អ្នកនាំពាក្យក្រសួងពាណិជ្ជកម្ម៖ កម្ពុជាមិនប្រឈមខ្វះប្រេងដូចប្រទេសជិតខាងមួយចំនួនទេ
ខណៈប្រទេសជិតខាងមួយចំនួន ប្រឈមនឹងកង្វះប្រេងឥន្ធនៈ អ្នកនាំពាក្យក្រសួងពាណិជ្ជកម្មបានឲ្យដឹងថាកម្ពុជា មិនខ្វះខាតប្រេងប្រើប្រាស់នោះឡើយ។ ការមិនប្រឈមនឹងកង្វះប្រេងរបស់កម្ពុជា គឺដោយការសហការជាមួយវិស័យឯកជន ក្នុងការអនុវត្តយុទ្ធសាស្រ្តស្តុកប្រេងទុកសម្រាប់ការប្រើប្រាស់យ៉ាងហោចណាស់២០ថ្ងៃទៅ១ខែ។ យ៉ាងណា បញ្ហាកង្វល់សម្រាប់កម្ពុជា គឺការបន្តកើនឡើងថ្លៃប្រេងលើទីផ្សារពិភពលោក។
ចុះផ្សាយនៅថ្ងៃ៖
ស្តាប់ - ០១:៤១
លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានឲ្យដឹងថា បច្ចុប្បន្ននេះ កម្ពុជា មិនប្រឈមនឹងហានិភ័យនៃកង្វះប្រេងឥន្ធនៈប្រើប្រាស់ដូចប្រទេសជិតខាងមួយចំនួនឡើយ។ ប្រទេសជិតខាងមួយចំនួនដូចជាតួយ៉ាងថៃ ដែលប្រឈមនឹងហានិភ័យនៃកង្វះខាតប្រេងឥន្ធនៈ ព្រោះតែការបញ្ឈប់ការនាំចូលឧស្ម័នធម្មជាតិរាវ ដោយសារតម្លៃកើនខ្ពស់ និងបរិមាណមានកម្រិត។ ការប្រឈមនឹងហានិភ័យនៃកង្វះខាតប្រេងឥន្ធនៈក្នុងប្រទេសថៃ គឺដោយស្ទើរតែ២ភាគ៣នៃអគ្គីសនីប្រទេសថៃក្នុងរយៈពេល៤ខែដើមឆ្នាំ២០២២នេះ ពឹងផ្អែកលើឧស្ម័នធម្មជាតិនេះ។
ដោយឡែកសម្រាប់កម្ពុជាវិញ តាមអ្នកនាំពាក្យក្រសួងពាណិជ្ជកម្ម កម្ពុជាអនុវត្តយុទ្ធសាស្រ្តស្តុកប្រេងទុកសម្រាប់ការប្រើប្រាស់យ៉ាងហោចណាស់ពី២០ថ្ងៃទៅ១ខែ ហើយការស្តុកទុកប្រេងនេះ នឹងមិនបណ្ដាលឲ្យកម្ពុជា ជួបប្រទះការខ្វះខាតប្រេងនោះឡើយ។
យ៉ាងណា កង្វល់គឺការបន្តកើនឡើងថ្លៃសាំង ទៅតាមទីផ្សារពិភពលោក។ អ្នកនាំពាក្យក្រសួងពាណិជ្ជកម្មនេះបន្ថែមថា បើបញ្ហាកើនឡើងថ្លៃសាំងនេះ នៅតែបន្តអូសបន្លាយ រដ្ឋាភិបាលមានតែឧបត្ថម្ភធុនបន្ថែម ខណៈបច្ចុប្បន្ននេះ រដ្ឋាភិបាលសហការជាមួយក្រុមហ៊ុននាំចូលប្រេងសាំង បញ្ចុះថ្លៃប្រេងសាំងកើនឡើងដល់ 6.5 សេនដុល្លារក្នុងមួយលីត្រ។ ដោយឡែក ដំណោះស្រាយល្អបំផុតក្នុងកាលៈទេសៈនេះ លោកលើកឡើងថា គឺជារួមគ្នាសន្សំសំចៃនៃការប្រើប្រាស់ប្រេងឥន្ធនៈនេះ។
គួរបញ្ជាក់ថា ចាប់ពីថ្ងៃទី២១ ដល់ថ្ងៃ៣០ខែមិថុនា តម្លៃសាំងធម្មតាក្នុងប្រទេសកម្ពុជា ក្នុងមួយលីត្រគឺ៥៨០០រៀល ខណៈប្រេងម៉ាស៊ូតកើនថ្លៃ២០០រៀលទៀត ដល់៦៣០០រៀលក្នុងមួយលីត្រ។ ចំណែកនៅក្នុងប្រទេសថៃ តម្លៃប្រេងសាំងក្នុងមួយលីត្រប្រមាណ៣៤បាត ឬជិត៤០០០រៀល។ រីឯក្នុងប្រទេសវៀតណាម តម្លៃសាំងជាមធ្យមកើនឡើងដល់ប្រមាណ១.៥ដុល្លារ ឬប្រមាណ៦០០០រៀលក្នុងមួយលីត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ