ស្ថាប័នសិទ្ធិមនុស្សកម្ពុជាក៏តាមដានករណីប្រតិបត្តិការបង្ក្រាបបទល្មើស រហូតបណ្តាលឱ្យបុរសម្នាក់ស្លាប់)
គណៈកម្មាធិការសិទ្ធិមនុស្សកម្ពុជា កំពុងតាមដានភាពមិនប្រក្រតីក្រោយប្រតិបត្តិការបង្ក្រាបបទល្មើស រហូតបណ្តាលឱ្យបុរសម្នាក់ស្លាប់នៅខេត្តកំពង់ធំ កាលពីបីថ្ងៃមុន។ លោក កត្តា អន អ្នកនាំពាក្យស្ថាប័នសិទ្ធិមនុស្សបានប្រាប់វិទ្យុបារាំងអន្តរជាតិនៅថ្ងៃទី១០សីហានេះដោយបានបន្ថែមថា មន្ត្រីស៊ើបអង្កេតរបស់គណៈកម្មាធិការសិទ្ធិមនុស្សកម្ពុជា នឹងអន្តរាគមន៍ទៅសមត្ថកិច្ចជំនាញ ឬតុលាការពិនិត្យសើរើ បើសិនជាករណីនេះពិតជាមានជាប់ពាក់ព័ន្ធ នឹងការរំលោភសិទ្ធិមនុស្ស ឬមិនបានផ្ដល់យុត្តិធម៌ដល់ជនរងគ្រោះ។
ចុះផ្សាយនៅថ្ងៃ៖
ស្តាប់ - ០២:២៨
ជំហររបស់អ្នកនាំពាក្យគណៈកម្មាធិការសិទ្ធិមនុស្សកម្ពុជាយ៉ាងដូច្នេះ កើតមានឡើងបន្ទាប់ពីកូនស្រីក្រុមគ្រួសារជនរងគ្រោះសព លោក សួង ឌ័ន អង្វរសុំឲ្យលោកនាយករដ្ឋមន្ត្រី ហ៊ុន សែន និងលោក កែវ រ៉េមី ប្រធានគណ:កម្មាធិការសិទ្ធិមនុស្សកម្ពុជា ស្វែងរកយុត្តិធម៌ដល់ លោក សួង ឌ័ន ស្លាប់នៅប្រតិបត្តិការបង្ក្រាបបទល្មើសមួយ កាលពីថ្ងៃទី៧សីហា នៅភូមិរូង ឃុំក្រវ៉ា ស្រុកបារាយណ៍ ខេត្តកំពង់ធំ។
តាមរយៈទំព័រហ្វេសបុករបស់កញ្ញា នារតី ឌីន កូនស្រីសពលោក សួង ឌ័ន រៀបរាប់ថា ឪពុកបានស្លាប់ក្រោយរងនូវអំពើដ៏សាហាវព្រៃផ្សៃ និងអមនុស្សធម៌។ បើតាមកូនស្រីម្នាក់នេះ ឪពុកនិងប៉េអឹមបានជួបគ្នានៅគ្រាដែល លោក សួង ឌ័ន ចេញពីប្រជុំ ចៃដន្យភ្លៀងក៏ចូលជ្រកភ្លៀង នៅតូបកាហ្វេ។ ជ្រកមិនបានប៉ុន្មានផង ប៉េអឹមក៏ចាប់លោកឪពុកនាងសង្កត់ត្រង់ចំណុចក ដកដង្ហើមមិនចេញ រហូតផុតដង្ហើមនៅលើឡាន។ លោក សួង ឌ័ន មានតួនាទីជាអនុភូមិ នៃភូមិរូង ឃុំក្រវ៉ា ស្រុកបារាយណ៍។
ថ្លែងប្រាប់វិទ្យុបារាំងអន្តរជាតិ លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស បានប្រាប់ពីដំណើរដើមទងយ៉ាងដូច្នេះថា លោក សួង ឌ័ន ហ្នឹង! ជាជនសង្ស័យម្នាក់ក្នុងចំណោមជនសង្ស័យ៤នាក់មានជាប់ព័ន្ធនឹងល្បែងជល់មាន់តាមអនឡាញ មិនមែនសុខៗកម្លាំងប៉េអឹមចាប់ លោក សួង ឌ័ន សង្កត់កឡើយ។ ចំពោះមរណៈដែលត្រូវបានទាញភ្ជាប់ករណីសង្កត់កលោក អេង ហ៊ី សុំចិត្តអ្នកទាញភ្ជាប់រងចាំលទ្ធផលស៊ើបអង្កេតសិនចាំវាយតម្លៃ។ លទ្ធផលស៊ើបអង្កេតនឹងចេញផ្សាយជាសាធារណៈក្នុងពេលឆាប់ៗព្រោះនៅថ្ងៃទី១០សីហានេះ គណៈកម្មការស៊ើបអង្កេតបានចុះទៅសួរនាំម្ចាស់ទីតាំងល្បែងជល់មាន់តាមអនឡាញជុំវិញហេតុការណ៍ដែលកើតឡើងនៅថ្ងៃទី៧សីហា។
ថ្លែងតាមរបាយការណ៍ពីថ្នាក់ក្រោម លោក អេង ហ៊ី បានគូសបញ្ជាក់ថា អំឡុងពេលឃាត់ខ្លួនបញ្ជូនឡើងឡានលោក សួង ឌ័ន មានអាការៈមិនស្រួលខ្លួនស្រាប់ទៅហើយ។ ទោះជាយ៉ាងណាសម្រាប់គ្រួសារជនរងគ្រោះបានបរិហាថា នេះអនុវត្ដច្បាប់តែគ្មានទំនួលខុសត្រូវ។ ដើម្បីភាពត្រឹមត្រូវនិងតម្លាភាព! បន្ថែមពីលើការស៊ើបអង្កេត នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាបញ្ជាការកងរាជអាវុធហត្ថលើផ្ទៃប្រទេសបញ្ជាពីភ្នំពេញឃាត់ខ្លួនមន្រ្ដីកងរាជអាវុធហត្ថខេត្តកំពង់ធំចំនួន១១នាក់ដែលមានជាប់ពាក់ព័ន្ធនៅក្នុងសំណុំរឿងនេះ។
នៅក្នុងសំណុំរឿងនេះ អ្នកធ្វើការផ្នែកសិទ្ធិមនុស្សទាំងរដ្ឋនិងសង្គមស៊ីវិល ក្រើនរំឮកដល់មន្ត្រីអនុវត្តច្បាប់មានភាពអត់ធ្មត់ និងអនុវត្តឲ្យត្រឹមត្រូវ ដើម្បីកុំឲ្យប្រែក្លាយពីអនុវត្តច្បាប់ទៅជាជនជាប់ចោទ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ