូចរាល់ដងដែរ ពលរដ្ឋខ្មែរដែលតាំងខ្លួនជាអ្នកប្រឡាញ់ប្រជាធិបតេយ្យបាននាំគ្នាធ្វើបាតុកម្មនៅក្រៅរបងអង្គការសហប្រជាជាតិ ដើម្បីទាមទារឲ្យការស្តារលិទ្ធិប្រជាធិបតេយ្យ សិទ្ធិមនុស្ស គោរពនីតិរដ្ឋ និងដោះលែងអ្នកទោសមនសិកាទាំងអស់ដោយឥតលក្ខណ្ឌ។ តែបាតុកម្មរបស់ពលរដ្ឋខ្មែរប្រឆាំងវត្តមានលោកនាយករដ្ឋមន្ត្រីលើកនេះ គឺមានចំនួនតិចជាងលើកមុនៗ ខណៈលោកប្រមុខរដ្ឋាភិបាលខ្មែរក៏មិនបានប្រមូលផ្តុំអ្នកគាំទ្រដូចរាល់ដង។
លោក សម រង្ស៊ី ប្រមុខបក្សប្រឆាំងដែលស្ថិតនៅលើទឹកដីសហរដ្ឋអាមេរិកតាំងពីមុនពេល លោក ហ៊ុន សែន ទៅដល់ គឺមិនបានបង្ហាញវត្តមានជាមួយពលរដ្ឋដែលធ្វើបាតុកម្មនោះឡើយ ខណៈដែលមនុស្សស្និទនឹងលោកដូចជា លោក ម៉ែន សុថាវរិន្ទ លោក ឡុង រី លោក នុត រំដួល ជាដើម បានទៅចូលរួមបាតុកម្មជាមួយពលរដ្ឋខ្មែរដែរ។
លោក មាជ សុវណ្ណរ៉ា ជាតំណាងពលរដ្ឋខ្មែរម្នាក់ដែលបានឡើងរាយការណ៍ពីស្ថានភាពប្រទេសកម្ពុជានៅចំពោះមុខសន្និបាតអង្គការសហប្រជាជាតិកាលពីសប្តាហ៍មុន បានប្រាប់វិទ្យុបារាំងអន្តរជាតិRFIថា បាតុកម្មរបស់ពលរដ្ឋខ្មែរនេះគឺជាការសំដែងមតិដែលច្បាប់សហរដ្ឋអាមេរិកអនុញ្ញាត។
ពលរដ្ឋខ្មែរសញ្ជាតិអាមេរិកាំងរូបនេះថ្លែងថា ការដែលពលរដ្ឋខ្មែរធ្វើបាតុកម្មនេះគឺដោយសារតែពួកគេចង់ឃើញប្រទេសកម្ពុជាមានការគោរពសិទ្ធិមនុស្ស អ្នកនយោបាយមានសេរីភាពស្មើគ្នាចូលចូលរួមប្រកួតប្រជែង ហើយមិនត្រូវបានគំរាមកំហែង ឬចាប់ដាក់ពន្ធនាគារ។
ក៏ប៉ុន្តែលោក សុខ ឥសាន អ្នកនាំពាក្យគណបក្សប្រជាជនកម្ពុជា ចាត់ទុកថា បាតុកម្មនេះ មិនមានឥទ្ធិពលអ្វីមកលើរដ្ឋាភិបាលកម្ពុជានោះឡើយ ហើយគ្មានប្រយោជន៍អ្វីដល់ប្រទេសជាតិទេ តែធ្វើឲ្យខូចមុខមាត់ខ្មែរនៅលើឆាកអន្តរជាតិទៅវិញទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ