លោក ឈឹម សុធារ៉ា នាយកអង្គការ TPO បានទទួល «ពានរង្វាន់ណូបែលអាស៊ីឆ្នាំ២០២២»
លោកវេជ្ជបណ្ឌិត ឈឹម សុធារ៉ា នាយកប្រតិបត្តិអង្គការចិត្តសង្គមអន្ដរវប្បធម៌ ហៅកាត់ថា TPO បានទទួលពានរង្វាន់ Raymon Magsaysay ឬហៅម្យ៉ាងទៀតថា «ពានរង្វាន់ណូបែលអាស៊ី»។ នេះគឺជាការប្រកាសរបស់មូលនិធិ Raymon Magsaysay នៅថ្ងៃទី៣១ ខែសីហានេះ។ ក្រៅពីលោកវេជ្ជបណ្ឌិត ឈឹម សុធារ៉ា ពានរង្វាន់ណូបែលអាស៊ីលើកទី៦៤ ក៏សម្រេចផ្ដល់ពានរង្វាន់ដល់បុគ្គលសំខាន់៣រូបផ្សេងទៀតដែរ ដែលមានម្នាក់មកពីប្រទេសជប៉ុន ម្នាក់មកពីប្រទេសហ្វីលីពីន និងម្នាក់ទៀតមកពីប្រទេសឥណ្ឌូនេស៊ី។ រាប់ទាំងលោកវេជ្ជបណ្ឌិត ឈឹម សុធារ៉ា មានជនជាតិខ្មែរចំនួន៨រូបហើយ ដែលបានទទួលពានរង្វាន់ណូបែលអាស៊ីនេះ។
ចុះផ្សាយនៅថ្ងៃ៖
ស្តាប់ - ០២:៣៧
ភ្លាមៗក្រោយពីបានទទួលដំណឹងថា ខ្លួនបានទទួលពានរង្វាន់ Raymon Magsaysay ឬ «ពានរង្វាន់ណូបែលអាស៊ី» លោកវេជ្ជបណ្ឌិត ឈឹម សុធារ៉ា បានសម្ដែងក្ដីរំភើបរីករាយរកអ្វីប្រៀបប្រដូចមិនបាន។ បើតាមលោកវេជ្ជបណ្ឌិត ឈឹម សុធារ៉ា នាយកប្រតិបត្តិអង្គការ TPO លោកមិនបានដឹងខ្លួនទាល់តែសោះថា មូលនិធិ Raymon Magsaysay បានតាមដានការងាររបស់លោក អស់រយៈពេលជាង២ឆ្នាំ ទើបសម្រេចផ្ដល់ពានរង្វាន់ដ៏មានតម្លៃនេះជូនរូបលោក។
សូមជម្រាបថា លោកវេជ្ជបណ្ឌិត ឈឹម សុធារ៉ា មានវ័យ៥៤ឆ្នាំ បានបញ្ចប់ការសិក្សាថ្នាក់បណ្ឌិតផ្នែកចិត្តសាស្ត្រនៅឆ្នាំ២០១៤ និងបានបម្រើការងារក្នុងវិស័យពិគ្រោះយោបល់និងព្យាបាលជំងឺចិត្តសាស្ត្រអស់រយៈពេល៣០កន្លងមកហើយ។
នៅក្នុងអំឡុងពេលនេះ ក្រៅតែពីដឹកនាំអង្គការ TPO និងព្យាបាលអ្នកជំងឺផ្លូវចិត្ត លោកវេជ្ជបណ្ឌិត ឈឹម សុធារ៉ា ក៏បានស្រាវជ្រាវបន្ថែមអំពីបញ្ហាជំងឺផ្លូវចិត្តដទៃទៀត ជាពិសេសបញ្ហាជំងឺផ្លូវចិត្តរបស់ប្រជាជនកម្ពុជា។ ជំងឺផ្លូវចិត្តរបស់ប្រជាជនកម្ពុជាដែលបានហែលឆ្លងភ្លើងសង្គ្រាមអស់រាប់ទសវត្ស ដែលការណ៍នេះ បើតាមលោកវេជ្ជបណ្ឌិត វាមានលក្ខណៈដាច់ដោយឡែកពីជំងឺផ្លូវចិត្តនៃប្រជាជននៃប្រទេសដទៃ។
សូមបញ្ជាក់បន្តិចដែរអំពីមូលនិធិ Raymon Magsaysay។ មូលនិធិដែលមានមូលដ្ឋាននៅប្រទេសហ្វីលីពីននេះ បង្កើតឡើងតាំងពី១៩៥៧។ ពានរង្វាន់ដែលគេប្រៀបប្រដូចទៅនឹង «ពានរង្វាន់ណូបែលអាស៊ី» នេះ ផ្ដល់ជូនដល់បុគ្គលឬស្ថាប័នទាំងឡាយណា ដែលបានលះបង់កម្លាំងកាយចិត្ត ដោយមិនគិតពីខ្លួនឯង ដើម្បីរួមចំណែកដោះស្រាយបញ្ហា ទាំងនៅក្នុងប្រទេសរបស់ខ្លួន នៅក្នុងតំបន់ និងពិភពលោក។
រាប់ទាំងលោកវេជ្ជបណ្ឌិត ឈឹម សុធារ៉ា មានជនជាតិខ្មែរចំនួន៨រូបហើយ ដែលបានទទួលពានរង្វាន់ណូបែលអាស៊ីនេះ។ ជនជាតិខ្មែរទាំង៧រូបទៀតដែលធ្លាប់បានទទួលពានរង្វាន់នេះដែរ មានជាអាថិ៍ លោក ឆាំង យុ នាយកមជ្ឈមណ្ឌលឯកសារកម្ពុជា, យ៉ង សាំងកុមារ អតីតនាយកប្រតិបត្តិអង្គការសេដាក, លោក គល់ បញ្ញា នាយកប្រតិបត្តិនៅអង្គការ ខុមហ្វ្រែល, លោក ឯក សុនចាន់ អតីតអគ្គនាយករដ្ឋាករទឹកស្វយ័តភ្នំពេញ, លោកស្រី អ៊ុង ច័ន្ទថុល អង្គការកម្ពុជាដើម្បីជួយស្រ្តីមានវិបត្តិ, និងលោកស្រី នួន ផល្លី អតីតនាយកគ្រប់គ្រងអង្គការពន្លឺអនាគត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ