លោក ហ៊ុន សែន ព្រមានបក្សនយោបាយកុំឲ្យយកអ្វីដែលបានដោះស្រាយធ្វើជាអាវុធរកសន្លឹកឆ្នោត
ប្រមុខគណបក្សកាន់អំណាចនៅថ្ងៃអង្គារនេះ បានព្រមានគណបក្សនយោបាយនានាកុំឲ្យយកករណីពលរដ្ឋនៅតំបន់រមនីយដ្ឋានអង្គរដែលត្រូវជម្លៀសចេញនោះ មកធ្វើជាអាវុធវាយប្រហាររដ្ឋាភិបាល ដើម្បីរកសន្លឹកឆ្នោត។ ការព្រមាននេះ ដែលបើតាមលោកនាយករដ្ឋមន្ត្រី ហ៊ុន សែន គឺដោយសារតែមានអ្នកនយោបាយខ្លះនៅពីក្រោយពលរដ្ឋមួយចំនួន ដែលនៅមិនទាន់ព្រមចាកចេញពីតំបន់នោះ។
ចុះផ្សាយនៅថ្ងៃ៖
ស្តាប់ - ០២:០៦
ថ្លែងចេញពីតំបន់រុនតាឯក ស្រុកបន្ទាយស្រី ខេត្តសៀមរាប ប្រមុខរដ្ឋាភិបាលកម្ពុជា បានអះអាងថា ការដោះស្រាយជូនប្រជាជនដែលត្រូវជម្លៀសចេញពីតំបន់អង្គរឲ្យមករស់នៅតំបន់រុនតាឯកគឺជាតម្រូវការរបស់ជាតិ។ គ្រាន់តែដោះស្រាយមួយប្រិបនៅព្រឹកនេះ លោក ហ៊ុន សែន គណនាឃើញថាត្រូវប្រើប្រាស់ថវិកាអស់ជាង១០លានដុល្លារទៅហើយ ខណៈដែលពលរដ្ឋដែលបានមករស់នៅតាមគោលនយោបាយរបស់រដ្ឋសរុបកើនដល់៥៩៤គ្រួសារ ក្នុងចំណោមពលរដ្ឋ១១១៧គ្រួសារ ដែលកំពុងដំណើរការចាប់ឆ្នោត។
បើតាមប្រមុខរដ្ឋាភិបាលកម្ពុជា តំបន់រុនតាឯកនឹងក្លាយជាទីក្រុងមួយទៅថ្ងៃខាងមុខ ដោយមានគម្រោងកសាងផ្លូវកៅស៊ូសរុបជិត១៥០គីឡូម៉ែត្រ មានប្រព័ន្ធទឹក ភ្លើង បង្កើតសាលារៀនថ្នាក់អនុវិទ្យាល័យ និងវិទ្យាល័យ ព្រមទាំងមានផ្ទះស្នាក់នៅសម្រាប់គ្រូបង្រៀនផងដែរ។ ជាមួយគ្នានោះក៏ត្រូវបង្កើតមណ្ឌលសុខភាព និងអាគារស្នាក់នៅរបស់គ្រូពេទ្យយ៉ាងហោច២០បន្ទប់ថែមទៀត ខណៈការសាងសង់ផ្សារក៏ត្រូវតែធ្វើដែរ។
នៅក្នុងពិធីសំណេះសំណាលជាមួយពលរដ្ឋដែលព្រមមកតាំងទីលំនៅថ្មីនៅតំបន់រុនតាឯក លោកនាយរដ្ឋមន្ត្រី ហ៊ុន សែន បានថ្លែងថា នេះវេទិកាសម្រាប់ដោះស្រាយបញ្ហាជូនប្រជាពលរដ្ឋ គឺមិនមែនជាវេទិកាឲ្យបណ្តាគណបក្សនយោបាយនានាយកមកធ្វើជាអាវុធសម្រាប់វាយប្រហារ លោក ហ៊ុន សែន ក្នុងការរកសន្លឹកឆ្នោតនាពេលខាងមុខទេ។ លោក ហ៊ុន សែន បានលើកឡើងចំៗ ចំពោះលោក ពេជ្រ ស្រស់ ប្រធានគណបក្សយុវជនកម្ពុជា ឲ្យដកខ្លួនចេញពីក្រោយពលរដ្ឋ១៨គ្រួសារដែលទើបយល់ព្រមចាកចេញពីតំបន់ចាស់ដែលមិនស្របច្បាប់ មកតាំងទីនៅតំបន់រុនតាឯកដែលស្របច្បាប់វិញ។
គួរឲ្យដឹងថា ការដែលរដ្ឋាភិបាលជម្លៀសប្រជាជនចេញពីតំបន់ជុំវិញរមណីយដ្ឋានអង្គរវត្ត គឺដោយសារតែមានស្នើពីអ្នកជំនាញផ្នែកបេតិកភណ្ឌពិភពលោក ដែលព្រមានថា ប្រសិនបើនៅបន្តទាញយកទឹកប្រើប្រាស់ពីក្រោមដីនៅជិតតំបន់អង្គរបន្តទៀត នោះនឹងធ្វើឲ្យប៉ះពាល់ដល់គ្រឹះប្រាសាទ។ នេះទាមទារឲ្យរដ្ឋាភិបាលកម្ពុជា ត្រូវដោះស្រាយគោលនយោបាយជូនប្រជាជន ដើម្បីចាកចេញពីតំបន់នោះទៅទីតាំងថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ