កូនស្រី លោក កឹម សុខា ៖វិធានការពីសហគមន៍អន្តរជាតិនៅតែបន្តមានរហូតដល់កម្ពុជាបើកផ្លូវប្រជាធិបតេយ្យ
ម្សិលមិញគឺជាខួប៥ឆ្នាំនៃការចាប់ខ្លួនលោក កឹម សុខា ប្រធានគណបក្សប្រឆាំង នៅក្រោមការចោទប្រកាន់ថា ឃុបឃិតជាមួយបរទេសដើម្បីផ្តួលរំលំរដ្ឋាភិបាលកម្ពុជា។ កូនស្រី លោក កឹម សុខា និងក្រុមអ្នកគាំទ្របានចេញសាររំឭកពីការឆ្មក់ចាប់ខ្លួនប្រធានអតីតគណបក្សប្រឆាំង និងជាតំណាងរាស្ត្រ ទាំងពាក់កណ្តាលយប់នោះ ដោយចាត់ទុកថា ជារឿងបំពានច្បាប់ និងអយុត្តិធម៌។ នៅចំពោះមុខ ភាពមិនច្បាស់លាស់នៃការបិទបញ្ចប់សំណុំរឿងលោក កឹម សុខា ដែលកំពុងស្ថិតក្នុងក្រសែភ្នែកលោកខាងលិច កញ្ញា កឹម មនោវិទ្យា បានអះអាងថា វិធានការផ្សេងៗពីសហគមន៍អន្តរជាតិនឹងនៅតែបន្តមានរហូតទាល់តែកម្ពុជាបើកផ្លូវប្រជាធិបតេយ្យឡើងវិញ។
ចុះផ្សាយនៅថ្ងៃ៖
ស្តាប់ - ០១:៤៣
សេចក្តីថ្លែងការណ៍នានាពីក្រុមអ្នកគាំទ្រ លោក កឹម សុខា បានបន្តធ្លាក់មកបន្តគ្នា ចំខួប៥ឆ្នាំនៃព្រឹត្តិការណ៍ឆ្មក់ចាំខ្លួនប្រធានគណបក្សប្រឆាំងទាំងពាក់កណ្តាលយប់ថ្ងៃទី២កញ្ញា២០១៧។ ៥ឆ្នាំ បានកន្លងផុត ទោះជាមិនទាន់បានដល់គោលដៅ ប៉ុន្តែបានទទួលលទ្ធផលជាវិជ្ជមានខ្លះ ដូចជាការផ្លាស់ប្តូរលោក កឹម សុខា ចេញពីពន្ធនាគារជាដើម។ នេះជាការលើកឡើងរបស់ កញ្ញា កឹម មនោវិទ្យា។ កញ្ញាប្តេជ្ញាចិត្តថាគឺគ្មានថ្ងៃដែលពួកគេបោះបង់ដំណើរស្តារលិទ្ធិប្រជាធិបតេយ្យនៅកម្ពុជាឡើយ ហើយវិធានការផ្សេងៗពីសហគមន៍អន្តរជាតិនឹងនៅតែមានជាបន្តបន្ទាប់រហូតទាល់តែកម្ពុជាបើកផ្លូវប្រជាធិបតេយ្យឡើងវិញ។
បន្ថែមពីនេះលោក ផែង ហេង សហមេធាវីការពារក្តីលោក កឹម សុខា បានរំឭកឡើងវិញពីព្រឹត្តិការណ៏នោះ ថាគួរឲ្យភ័យខ្លាច ហើយថា ការចោទប្រកាន់លោក កឹម សុខា គឺជារឿងនយោបាយសុទ្ធសាធ គ្មានបទល្មើសដូចចោទទេ បើទោះការចោទនោះមានអង្គហេតុបង្ហាញខ្លះៗក៏ដោយ ហើយក៏ការនេះ នាំឲ្យប្រជារាស្ត្រមានអារម្មណ៍មកលើតុលាការឯករាជ្យ ពេលក្រុមមនុស្សក្នុងអង្គនីតិប្រតិបត្តិរំលោភបំពាន។
បើតាម លោក ផែង ហេង គឺមានផ្លូវតែមួយគត់ គឺតុលាការត្រូវហ៊ានច្រានចោលបណ្តឹងមានចរិកនយោបាយ ដោយប្រាប់ទៅអ្នកនយោបាយថា នេះមិនស្ថិតក្រោមសមត្ថកិច្ចតុលាការទេ ស្នើឲ្យអ្នកនយោបាយដោះស្រាយជាមួយគ្នា ក្រោមដំបូលរដ្ឋធម្មនុញ្ញ ដែលព្រះមហាក្សត្រមានព្រះរាជតួនាទីជាអ្នកផ្សះផ្សាជាតិ និងបង្រួបបង្រួមជាតិ ដោយសំអាងថា តុលាការកំពូល អាមេរិក ក៏ធ្លាប់ច្រានចោលសំណុំរឿងបែបនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ