លោក ហ៊ុន សែន បញ្ជាឲ្យក្រសួងព័ត៌មានដកអាជ្ញាប័ណ្ណពីអ្នកសារព័ត៌មានដែលជេរប្រមាថ
ប្រមុខរដ្ឋាភិបាលកម្ពុជានៅថ្ងៃអង្គារនេះ បានចេញបញ្ជាដោយផ្ទាល់មាត់ឲ្យក្រសួងព័ត៌មានដកអាជ្ញាប័ណ្ណពីអ្នកសារព័ត៌មានណាដែលផ្សាយជេរប្រមាថនៅតាមបណ្តាញសង្គម។ បទបញ្ជានេះបានធ្វើឡើងបន្ទាប់ពីក្រសួងព័ត៌មានបានដកអាជ្ញាប័ណ្ណព័ត៌មានរបស់លោក សាន្ត ប៊ុនធឿន ដែលជេរប្រមាថនៅក្នុងការឡាយតាមហ្វេសប៊ុកនៅពេលថ្មីៗនេះ។
ចុះផ្សាយនៅថ្ងៃ៖
ស្តាប់ - ០១:៥៣
នៅក្នុងពិធីចែកសញ្ញាបត្រដល់និស្សិតសាកលវិទ្យាល័យអាស៊ី-អឺរ៉ុប នៅថ្ងៃទី២៣ខែសីហានេះ លោកនាយករដ្ឋមន្ត្រី ហ៊ុន សែន បានចាត់ទុកការជេរប្រមាថក្នុងការឡាយតាមហ្វេសប៊ុក តួយ៉ាងដូចលោក សាន្ត ប៊ុនធឿន កាលពីពេលថ្មីៗនេះ គឺមិនមែនជាសិទ្ធិបញ្ចេញមតិនោះឡើយ។ លោកប្រមុខរដ្ឋាភិបាលបានប្រគល់អំណាចដល់លោក ខៀវ កញ្ញារិទ្ធ រដ្ឋមន្ត្រីក្រសួងព័ត៌មាន ឲ្យដកអាជ្ញាប័ណ្ណពីអ្នកសារព័ត៌មានណាដែលជេរប្រមាថដើម្បីទទួលបានចំនួនអ្នកចូលមើលច្រើន។ តែបើអ្នកនោះ នៅតែជេរប្រមាថតាមការឡាយហ្វេសប៊ុកផ្ទាល់ខ្លួនទៀតនោះលោក ហ៊ុន សែន ចាត់ទុកថា ជារឿងបុគ្គល។
សូមបញ្ជាក់ថា ក្រសួងព័ត៌មាននៅថ្ងៃទី២២សីហា បានសម្រេចលុបចោលអាជ្ញាប័ណ្ណសហគ្រាស សាន្ត ប៊ុនធឿន ដែលបានចុះបញ្ជីកាលពីឆ្នាំ២០១៦ ដោយសារតែទង្វើអសីលធម៌ ជេរប្រមាថជាសាធារណៈ ធ្វើឲ្យប៉ះពាល់ដល់សីលធម៌សង្គម កិត្តិយស និងសេចក្តីថ្លែថ្នូររបស់អ្នកសារព័ត៌មានអាជីព ដែលជាការបំពានយ៉ាងធ្ងន់ធ្ងរដល់វិជ្ជាជីវៈអ្នកសារព័ត៌មាន។
នេះជាចំណាត់ការផ្ទួនៗគ្នា ក្រោយពី លោក ហ៊ុន សែន សម្រេចបណ្តេញ លោក សាន្ត ប៊ុនធឿន ចេញកងអង្គរក្សរបស់លោក និងលុបឈ្មោះចេញពីក្របខណ្ឌក្រសួងការពារជាតិ ដោយសារតែអ្នកកាសែតរូបនេះឡាយតាមហ្វេសប៊ុកជេរប្រមាថក្នុងលក្ខណៈស្រវឺងស្រា។
លោក ណុប វី នាយកប្រតិបត្តិ អង្គការសម្ព័ន្ធអ្នកសារព័ត៌មានកម្ពុជា ហៅកាត់(ខាមបូចា) យល់ឃើញថា ចំណាត់ការលើលោក សាន្ត ប៊ុនធឿន ឆ្លុះបញ្ចាំពីរឿងតម្លាភាព និងសមត្ថភាពរបស់អ្នកសារព័ត៌មានក្នុងការទទួលបានអាជ្ញាប័ណ្ណ ខណៈលោក សាន្ត ប៊ុនធឿន ពីមុនមក ក៏មានតួនាទីជាកងអង្គរក្សផងនោះ។
លោក កត់សំគាល់ថា មានអ្នកសារព័ត៌មានខ្លះទទួលបានអាជ្ញាប័ណ្ណយកទៅប្រើប្រាស់មិនត្រឹមត្រូវ ហើយធ្វើឲ្យប៉ះពាល់ទៅដល់សេចក្តីថ្លៃថ្នូរ និងធ្វើឲ្យសាធារណជនយល់ច្រឡំពីតួនាទីរបស់អ្នកសារព័ត៌មានដែលមានវិជ្ជាជីវៈ។
បើតាម លោក ណុប វី ក្រសួងព័ត៌មានគួរតែមានតម្លាភាពក្នុងការផ្តល់អាជ្ញាប័ណ្ណដល់អ្នកសារព័ត៌មាន ហើយជៀសវាងការដកអាជ្ញាប័ណ្ណពីអ្នកសារព័ត៌មានដែលធ្វើការងារដើម្បីប្រយោជន៍សង្គម
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ