ក្រសួងមហាផ្ទៃរំលឹកឡើងវិញឱ្យមានការទទួលស្គាល់បណ្ណស្នាក់នៅជនអន្តោប្រវេសន្តនៅកម្ពុជា
ក្រសួងមហាផ្ទៃនៅថ្ងៃទី២៩សីហាម្សិលមិញនេះ បានណែនាំជាថ្មីអោយមន្ត្រីក្រោមឱវាទ អនុវត្តនិងទទួលស្គាល់បណ្ណស្នាក់នៅអចិន្ត្រៃយ៍សម្រាប់ជនបរទេសអន្តោប្រវេសន្តនៅកម្ពុជា ឱ្យស្របទៅតាមច្បាប់ដែលមានចែងកាលពីឆ្នាំ១៩៩៤មក។ ជាច្បាប់ស្តីពីអន្តោប្រវេសន៍ ដែលក្រសួងមហាផ្ទៃដាក់ចេញ ក្នុងការផ្តល់ប័ណ្ណស្នាក់នៅអចិន្ត្រៃយ៍ឱ្យជនបរទេស យកមកប្រើប្រាស់សម្រាប់បម្រើជីវភាពប្រចាំថ្ងៃរបស់ពួកគេនៅក្នុងទឹកដីកម្ពុជា។ គិតត្រឹមពេលនេះ ជនបរទេសអន្តោប្រវេសន្តយ៉ាងតិច ៦ម៉ឺននាក់ ត្រូវបានកម្ពុជាផ្តល់បណ្ណស្នាក់នៅអចិន្ត្រៃយ៍ជូន។
ចុះផ្សាយនៅថ្ងៃ៖
ស្តាប់ - ០២:២៥
ក្រសួងមហាផ្ទៃ សង្កេតឃើញថា នៅតែមានក្រសួងស្ថាប័ន រដ្ឋបាលថ្នាក់ក្រោមជាតិ និងវិស័យឯកជនមួយចំនួន នៅពុំទាន់បានជ្រួតជ្រាបនិងឱ្យតម្លៃ ការប្រើប្រាស់បណ្ណស្នាក់នៅអចិន្ត្រៃយ៍របស់ជនបរទេសអន្តោប្រវេសន្តនៅឡើយទេ បើទោះបីជាក្រសួងបានធ្វើការផ្សព្វផ្សាយជាច្រើនលើកច្រើនសារក៏ដោយ។
តាមក្រសួងមហាផ្ទៃ ក្នុងសេចក្តីជូនដំណឹងរំលឹកឱ្យមានការទទួលស្គាល់ បណ្ណស្នាក់នៅជនអន្តោប្រវេសន្តនៅកម្ពុជានៅថ្ងៃទី២៩ ខែសីហា ឆ្នាំ២០២២ ការមិនទទួលស្គាល់ពីតម្លៃប្រើប្រាស់ប័ណ្ណស្នាក់នៅអចិន្ត្រៃយ៍ជនបរទេសនេះ គឺជាអ្វីដែលផ្ទុយពីច្បាប់ ស្តីពីអន្តោប្រវេសន៍នៅកម្ពុជា ឆ្នាំ១៩៩៤។ តាមច្បាប់អន្តោប្រវេសន៍ ឆ្នាំ១៩៩៤ ក្រសួងមហាផ្ទៃអាចចេញប័ណ្ណស្នាក់នៅអចិន្ត្រៃយ៍ដល់ជនបរទេសអន្តោប្រវេសន្ត សម្រាប់ប្រើប្រាស់បម្រើជីវភាពប្រចាំថ្ងៃនៅក្នុងទឹកដីកម្ពុជាដូចជា ការស្នើសុំសេវារដ្ឋបាល សេវាសាធារណៈ សេវាសុខភាព សេវាធនាគារ ការទិញលក់ចលនវត្ថុ-អចលនវត្ថុ ការធ្វើអាជីវកម្ម ការស្នើសុំធ្វើការងារតាមរោងចក្រ-សហគ្រាស និងសកម្មភាពមួយចំនួនទៀត។
សម្រាប់មន្ត្រីគណបក្សប្រឆាំងវិញ ការចេញសេចក្តីជូនដំណឹងរំព្ញកអោយមន្ត្រីក្រោមឱវាទ អនុវត្តនិងទទួលស្គាល់បណ្ណស្នាក់នៅអចិន្ត្រៃយ៍ជនបរទេសនៅកម្ពុជានេះ ធ្វើឡើងបន្ទាប់ពីលោក ហ៊ុន ម៉ាណែត ទើបត្រឡប់មកពីមានជំនួបជាមួយមេដឹកនាំកុម្មុយនីស្តវៀតណាម និងជាការដោះដូរជាមួយវៀតណាមទៅនឹងការទទួលស្គាល់ លោក ហ៊ុន ម៉ាណែត ជានាយករដ្ឋមន្ត្រីបន្តពីឪពុក។
គួរជម្រាបជូនថា គិតត្រឹមពេលនេះ ជនបរទេសអន្តោប្រវេសន្តយ៉ាងតិច ៦ម៉ឺននាក់ ដែលមានអាយុ១៨ឆ្នាំឡើង ត្រូវបានរដ្ឋាភិបាលកម្ពុជាផ្តល់បណ្ណស្នាក់នៅអចិន្ត្រៃយ៍ជូន។ តាមការឲ្យដឹងពីអគ្គនាយកដ្ឋានអន្តោប្រវេសន៍ ចំនួនជនបរទេស ដែលកំពុងស្នាក់នៅអចិន្ត្រៃយ៍ចំនួន ៧ពាន់នាក់ ក្នុងចំណោម៩ពាន់នាក់ បានចូលទៅសុំពន្យាបណ្ណស្នាក់នៅអចិន្ត្រៃយ៍របស់ពួកគេ ដែលមានរយៈពេល២ឆ្នាំម្តង។
តែយ៉ាងណា បច្ចុប្បន្នប្រទេសកម្ពុជា មានជនបរទេសអន្តោប្រវេសន្តជិត ១ម៉ឺននាក់ដែលបន្តស្នាក់នៅខុសច្បាប់ ដោយមិនបានមកសុំបណ្ណស្នាក់នៅថ្មី ឬសុំបន្តរយៈពេលប្រើប្រាស់ ដែលជាបញ្ហាប្រឈមពាក់ព័ន្ធការគ្រប់គ្រងជនបរទេសអន្តោប្រវេសន៍។ នេះ បើតាមការឱ្យដឹងពីក្រសួងមហាផ្ទៃក្នុងពិធីសន្និបាតបូកសរុបការងារឆ្នាំ ២០២១ និងលើកទិសដៅការងារឆ្នាំ ២០២២ កាលពីខែកុម្ភៈកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ