មន្ត្រីពន្ធធនាគារថាការបញ្ជូនខ្លួន សេង ធារី ទៅឃុំនៅព្រះវិហារដើម្បីការពារអសន្តិសុខ តែមេធាវីថាជាការបំបិទសិទ្ធិសេរីភាព
លោក នុត សវនា អ្នកនាំពាក្យអគ្គនាយកដ្ឋានពន្ធនាគាររបស់ក្រសួងមហាផ្ទៃ តាមរយៈវិទ្យុបារាំងអន្តរជាតិនៅថ្ងៃសៅរ៍នេះ បានបញ្ជាក់ថាការបញ្ជូនខ្លួនកញ្ញា សេង ធារី ទៅពន្ធនាគារខេត្តព្រះវិហារ គឺដើម្បីបញ្ចៀសកុំឱ្យមានបាតុកម្មតវ៉ានៅខាងក្រៅពន្ធនាគារដែលនាំឱ្យប៉ះពាល់សន្តិសុខសណ្តាប់ធ្នាប់នៅក្រៅឃុំ។ មូលហេតុរបស់មន្ត្រីពន្ធនាគារនេះ ត្រូវបានលោក ជូង ជូងឺ មេធាវីការពារក្តីកញ្ញាសេង ធារី មើលឃើញថា ជាការបំបិទសិទ្ធិសេរីភាពនិងសិទ្ធិការពារក្តីលោក។
ចុះផ្សាយនៅថ្ងៃ៖
ស្តាប់ - ០២:២៩
សំណុំរឿងកញ្ញា សេងធារី មេធាវីសញ្ជាតិអាមេរិកាំងបានបន្តវិវឌ្ឍន៍ទៅដោយការបញ្ជូនខ្លួននាងទៅឃុំឯពន្ធធានាគារខេត្តព្រះវិហារកាលពីថ្ងៃទី១៥មិថុនា។ មួយថ្ងៃក្រោយ បន្ទាប់ពីតុលាការប្រកាសកាត់ទោសឲ្យជាប់ពន្ធនាគារចំនួន៦ឆ្នាំ ពីបទរួមគំនិតក្បត់ក្នុងសំណុំរឿងមាតុភូមិនិវត្តន៍៩វិច្ឆិកា របស់លោក សម រង្ស៊ី និងត្រូវបានសមត្ថកិច្ចចាប់ខ្លួនភ្លាមៗបញ្ជូនទៅកាន់ពន្ធនាគារព្រៃស។
លោក នុត សវនា អ្នកនាំពាក្យអគ្គនាយកដ្ឋានពន្ធនាគាររបស់ក្រសួងមហាផ្ទៃ នៅថ្ងៃទី១៨មិថុនា បានបញ្ជាក់ថា ការបញ្ជូនកញ្ញា សេង ធារី ទៅដាក់ពន្ធធានាគារនៅខេត្តព្រះវិហារនោះ គឺជាវិធានការបង្ការនិងទប់ស្កាត់បញ្ហាអសន្តិសុខសណ្តាប់ធ្នាប់ ដែលនឹងបង្កឡើងដោយសកម្មភាពបាតុកម្មតវ៉ានៅខាងក្រៅឃុំពន្ធធានាគារព្រៃស។ លោកអ្នកនាំពាក្យអគ្គនាយកដ្ឋានពន្ធនាគារ បន្តថា បញ្ហាអសន្តិសុខក្រៅពន្ធធនាគារនោះ មិនត្រឹមតែបង្កការលំបាកដល់មន្ត្រីលោកទេ តែក៏ប៉ះពាល់ដល់ដំណើរការសួរសុខទុក្ខរបស់សាច់ញាតិអ្នកជាប់ឃុំដទៃទៀត ឬអាចថា ពន្ធធនាគារព្រៃសនឹងត្រូវបិទបណ្តោះអាសន្នដោយសាររឿងក្តីកញ្ញា សេង ធារី ផង។
លោក នុត សវនា អ្នកនាំពាក្យអគ្គនាយកដ្ឋានពន្ធនាគាររបស់ក្រសួងមហាផ្ទៃទទួលស្គាល់ថា ការបញ្ជូនកញ្ញា សេង ធារី ទៅឃុំខ្លួននៅពន្ធនាគារឆ្ងាយដាច់ដោយឡែកនោះ គឺប៉ះពាល់ដល់សិទ្ធិនាងពិតមែន ក៏ប៉ុន្តែអាជ្ញាធរចាំបាច់ត្រូវអនុវត្តវិធានការនេះ ក្រោយវាយតម្លៃពីហានិភ័យនៃផលប៉ះពាល់។
តាមរយៈវិទ្យុបារាំងអន្តរជាតិrfi លោកមេធាវី ជូង ជូងឺ មេធាវីការពារក្តីកញ្ញាសេង ធារី មើលឃើញថាជាការបំបិទសិទ្ធិសេរីភាពនិងសិទ្ធិការពារក្តីរបស់កូនក្តីលោក។ ទាំងដែលជាក់ស្តែង មេធាវីមានសិទ្ធិចូលជួបកូនក្តីបាន តែលោកមេធាវី ជូង ជូងឺ បញ្ជាក់ថា នៅថ្ងៃចន្ទទី២០មិថុនាខាងមុខ លោកនឹងដាក់លិខិតសុំការអនុញ្ញាតិសួរសុខទុក្ខកូនក្តីលោក ព្រោះលោកមិនចង់ខកដំណើរ ទៅហើយត្រូវគេមិនអោយចូលជួបនោះឡើយ។
លោកមេធាវី ជូង ជូងឺ បានប្រាប់ថា លោកមិនត្រូវបានអនុញ្ញាតិជួបកូនក្តីលោកតាំងពីថ្ងៃនាងត្រូវបានចាប់ខ្លួនមកម៉្លេះ ហើយសូម្បីតែដំណឹងពីការបញ្ជូនខ្លួននាងទៅពន្ធធនាគារព្រះវិហារក៏លោកពុំបានទទួលនោះដែរ។ យ៉ាងណាមិញ ពាក្យបែបបទប្តឹងទៅសាលាឧទ្ធរណ៍ និងលិខិតផ្ទេរកញ្ញា សេង ធារី មកពន្ធធនាគារព្រៃស នៅរាជធានីភ្នំពេញវិញ នឹងត្រូវរៀបចំឡើង បន្ទាប់ពីលោកបានជួបនិងនិយាយជាមួយកូនក្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ