ចាប់ពីខែតុលា សមាជិក ប.ស.ស នឹងត្រូវកាត់២%នៃប្រាក់ខែ សម្រាប់បង់ប្រាក់ចូលនិវត្តន៍
ក្រសួងការងារ និងបណ្តុះបណ្តាលវិជ្ជាវៈ បានប្រកាសពីការទុកពេល៩០ថ្ងៃ សម្រាប់ការផ្សព្វផ្សាយនូវការអនុវត្តប្រាក់សោធនចូលនិវត្តន៍ នៃបុគ្គលិកការងារនៅក្នុងវិស័យឯកជន។ បន្ទាប់ពី៩០ថ្ងៃនៃការផ្សព្វផ្សាយ សមាជិកបេឡាជាតិរបបសន្តិសុខសង្គម ដែលចុះបញ្ជីប្រាក់សោធន នឹងត្រូវកាត់២%នៃប្រាក់ប្រចាំខែ សម្រាប់ការបង់ប្រាក់ចូលនិវត្តន៍។
ចុះផ្សាយនៅថ្ងៃ៖
ស្តាប់ - ០១:៥៦
ចាប់ពីខែតុលាឆ្នាំ២០២២ ប្រាក់សោធននិវត្តន៍ នឹងត្រូវចាប់ផ្តើមអនុវត្ត។ ប្រាក់សោធននិវត្តន៍ ក្នុងពេល៥ឆ្នាំដំបូង គឺ ភាគីកម្មករត្រូវបង់ជាប្រចាំខែចំនួន២%នៃប្រាក់ខែខ្ពស់បំផុត៣០០ដុល្លារអាមេរិក ខណៈដែលភាគីថៅកែក្រុមហ៊ុន ក៏តម្រូវឲ្យបង់ភាគទាន២%ជាប្រចាំខែដែរ។
តាមគោលការណ៍ដែលតម្រូវ បុគ្គលិកក្រុមហ៊ុនឯកជន ដែលអាចចូលទទួលបានប្រាក់ចូលនិវត្តន៍ លុះត្រាតែមានអាយុយ៉ាងតិច៦០ឆ្នាំ និងតម្រូវឲ្យបង់ភាគទានយ៉ាងហោចណាស់១២ខែ។ ប្រសិនបើករណីបង់ មិនបាន១២ខែ នោះរបបសន្តិសុខសង្គម នឹងទូទាត់ជូនវិញតែម្តងប៉ុណ្ណោះ។
រីឯបុគ្គលិកក្រុមហ៊ុនឯកជន ដែលអនុវត្តតាមលក្ខខណ្ឌតម្រូវត្រឹមត្រូវ នោះពួកគេនឹងអាចទទួលបានប្រាក់ចូលនិវត្តន៍ក្នុងមួយខែចំនួន២ដង ពេលពួកគាត់ចូលនិវត្តន៍។ ហើយទន្ទឹមនេះអ្នកទាំងនោះ ក៏អាចទទួលបានសេវាព្យាបាល និងថែទាំវេជ្ជសាស្រ្តនៅមន្ទីរពេទ្យ ដែលជាដៃគូរបស់បេឡាជាតិរបបសន្តិសុខសង្គម។
យ៉ាងណាមិញ លក្ខខណ្ឌចម្បងដែលអាចទទួលបានប្រាក់ចូលនិវត្តន៍ ក្រោយអស់សមត្ថភាពបំពេញការងារនៅអាយុ៦០ឆ្នាំ លោក សុក បូរ៉ា ប្រធាននាយកដ្ឋានតាវកាលិកសន្តិសុខសង្គម បានថ្លែងនៅក្នុងវេទិកាស្តីពី ច្បាប់សន្តិសុខសង្គម ដោយផ្តោតលើផ្នែកប្រាក់សោធន នៅថ្ងៃអាទិត្យនេះថា បុគ្គលដែលទទួលប្រាក់ចូលនិវត្តន៍ គឺត្រូវមានឯកសារច្បាស់លាស់អំពីអត្តសញ្ញាណបណ្ណផ្ទាល់ខ្លួន ហើយម្យ៉ាងវិញ បុគ្គលិកក្រុមហ៊ុនទាំងអស់ មិនគួរប្តូរលេខទូរស័ព្ទ ដែលអាចឲ្យពិបាកទំនាក់ទំនង។
គួរជម្រាបថា ប្រព័ន្ធសន្តិសុខសង្គមផ្នែកប្រាក់សោធន ត្រូវបានភាគីសហជីពអះអាង ពីកិច្ចខិតខំទាមទារអស់ពេលជាង៥ឆ្នាំ ដើម្បីធ្វើយ៉ាងណាធានាផលប្រយោជន៍ក្រោយការបំពេញការងាររបស់កម្មករ។ នេះបើតាមលោក អាត់ ធន់ ប្រធានសហភាពការងារកម្ពុជា ដោយបញ្ជាក់បន្ថែមថា នេះជាជោគជ័យដោយការតស៊ូមតិអស់ពេលជាយូរ។
សូមជម្រាបដែរថា ប្រព័ន្ធសន្តិសុខសង្គមផ្នែកប្រាក់សោធន គឺជាជំហានទី៣ បន្ទាប់ពីកម្ពុជា បានអនុវត្តប្រព័ន្ធសន្តិសុខសង្គម លើផ្នែកថែទាំសុខភាព និងហានិភ័យការងារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ