ការចាប់ខ្លួនគ្រូបង្ហាត់ក្បាច់គុនខ្មែរ៖តុលាការអះអាងថាពាក់ព័ន្ធនឹងការបង្ខាំងមនុស្សខុសច្បាប់
តុលាការខេត្តព្រះសីហនុ អះអាងថា ការចាប់ខ្លួនកីឡាករ និងជាអ្នកបង្ហាត់ក្បាច់គុនខ្មែរម្នាក់ គឺដោយសារតែរារាំងជនរងគ្រោះមិនឲ្យរត់ចេញពីកន្លែងឃុំឃាំងខុសច្បាប់នៅសណ្ឋាគារមួយកន្លែងក្នុងខេត្តជាប់មាត់សមុទ្រនេះ។ ការអះអាងថាបែបនេះ គឺបន្ទាប់ពីមានប្រតិកម្មរបស់អ្នករួមអាជីពបង្ហាត់ក្បាច់គុនខ្មែរមួយចំនួន ដែលថា ការចាប់ខ្លួននេះ គឺជារឿងអយុត្តិធម៌ និងប៉ះពាល់ដល់ការបង្ហាត់ក្បាច់គុនខ្មែរ។
ចុះផ្សាយនៅថ្ងៃ៖
ស្តាប់ - ០១:៥២
នៅក្នុងសេចក្តីបំភ្លឺនៅថ្ងៃទី១០សីហា ២០២២ អ្នកនាំពាក្យសាលាដំបូងខេត្តព្រះសីហនុ អះអាងថា ឈ្មោះជិន ភារៀង ហៅ ជិន រ៉ា ត្រូវបានសមត្ថកិច្ចចាប់ខ្លួនពាក់ព័ន្ធនឹងហេតុការណ៍បង្ខាំងមនុស្សខុសច្បាប់នៅសណ្ឋាគារជីងកាង ក្នុងក្រុងព្រះសីហនុ កាលពីថ្ងៃទី២១ខែមេសាឆ្នាំ២០២២។
បើតាមតុលាការជាន់ទាបនេះ ការចាប់ខ្លួនកីឡាករគុនខ្មែររូបនេះ គឺពាក់ព័ន្ធនឹងបទចាប់ឃុំឃាំង និងបង្ខាំងមនុស្សដោយខុសច្បាប់ និងកាន់កាប់អាវុធដោយគ្មានការអនុញ្ញាត ដែលជាបទល្មើសព្រហ្មទណ្ឌ។ អ្នកនាំពាក្យសាលាដំបូងខេត្តព្រះសីហនុ អះអាងថា ការចាប់ខ្លួនបុរស ជិន ភារៀង ហៅជិន រ៉ា មិនមែនពាក់ព័ន្ធនឹងការបង្ហាត់ក្បាច់គុនខ្មែរនោះទេ។
ការអះអាងថារបស់បែបនេះរបស់តុលាការគឺបន្ទាប់ពីមានប្រតិកម្មរបស់អ្នករួមអាជីពបង្ហាត់ក្បាច់គុនខ្មែរមួយចំនួនដែលថា ការចាប់ខ្លួននេះគឺជារឿងអយុត្តិធម៌ និងប៉ះពាល់ដល់ការបង្ហាត់ក្បាច់គុនខ្មែរ។
កញ្ញា ពេជ្រ ចរណៃ ដែលជាអ្នកបង្ហាត់ក្បាច់គុនខ្មែរម្នាក់ និងជាតារាសំដែងផងនោះ បានរៀបរាប់ថា ការចាប់ខ្លួនលោក ជិន រ៉ា គឺជារឿងអយុត្តិធម៌។ អយុត្តិធម៌ដោយកញ្ញាសំអាងថា គ្រូបង្ហាត់គុនខ្មែររូបនេះបានទៅធ្វើការនៅទីនោះតាមរយៈកិច្ចសន្យាបង្ហាត់ក្បាច់គុនខ្មែរដល់ជនជាតិចិននៅពេលថ្ងៃ ហើយនៅពេលយប់ត្រូវបំពេញការងារជាសន្តិសុខយាមសណ្ឋាជីងកាងដើម្បីបានប្រាក់ចិញ្ចឹមគ្រួសារ។
បើតាម កញ្ញា ពេជ្រ ចរណៃ គ្រូបង្ហាត់ក្បាច់គុនខ្មែររូបនេះ ក៏ជាជនរងគ្រោះម្នាក់ ក្នុងការចាញ់បោកគេទៅធ្វើការនៅកន្លែងខុសច្បាប់ដែរ ដោយសារ លោក ជិន រ៉ា មិនបានដឹងជាមុនថា សណ្ឋាគារជីងកាងនោះជាកន្លែងបង្ខាំងមនុស្សខុសច្បាប់នោះដែរ។
យ៉ាងណាក៏ដោយ បើតាមតុលាការខេត្តព្រះសីហនុ បុរសឈ្មោះ ជិន រ៉ា កំពុងជាប់ឃុំ ពីបទចាប់ឃុំឃាំង និងបង្ខាំងមនុស្សដោយខុសច្បាប់ និងកាន់កាប់អាវុធដោយគ្មានការអនុញ្ញាត រួមទាំងជនសង្ស័យ៤នាក់ផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ