CPP លើកចំណុចខ្លាំងនិងចំណុចខ្សោយរបស់ខ្លួនមកជជែក មុនឆ្ពោះទៅរកការបោះឆ្នោត២០២៣
គណបក្សប្រជាជនកម្ពុជា នាព្រឹកថ្ងៃសៅរ៍នេះ បានបើកសន្និបាតវិសាមញ្ញគណៈកម្មាធិការកណ្តាលរបស់ខ្លួន ២ថ្ងៃ ដើម្បីពិភាក្សាពីការងាររបស់គណបក្ស បន្ទាប់ពីការឈ្នះឆ្នោតក្រុមប្រឹក្សាឃុំ-សង្កាត់ កន្លងទៅនេះ។ អស់ពេលមួយព្រឹក គណបក្សកាន់អំណាចចាស់វស្សាមួយនេះ បានលើកចំណុចខ្លាំង និងចំណុចខ្សោយ ដែលត្រូវពង្រឹងបន្តទៀត សម្រាប់ការបោះឆ្នោតជ្រើសតាំងតំណាងរាស្រ្តឆ្នាំ២០២៣ខាងមុខ។
ចុះផ្សាយនៅថ្ងៃ៖
ស្តាប់ - ០២:១៣
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានគូសបញ្ជាក់ថា សន្និបាតមួយព្រឹកនេះ គណបក្សប្រជាជនកម្ពុជា បានវាយតម្លៃអំពីចំណុចខ្លាំងរបស់ខ្លួន ដែលឈានទៅរកបាននូវជ័យជំនះនៃការបោះឆ្នោតក្រុមប្រឹក្សាឃុំ-សង្កាត់ អាណត្តិទី៥។ ចំណុចខ្លាំងរបស់គណបក្សប្រជាជនកម្ពុជា ត្រង់ជំនឿទុកចិត្តរបស់ប្រជាពលរដ្ឋ។ នេះបើតាមលោក សុខ ឥសាន។
ជាមួយគ្នា ឥស្សរជនគណបក្សកាន់អំណាចរូបនេះ ថា បក្សប្រជាជនកម្ពុជា ក៏បានជជែកពីចំណុចខ្សោយរបស់គូប្រជែងរបស់ខ្លួន ទាំង៩គណបក្សដែលទទួលបានអាសនៈពីការបោះឆ្នោតកន្លងទៅ។ តាមលោក សុខ ឥសាន គណបក្សទាំង៩នោះ មិនមែនជាឧបសគ្គសម្រាប់គណបក្សប្រជាជនកម្ពុជា។ មិនមែនជាឧបសគ្គ ដែលលោក សុខ ឥសាន បញ្ជាក់បន្ថែមថា គណបក្សទាំង៩ សុទ្ធតែកើតចេញពីគណបក្សដែលចាញ់រួចទៅហើយ ម្ល៉ោះហើយទើបមិនទទួលបានការគាំទ្រពីប្រជាពលរដ្ឋ។
ទោជាយ៉ាងណា គណបក្សប្រជាជនកម្ពុជា ក៏ទទួលពីចំណុចខ្សោយរបស់ខ្លួន ដែលត្រូវពង្រឹងបន្ថែមទៀត សម្រាប់ការបោះឆ្នោតថ្នាក់ជាតិឆ្នាំ២០២៣។ ចំណុចខ្សោយត្រង់បញ្ហាមួយចំនួននៅថ្នាក់មូលដ្ឋាន ដែល មន្ត្រីគណបក្សមិនទាន់មានសមត្ថភាពគ្រប់គ្រាន់ ក្នុងការដោះស្រាយបញ្ហាប្រឈមរបស់ពលរដ្ឋ។ លោក សុខ ឥសាន លើកឡើងថា សន្និបាតពេលនេះ ក៏ជាពេលវេលាដាស់តឿនមន្ត្រីគណបក្ស ឲ្យពង្រឹងសមត្ថភាពដោះស្រាយបញ្ហាពលរដ្ឋនៅមូលដ្ឋានបន្ថែមទៀត ដោយកុំរង់ចាំតែក្រុមការងារថ្នាក់ជាតិ ចុះទៅដោះស្រាយ។
ឆ្លងតាមរយៈការបោះឆ្នោតឃុំ-សង្កាត់ឆ្នាំ២០២២ ជាលទ្ធផលផ្លូវការ គណបក្សប្រជាជនកម្ពុជា ទទួលបានចំនួន ៩៣៧៦អាសនៈ ខណៈជាង ២ពាន់អាសនៈ បានរបូតទៅគណបក្សចំនួន៩ដែលជាគូប្រជែង។ ក្នុងនោះគណបក្សភ្លើងទៀន ទទួល២១៩៨ អាសនៈ និងត្រូវកត់សម្គាល់ថា ជាដៃគូប្រជែងរបស់គណបក្សប្រជាជកម្ពុជា សម្រាប់ការបោះឆ្នោតថ្នាក់ជាតិឆ្នាំ២០២៣។
ទោះជារបូតអស់ជាង២ពាន់អាសនៈ តែគណបក្សប្រជាជនកម្ពុជា ចាត់ទុកថា នេះជាគ្រាន់តែដំណើរការប្រជាធិបតេយ្យតាមបែបពហុបក្សហើយក៏មិនមែនជាជោគជ័យអ្វីសម្រាប់គណបក្សភ្លើងទៀនដែរ។ នេះបើតាមលោក សុខ ឥសាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ