បក្សប្រឆាំងរិះគន់ដំណើរការចេញឯកសារស្របច្បាប់ជូនជនអន្តោប្រវេសន្តនៅកម្ពុជា
ពីក្នុងវេទិកាជួបសំណេះសំណាលក្រុមប្រឹក្សាឃុំសង្កាត់ដែលទើបជាប់ឆ្នោតនៅក្នុងខេត្តកំពង់ស្ពឺ លោក ថាច់ សេដ្ឋា ប្រធានស្ដីទីគណបក្សភ្លើងទៀនបានរិះគន់ដំណើរការចេញឯកសារស្របច្បាប់ជូនជនអន្តោប្រវេសន្តនៅកម្ពុជា។ លោកថា ទង្វើនេះ រដ្ឋាភិបាលកំពុងប្រែក្លាយជនអន្តោប្រវេសន្តរស់នៅខុសច្បាប់ ឲ្យមករស់នៅស្របច្បាប់វិញ។ សម្រាប់ រដ្ឋាភិបាលអះអាងថា គ្មានជម្រើសអ្វីក្រៅពីដកហូតឯកសារខុសច្បាប់ទាំងនោះមកវិញ ហើយចេញឯកសារស្របច្បាប់ជូនឡើយ។
ចុះផ្សាយនៅថ្ងៃ៖
ស្តាប់ - ០២:១២
នៅចំពោះមុខអ្នកគាំទ្ររបស់ខ្លួនរាប់រយនាក់ លោក ថាច់ សេដ្ឋា ប្រធានស្ដីទីគណបក្សភ្លើងទៀនបានសង្កត់ធ្ងន់លើអន្តោប្រវេសន្តវៀតណាមនិងចិនដែលកំពុងរស់នៅយ៉ាងគគ្រឹកគគ្រេង និងអនាធិបតេយ្យ នៅកម្ពុជា ហើយត្រូវបានរដ្ឋាភិបាលកំពុងប្រែក្លាយពួកគេពីការកាន់កាប់ឯកសារខុសច្បាប់ទៅឲ្យរស់នៅតាមស្របច្បាប់វិញ។ រូបភាពគគ្រឹកគគ្រេងរបស់ជនជាតិទាំងពីរនៅកម្ពុជាដែលអ្នកនយោបាយបក្សប្រឆាំងរូបនេះសំដៅដល់នោះគឺលំហូរសែនព្រេនដោយយកក្បួនតម្រាលតាមជនជាតិចិន និងវៀតណាម។ ចំណែករូបភាពអនាធិបតេយ្យវិញស្ដែងចេញតាមរយៈការបាញ់បោះ បាញ់សម្លាប់ ការចាប់ជម្រិត បង្កដោយជនជាតិចិនខ្លះស្នាក់នៅកម្ពុជា។ នៅក្នុងន័យនេះ លោក ថាច សេដ្ឋា បានការពារខ្លួននៅចំពោះការចោទថា រើសពូជសាសន៍ ព្រោះអ្វីដែលលោកលើកមកបង្ហាញនៅពេលនេះប្រវត្តិសាស្ត្រកម្ពុជាធ្លាប់ហែលឆ្លងរួចហើយ។
មិនចំពោះតែ លោក ថាច់ សេដ្ឋាទេ ដែលរិះគន់ដំណើរការចេញឯកសារស្របច្បាប់ជូនជនអន្តោប្រវេសន្តនៅកម្ពុជា សូម្បីអ្នកឃ្លាំមើលសង្គមក៏បារម្ភដែរថា ការផ្តល់ប័ណ្ណស្នាក់នៅអចិន្ត្រៃយ៍ឲ្យជនអន្តោប្រវេសន្តពិសេសជនជាតិវៀតណាមនៅកម្ពុជាបែបនេះគឺជាហានិភ័យទៅវិញទេ។
មិននៅស្ងៀមចំពោះការកង្វល់និងការចោទប្រកាន់ នេះ លោក ខៀវ សុភ័គ អ្នកនាំពាក្យ ក្រសួង មហាផ្ទៃចាត់ ទុក ការ យល់ឃើញទាំងអំបាលមាណជាអារម្មណ៍មួយចង្អៀតចង្អុល។ លោកបន្តថា អ្វីដែលរដ្ឋាភិបាលកំពុងធ្វើគឺផ្អែកទៅលើជំរឿនជនអន្តោប្រវេសន្តវៀតណាមកន្លងមករកឃើញថា ជនអន្តោប្រវេសន្តនៅកម្ពុជាភាគច្រើនជាជនជាតិវៀតណាមកាន់ឯកសារស្នាក់នៅមិនប្រក្រតី តួយ៉ាងកាន់អត្តសញ្ញាណប័ណ្ណសញ្ជាតិខ្មែរដែលគ្មានព្រះរាជ្យក្រឹត្យទទួលស្គាល់ពីព្រះមហាក្សត្រខ្មែរ។ ដូច្នេះដើម្បីស្រាយបញ្ហានេះ រដ្ឋាភិបាលអះអាងថា គ្មានជម្រើសអ្វីក្រៅពីដកហូតឯកសារខុសច្បាប់ទាំងនោះមកវិញ ហើយចេញឯកសារស្របច្បាប់ជូនឡើយ។
គិតត្រឹមពេលនេះ ជនបរទេសអន្តោប្រវេសន្តយ៉ាងតិច ៦ម៉ឺននាក់ ដែលមានអាយុ១៨ឆ្នាំឡើង ត្រូវបានរដ្ឋាភិបាលកម្ពុជាផ្តល់បណ្ណស្នាក់នៅអចិន្ត្រៃយ៍។ តាមការឲ្យដឹងពីអគ្គនាយកដ្ឋានអន្តោប្រវេសន៍ ចំនួនជនបរទេស ដែលកំពុងស្នាក់នៅអចិន្ត្រៃយ៍ចំនួន ៧ពាន់នាក់ ក្នុងចំណោម៩ពាន់នាក់ បានចូលទៅសុំពន្យាបណ្ណស្នាក់នៅអចិន្ត្រៃយ៍របស់ពួកគេ ដែលមានរយៈពេល២ឆ្នាំម្តង។ តែយ៉ាងណា បច្ចុប្បន្នប្រទេសកម្ពុជា មានជនបរទេសអន្តោប្រវេសន្តជិត ១ម៉ឺននាក់ដែលបន្តស្នាក់នៅខុសច្បាប់ ដោយមិនបានមកសុំបណ្ណស្នាក់នៅថ្មី ឬសុំបន្តរយៈពេលប្រើប្រាស់ ដែលជាបញ្ហាប្រឈមពាក់ព័ន្ធការគ្រប់គ្រងជនបរទេសអន្តោប្រវេសន៍។ នេះបើតាមការឱ្យដឹងពីក្រសួងមហាផ្ទៃក្នុងពិធីសន្និបាតបូកសរុបការងារឆ្នាំ ២០២១ និងលើកទិសដៅការងារឆ្នាំ ២០២២ កាលពីខែកុម្ភៈកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ