លោក សុន ឆ័យ៖ បើគ្មានការប្តឹងខ្ញុំ ខ្ញុំនឹងប្រើវប្បធម៌ជូនពរដៃគូប្រកួតក្រោយការបោះឆ្នោត
ដូចការគ្រោងទុក អនុប្រធានគណបក្សភ្លើងទៀន បានចូលទៅបំភ្លឺនៅតុលាការក្រុងភ្នំពេញនៅព្រឹកថ្ងៃអង្គារទៅតាមបណ្តឹងរបស់ គណៈកម្មាធិការជាតិរៀបចំការបោះឆ្នោត(គ.ជ.ប)។ ក្រោយចេញពីការបំភ្លឺលោក សុន ឆ័យ បានថ្លែងថា លោកស្តាយចំពោះការប្តឹងរូបលោកនេះ ដែលធ្វើទាំងអាជ្ញាកណ្តាល និងដៃគូប្រកួត គឺគណបក្សប្រជាជនកម្ពុជា។ សម្រាប់អ្នកនយោបាយជើងចាស់រូបនេះ ប្រសិនបើគ្មានការប្តឹងរូបលោក គឺលោកនឹងប្រើវប្បធម៌ជូនពរដៃគូប្រកួតក្រោយការបោះឆ្នោត ទោះលទ្ធផលយ៉ាងណាក៏ដោយ។
ចុះផ្សាយនៅថ្ងៃ៖
ស្តាប់ - ០២:០០
នៅមិនទាន់មានការសម្រេចយ៉ាងណាពីតំណាងអយ្យការនៅឡើយ ខណៈមានសកម្មជនរាប់សិបនាក់មកចូលរួមគាំទ្រ លោក សុន ឆ័យ អនុប្រធានគណបក្សភ្លើងទៀននៅមុខតុលាការក្រុងភ្នំពេញ។
បន្ទាប់ពីចូលបំភ្លឺជុំវិញបណ្តឹងរបស់ (គ.ជ.ប) លោក សុន ឆ័យ បានថ្លែងថា លោកស្តាយចំពោះការប្តឹងរូបលោកដែលធ្វើឡើងទាំងអាជ្ញាកណ្តាល និងដៃគូរប្រកួត គឺគណបក្សប្រជាជនកម្ពុជា។
គណៈកម្មាធិការជាតិរៀបចំការបោះឆ្នោត ឬអាជ្ញាកណ្តាល កាលពីថ្ងៃទី១៧ ខែមិថុនា ឆ្នាំ២០២២ បានដាក់ពាក្យប្តឹង លោក សុន ឆ័យ ពីបទបរិហាកេរ្តិ៍ជាសាធារណៈ និងស្នើឲ្យធ្វើលិខិតសុំទោសជាសាធារណៈ។ នៅពេលសួរថាតើព្រមសុំទោស (គ.ជ.ប)ឬអត់ លោក សុន ឆ័យ អះអាងថា គាត់មិនមានកំហុសព្រោះ អ្វីដែលគាត់បាននិយាយគឺដូចគ្នានឹងគណបក្សនយោបាយផ្សេងទៀត និងអង្គការមួយចំនួនដែលបានធ្វើសេចក្តីថ្លែងការណ៍ជុំវិញការបោះឆ្នោតនោះដែរ។
សម្រាប់អ្នកនយោបាយជើងចាស់រូបនេះ ប្រសិនបើគ្មានការប្តឹងរូបលោក គឺលោកនឹងប្រើវប្បធម៌ជូនពរដៃគូប្រកួតក្រោយការបោះឆ្នោត ទោះលទ្ធផលយ៉ាងណាក៏ដោយ។
ឆ្លើយតបនឹងសំណួរដែលថាតើលោកមានលុយ១លានដុល្លារសងជំងឺចិត្តគណបក្សប្រជាជនកម្ពុជាដែរឬអត់?លោក សុន ឆ័យ បានថ្លែងប្រាប់អ្នកសារព័ត៌មាននៅក្រោយពេលចេញពីតុលាការថា លោកបានចោទសួរទៅព្រះរាជអាជ្ញារងវិញថា ប្រសិនបើ«តាស៊ីក្លូ»ជេរគាត់ជាតំណាងរាស្ត្រថាមិនបានជួយរាស្ត្រ តើគាត់គួរប្តឹង«តាស៊ីក្លូ»ទារជំងឺចិត្ត១ម៉ឺនដុល្លារតែឬអត់?
សម្រាប់អ្នកនយោបាយនៃគណបក្សប្រឆាំងរូបនេះគឺលោកគ្មានលុយ១លានដុល្លារសងជំងឺចិត្ត គណបក្សកាន់អំណាចនោះឡើយ ខណៈលោកត្រូវចូលបំភ្លឺម្តងទៀតនៅថ្ងៃ១៥កក្កដា ទៅនឹងបណ្តឹងរបស់គណបក្សប្រជាជនកម្ពុជា។
គណបក្សប្រជាជនកម្ពុជា ដែលប្តឹង លោក សុន ឆ័យ ឲ្យផ្តន្ទាទោសតាមច្បាប់ និងទាមទារសំណងជំងឺចិត្ត៤ពាន់លានរៀល ឬស្មើនឹង ១លានដុល្លារអាមេរិក ចំពោះសំដីលោក សុន ឆ័យ ដែលថាការបោះឆ្នោតឃុំ សង្កាត់ កន្លងមកនេះ មានភាពមិនប្រក្រតី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ