លោក ហ៊ុន សែន គ្មានគម្រោងជួបអ្នកគាំទ្រ ខណៈក្រុមប្រឆាំងក៏គ្មានគម្រោងធ្វើបាតុកម្ម
ប្រមុខរដ្ឋាភិបាលកម្ពុជា ប្រកាសថា លោកមិនមានគម្រោងជួបសំណេះសំណាលជាមួយក្រុមអ្នកគាំទ្រនៅសហរដ្ឋអាមេរិក និងកាណាដា ដូចរាល់ដងទេ នៅពេលដែលលោកទៅទស្សនកិច្ចនៅទីក្រុងញូយ៉កនៅសប្តាហ៍នេះ។ ការដែលលោក ហ៊ុន សែន គ្មានគម្រោងប្រមូលផ្តុំអ្នកគាំទ្រនៅក្រៅប្រទេសនេះ គឺនៅខណៈដែលគម្រោងបាតុកម្មរបស់ក្រុមប្រឆាំងនៅក្រៅប្រទេសក៏មិនទាន់ឃើញលេចឭនៅឡើយ បើទោះបីជា លោក សម រង្ស៊ី បានទៅដល់សហរដ្ឋអាមេរិកច្រើនថ្ងៃហើយនោះ។
ចុះផ្សាយនៅថ្ងៃ៖
ស្តាប់ - ០២:០៧
ជារឿងចម្លែកមួយដែរ ដែលនាយករដ្ឋមន្ត្រីកម្ពុជា សូមការអធ្យាស្រ័យពីសំណាក់ពលរដ្ឋខ្មែរនៅសហរដ្ឋអាមេរិក និងកាណាដា ដោយសារតែលោកមិនអាចរៀបចំការជួបជុំជាមួយក្រុមអ្នកគាំទ្រ ដូចរាល់ដង នៅពេលដែល លោក ហ៊ុន សែន បានទៅទស្សនកិច្ចនៅក្រៅប្រទេស ពិសេសនៅអាមេរិក និងនៅអឺរ៉ុប។
លោកនាយករដ្ឋមន្ត្រី ហ៊ុន សែន ត្រូវចេញដំណើរទៅកាន់ទឹកដីសហរដ្ឋអមេរិកជាលើកទី២នៅឆ្នាំនេះ ដើម្បីចូលរួមមហាសន្និបាតអង្គការសហប្រជាជាតិលើកទី៧៧ នាទីក្រុងញូយ៉ក ចាប់ពីថ្ងៃ២១ដល់២៣កញ្ញា។ បន្ទាប់ពីនោះ លោក នឹងបន្តដំណើរទៅទស្សនកិច្ចផ្លូវការនៅប្រទេសគុយបា ព្រមទាំងបន្តដំណើរទៅទីក្រុងតូត្យូប្រទេសជប៉ុនដើម្បីចូលរួមបុណ្យសព លោក ស៊ិនហ្សូ អាបេអតីតនាយករដ្ឋមន្ត្រីជប៉ុន ដែលត្រូវគេបាញ់សម្លាប់។ នៅគុយបា លោក ហ៊ុន សែន មានគម្រោងជួបនិស្សិតខ្មែរនៅទីនោះ។ នេះបើតាមក្រសួងការបរទេសកម្ពុជា។
ប៉ុន្តែលោកប្រមុខរដ្ឋាភិបាល បានគូសបញ្ជាក់តាមហ្វេសប៊ុកថា មូលហេតុដែលលោកមិនអាចរៀបចំការជួបពលរដ្ឋខ្មែរនៅសហរដ្ឋអាមេរិក និងកាណាដា ដោយការស្នាក់នៅទីក្រុងញូយ៉កមានរយៈពេលខ្លី និងមានកម្មវិធីច្រើន។ ម្យ៉ាងទៀតលោកក៏ទើបតែជួបគ្នាកាលពីខែឧសភា២០២២កន្លងទៅនៅទីក្រុងវ៉ាស៊ីនតោនហើយដែរ។
ជំនួបជាមួយពលរដ្ឋខ្មែរនៅទីក្រុងវ៉ាស៊ីនតោនកាលពីជាង៤ខែមុន ដែលអ្វីគេនៅចាំបានគឺមានរឿងហេតុគប់ស្បែកជើងមួយបានកើតឡើងពីសំណាក់ពលរដ្ឋខ្មែរម្នាក់ដែលទៅគាំទ្រលោក ហ៊ុន សែន។ កាលណោះ លោក ហ៊ុន សែន បានប្រតិកម្មខ្លាំងៗ និងរុញឲ្យសហរដ្ឋអាមេរិកទទួលខុសត្រូវចំពោះករណីនេះ។
ដោយឡែកសម្រាប់ក្រុមប្រឆាំងវិញក៏ចម្លែកដែរ ដែលមិនទាន់ឃើញមានការប្រកាសពីគម្រោងបាតុកម្មប្រឆាំងលោក ហ៊ុន សែន ដូចរាល់ដង ខណៈដែល លោក សម រង្ស៊ី បានទៅដល់ទឹកដីសហរដ្ឋអាមេរិកច្រើនថ្ងៃមកនេះ។ តែនៅសហរដ្ឋអាមេរិក ប្រមុខបក្សប្រឆាំងកម្ពុជា បានធ្វើការបរិហារជាបន្តបន្ទាប់មកលើក្រុមគ្រួសារ លោក ហ៊ុន សែន ពិសេសប្រឆាំងផែនការផ្ទេរអំណាចពីឳពុកទៅកូន និងប្រកាសពីផែនការរំដោះប្រទេសកម្ពុជាចេញពីគ្រួសារត្រកូលហ៊ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ