លោក សម រង្ស៊ី៖ ការកែរដ្ឋធម្មនុញ្ញគឺជាការបើកផ្លូវឲ្យ លោក ហ៊ុន ម៉ាណែត កាន់តំណែងនាយករដ្ឋមន្ត្រី
លោក សម រង្ស៊ី ជាអ្នកនយោបាយជើងចាស់ ទើបតែបញ្ចេញប្រតិកម្មទៅនឹងការធ្វើវិសោធនកម្មរដ្ឋធម្មនុញ្ញជាលើកទី១០នៅពេលនេះ។ បើតាមមេដឹកនាំអតីតគណបក្សប្រឆាំង ការកែប្រែច្បាប់កំពូលនេះ គឺជាការកាត់បន្ថយអំណាចរដ្ឋសភា ដើម្បីត្រួសត្រាយផ្លូវឲ្យ លោក ហ៊ុន ម៉ាណែត ចូលកាន់តំណែងជានាយករដ្ឋមន្ត្រីបន្តពីលោក ហ៊ុន សែន ដោយរលូន។
ចុះផ្សាយនៅថ្ងៃ៖
ស្តាប់ - ០២:០៧
តាមរយៈទំព័រហ្វេសប៊ុករបស់ខ្លួន លោក សម រង្ស៊ី បរិហារ្ត៍ថា ការធ្វើវិសោធនកម្មរដ្ឋធម្មនុញ្ញនៅពេលនេះគឺធ្វើឲ្យប៉ះពាល់ដល់គោលការណ៍ប្រជាធិបតេយ្យ ពិសេសកាត់បន្ថយអំណាចរបស់រដ្ឋសភា ដែលមានតំណាងរាស្ត្រជាអ្នកតំណាងសំឡេងរបស់ពលរដ្ឋ។
ការកែប្រែច្បាប់កំពូលនេះ ត្រូវអ្នកនយោបាយជើងចាស់ ចាត់ទុកថា បានរុញច្រានការដឹកនាំរបស់ប្រទេសកម្ពុជាកាន់តែដើរឆ្ងាយពីគន្លងប្រជាធិបតេយ្យ ខណៈសភាបច្ចុប្បន្នមានតែតំណាងរាស្ត្រមួយគណបក្សគឺកាន់សភាផង និងកាន់រដ្ឋាភិបាលផង។
លោក សម រង្ស៊ី ចាត់ទុក ការកែប្រែរដ្ឋធម្មនុញ្ញលើកទី១០នេះ គឺជាការត្រួសត្រាយផ្លូវឲ្យលោក ហ៊ុន ម៉ាណែត ចូលកាន់តំណែងជានាយករដ្ឋមន្ត្រីបន្តពីលោក ហ៊ុន សែន បានរលូន ខណៈដែលលោកអះអាងថាក្នុងជួរគណបក្សកាន់អំណាចចាស់វស្សានេះក៏មានអ្នកមិនពេញចិត្តនឹងការបន្តអំណាចពីឳពុកទៅកូននោះដែរ។
ការធ្វើវិសោធនកម្មរដ្ឋធម្មនុញ្ញលើកទី១០នេះ គឺកែប្រែចំនួន៦មាត្រា និងចែងបន្ថែមថ្មីពីរមាត្រាទៀត។ ប៉ុន្តែការកែប្រែមាត្រា៨៩ ដែលសំដៅការកោះហៅឥស្សរជន មកបំភ្លឺនៅរដ្ឋសភា និងមាត្រា៩៨ថ្មី ដែលចែងថា រដ្ឋសភាអាចទម្លាក់សមាជិកកគណៈរដ្ឋមន្ត្រី ឬរដ្ឋាភិបាល តាមរយៈញត្តិបន្ទោស ដែលធ្វើឡើងដោយតំណាងរាស្រ្តចំនួន៣០រូប ហើយកែទៅបន្ថែមដល់៤២រូបនោះ ធ្វើឲ្យក្រុមគណបក្សនយោបាយនៅក្រៅរដ្ឋាភិបាលសំដែងការជំទាស់។ ក្រុមគណបក្សទាំងនេះ បានហៅការវិសោធនកម្មរដ្ឋធម្មនុញ្ញទ្រង់ទ្រាយធំនៅពេលនេះ ថាធ្វើឡើងមិនមានតម្លាភាព សំដៅទៅការពារតែប្រយោជន៍របស់បក្សកាន់អំណាច ជាងជាងដើម្បីប្រយោជន៍រួមរបស់ប្រជាជន។
ប៉ុន្តែ លោក កើត រិទ្ធ រដ្ឋមន្ត្រីក្រសួងយុត្តិធម៌ បានបកស្រាយថា ការធ្វើវិសោធនកម្មរដ្ឋធម្មនុញ្ញទាំង១០លើកនេះ គឺសំដៅទៅលើការបំពេញបន្ថែមចន្លោះខ្វះខាតនៃរដ្ឋធម្មនុញ្ញ និងដើម្បីការពារឧត្តមប្រយោជន៍ជាតិ។ តាមលោករដ្ឋមន្ត្រីវ័យក្មេងរូបនេះ ការកែរដ្ឋធម្មនុញ្ញនៅពេលនេះ ដើម្បីធ្វើយ៉ាងណាឲ្យល្អជាងមុន មិនខុសពីប្រទេសផ្សេងៗនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ