គ្រួសារ លោក គង់ សំអាន សុំ លោក ស ខេង អន្តរាគមន៍បញ្ជូនឱពុកចេញមកព្យាបាលនៅក្រៅជាបន្ទាន់
តាមគម្រោងនៅថ្ងៃទី៩សីហាស្អែក ក្រុមគ្រួសាររបស់ លោក គង់ សំអាន នឹងដាក់ញត្តិស្នើសុំរដ្ឋមន្រ្តីក្រសួងមហាផ្ទៃលោកឧបនាយករដ្ឋមន្ត្រី ស ខេង អន្តរាគមន៍អនុញ្ញាត្តបញ្ជូន លោក គង់ សំអាន ចេញមកព្យាបាលជំងឺនៅមន្ទីរពេទ្យខាងក្រៅជាបន្ទាន់ព្រោះស្ថានភាពសុខភាពលោក គង់ សំអាន ទ្រុឌទ្រោមខ្លាំង។ លោក គង់ សំអាន ប្រធានប្រតិបត្តិអតីតគណបក្សសង្គ្រោះជាតិប្រចាំស្រុកមេមត់ ខេត្តត្បូងឃ្មុំ កំពុងជាប់ឃុំនៅក្នុងសំណុំរឿង«រួមគំនិតក្បត់»។
ចុះផ្សាយនៅថ្ងៃ៖
ស្តាប់ - ០១:៤៥
មែនទែនទៅសំណើរអន្តរាគមន៍ដល់ថ្នាក់កំពូល បន្ទាប់ពីសំណើទៅកាន់ថ្នាក់ក្រោម ដែលជាអគ្គនាយកដ្ឋានពន្ធនាគារច្រើនលើកច្រើនសាមិនឆ្លើយតប ឬផ្ដល់ដំណោះស្រាយជូន លោក គង់ សំអាន។ នេះជាខ្លឹមសារចារក្នុងញត្តិរបស់ក្រុមគ្រួសារលោក គង់ សំអាន ជម្រាបប្រាប់លោកឧបនាយករដ្ឋមន្ត្រី ស ខេង ដែលមានស្នាមមេដៃឯកភាពពីយុវជន សកម្មជន អតីតអ្នកជាប់ឃុំ។ បើតាមក្រុមគ្រួសារ រូបរាងកាយលោក គង់ សំអាន មានសភាពស្គមស្គាំងខ្លាំង សុខភាពទ្រុឌទ្រោមពិសារអាហារមិនបានដោយសារមានជំងឺមាត់ធ្មេញធ្ងរ។
ក្រៅពីលោក គង់ សំអាន ញត្តិដដែលនេះក៏ស្នើអគ្គនាយកដ្ឋានពន្ធនាគារយកចិត្តទុកដាក់លើសុខមាលភាពជនជាប់ចោទទាំងអស់ដូចមានចែងនៅមាត្រា៣៨នៃច្បាប់ស្ដីពីពន្ធនាគារ។ ជុំវិញការលើកឡើងទាំងអំបាលមាណនេះនៅមិនទាន់មានការឆ្លើយតបពីអគ្គនាយកដ្ឋានពន្ធនាគារនៅឡើយទេគិតមកដល់ថ្ងៃទី៨សីហានេះ។
មានអាយុ៧០ឆ្នាំ លោក គង់ សំអាន កំពុងជាប់ឃុំក្នុងមណ្ឌលអប់រំកែប្រែ«ម»១។ គាត់ និងសកម្មជន៦នាក់ផ្សេងទៀតមានជាប់ព័ន្ធនឹងសំណុំរឿងរួមគំនិតក្បត់ដែលបានត្រូវសាលាដំបូងខេត្តត្បូងឃ្មុំកាត់ទោសឲ្យជាប់ពន្ធនាគារ ក្នុងនោះមានជនជាប់ចោទ២នាក់ជាប់ពន្ធនាគារ៥ឆ្នាំ និង៥នាក់ទៀតជាប់ពន្ធនាគារ៧ឆ្នាំ កាលពីខែកុម្ភៈ ឆ្នាំ២០២០ កន្លងទៅ។ ក្នុងចំណោមជនជាប់ចោទទាំង៧រូបនោះ គឺមានតែលោក គង់ សំអាន ម្នាក់គត់ដែលជាប់ពន្ធនាគារ ក្រៅពីនោះ គឺតុលាការបានអនុញ្ញាតឱ្យពួកគេនៅក្រៅឃុំបណ្ដោះអាសន្ន និងខ្លះទៀតកំពុងរស់នៅក្រៅប្រទេស។ ហើយកាលពី៣ខែមុន តុលាការកំពូល សម្រេចតម្កល់សំណុំរឿងសកម្មជនបក្សប្រឆាំងលោក គង់ សំអាន ទុកជាបានការដដែលនៅថ្ងៃទី៤ ខែឧសភា បន្ទាប់ពីតុលាការកំពូលបានបើកសវនាការ លើបណ្ដឹងសាទុក្ខសំណុំរឿងលោក គង់ សំអាន ដែលបានប្ដឹងប្រឆាំងនឹងការសម្រេចរបស់តុលាការថ្នាក់ក្រោម ដែលបានកាត់ទោសឲ្យលោកជាប់ពន្ធនាគារ៧ឆ្នាំ កាលពីឆ្នាំ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ