គណបក្សប្រជាធបិតេយ្យមូលដ្ឋានស្នើចងសម្ព័ន្ធភាពជាមួយបក្សផ្សេងទៀតសម្រាប់ការបោះឆ្នោត២០២៣
គណបក្សប្រជាធិបតេយ្យមូលដ្ឋាននៅថ្ងៃអង្គារនេះ បានប្រកាសជាផ្លូវការដោយស្នើចងសម្ព័ន្ធភាពជាមួយគណបក្សនយោបាយផ្សេងទៀត ដែលមាននិន្នាការដូចគ្នាសម្រាប់ការបោះឆ្នោតថ្នាក់ជាតិនៅឆ្នាំក្រោយឬហៅកាត់ថា«សម្ព័ន្ធភាព២០២៣»។ មានគណបក្សនយោបាយយ៉ាងតិច៥ដែលបានបង្ហាញពីបំណងរួបរួមគ្នានេះ គឺបន្ទាប់ពីលទ្ធផលនៃការបោះឆ្នោតឃុំ សង្កាត់ បង្ហាញថា គណបក្សទាំងនោះទទួលបានសំឡេងគាំទ្រតិចតួច លើកលែងតែគណបក្សភ្លើងទៀនដែលឈរលំដាប់ទី២ តាមពីក្រោយបក្សកាន់អំណាច។
ចុះផ្សាយនៅថ្ងៃ៖
ស្តាប់ - ០១:៥០
គណបក្សនយោបាយចំនួន៥ដែលអះអាងថា មាននិន្នាការប្រជាធិបតេយ្យដូចគ្នា ហើយបង្ហាញពីបំណងចង«សម្ព័ន្ធភាព២០២៣» គឺមានគណបក្សភ្លើងទៀន គណបក្សប្រជាធិបតេយ្យមូលដ្ឋាន គណបក្សកែទម្រង់កម្ពុជា គណបក្សឆន្ទៈខ្មែរ និងគណបក្សកម្ពុជានិយម។ នេះបើតាម លោក សាម អ៊ីន ថ្លែងនៅក្នុងសន្និសិទនៅព្រឹកថ្ងៃទី២៦កក្កដានេះ។
បើតាមអគ្គលេខាធិការគណបក្សប្រជាធិបតេយ្យមូលដ្ឋាន ការចងសម្ព័ន្ធភាពនេះ គឺឈរលើគោលការណ៍រដ្ឋធម្មនុញ្ញ និងផ្អែកលើសរសរស្តមចំនួន៤ ឬគ៤ ដែលមានសេចក្តីពេញថា គោលបំណង គុណតម្លៃ គោលការណ៍ និងគោលនយោបាយ។ ការចងសម្ព័ន្ធភាពនេះត្រូវបាន លោក សាម អ៊ីន ពន្យល់ថា ដើម្បីឲ្យរដ្ឋសភាអាចមានតំណាងរាស្ត្រមកពីគណបក្សផ្សេងៗតំណាងឲ្យឆន្ទៈម្ចាស់ឆ្នោត ជៀសវាងមានតែមួយគណបក្សដូចអាណត្តិនេះ។
បើតាម លោក សាម អ៊ីន ការដែលរដ្ឋសភាមានតំណាងរាស្ត្រមកពីគណបក្សផ្សេងគ្នាគឺអាចជួយទប់ស្កាត់ការកែប្រែច្បាប់ ឬបង្កើតច្បាប់ថ្មីៗថ្មីដើម្បីផលប្រយោជន៍ក្រុមណាមួយដោយជិះសេះលែងដៃដូចជាការធ្វើវិសោធនកម្មរដ្ឋធម្មនុញ្ញនៅពេលនេះ។
មានជម្រើសរើស៣ សម្រាប់សំណើរចងសម្ព័ន្ធភាព២០២៣ គឺទី១ការចែកមណ្ឌលគ្នាឈរឈ្មោះបោះឆ្នោត ទី២ ការរួមគ្នាក្រោមឈ្មោះគណបក្សណាមួយ និងជម្រើសទី៣ ការរួមគ្នាបង្កើតគណបក្សថ្មី។ តែគណបក្សប្រជាធិបតេយ្យមូលដ្ឋានយល់ថា ជម្រើសទី១ គឺការចែកមណ្ឌលគ្នាឈរឈ្មោះបោះឆ្នោតគឺសមស្របបំផុតសម្រាប់បរិបទនយោបាយបច្ចុប្បន្ន ដោយហេតុថា អាចរក្សាគណបក្សនីមួយៗឲ្យនៅដដែល ហើយអាចសម្រាលបន្ទុកក្នុងការចាយវាយថវិកា។ ប៉ុន្តែរូបមន្តនេះក៏មានគុណវិបត្តិដែរ គឺត្រូវការពន្យល់ដល់អ្នកគាំទ្រ ត្រូវការការសម្របសម្រួលច្រើន ក្នុងរៀបបេក្ខជន និងការតាក់តែងគោលនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ