បក្សប្រជាធិបតេយ្យមូលដ្ឋានគ្រោងជួបបក្សផ្សេងទៀត ដើម្បីតទល់ជាមួយ គ.ជ.ប
គណបក្សប្រជាធិបតេយ្យមូលដ្ឋានកំពុងប្រមូលភាពមិនប្រក្រតី នៅក្នុងដំណើរការបោះឆ្នោត កាលពីថ្ងៃទី០៥ ខែមិថុនាកន្លងទៅ និងទាក់ទងជាមួយគណបក្សផ្សេងទៀត ដើម្បីរួមគ្នាតទល់ជាមួយគណៈកម្មាធិការជាតិរៀបចំការបោះឆ្នោត។ នេះបើតាមលោក យ៉ង សាំងកុមារ ក្នុងសន្និសីទកាសែតរបស់គណបក្ស នៅព្រឹកថ្ងៃទី០៧ ខែមិថុនានេះ ខណៈបក្សនេះទទួលយកលទ្ធផលនៃការបោះឆ្នោត ដោយការមិនពេញចិត្ត។
ចុះផ្សាយនៅថ្ងៃ៖
ស្តាប់ - ០១:៥៦
លោកបណ្ឌិត យ៉ង សាំងកុមារ ប្រធានគណៈកម្មារធិការនាយករបស់គណបក្សប្រជាធិបតេយ្យមូលដ្ឋាន នៅក្នុងសន្និសីទកាសែតនា ព្រឹកថ្ងៃទី០៧ ខែមិថុនា នេះបានបញ្ជាក់ថាការតទល់ជាមួយ គ.ជ.ប គឺក្នុងន័យឲ្យមានការកែប្រែឲ្យល្អសម្រាប់ការបោះឆ្នោត ឆ្នាំ២០២៣ខាងមុខនេះ។
ជុំវិញការរួមគ្នាជាមួយបក្សផ្សេងទៀត ដើម្បីតទល់ជាមួយគណៈកម្មាធិការជាតិរៀបចំការបោះឆ្នោត(គ.ជ.ប), លោក យ៉េង វីរៈ ប្រធានគណបក្សប្រជាធិបតេយ្យមូលដ្ឋានបានលើកឡើងដែរថា រហូតមកដល់ពេលនេះគឺលោកមិនអាចបញ្ចេញឈ្មោះបក្សទាំងនោះបានទេ ទោះជាបានទាក់ទងគ្នាខ្លះហើយក៏ដោយ ប៉ុន្តែលោករីករាយស្វាគមន៍ជាមួយគណបក្សណាក៏ដោយ ដែលបានមើលឃើញពីភាពចាំបាច់ក្នុងការកែប្រែប្រព័ន្ធបោះឆ្នោតរបស់កម្ពុជា។
លោកបណ្ឌិត យ៉ង សាំងកុមារ បញ្ជាក់ថា គណបក្សប្រជាធិបតេយ្យមូលដ្ឋានទទួលយកលទ្ធផលនៃការបោះឆ្នោតដោយការមិនពេញចិត្ត ឬទទួលយកដោយភាពឈឺចាប់។ លោកបន្តថា ការទទួលដោយភាពឈឺចាប់នេះ គឺមិនមែនដោយសារតែគណបក្សរបស់លោកមិនបានកៅអីច្រើននោះទេ ប៉ុន្តែគណបក្សរបស់លោកចង់បានការប្រកួតប្រជែងមួយដោយសេរី និងស្មើភាពគ្នា។
គិតមកដលពេល់នេះ គណបក្សប្រជាធិបតេយ្យមូលដ្ឋាន ទទួលបាន ៦អាសនៈ នៅក្នុង ៤ឃុំ ដែលមានកើនឡើង១អាសនៈ។ បើតាមលោកលោកបណ្ឌិត យ៉ង សាំងកុមារ សំឡេងឆ្នោតរបស់គណបក្សលោកមានការកើនឡើងខ្លាំងនៅក្នុងឃុំចំនួន៣។
ក្នុងសន្និសីទសារព័ត៌មាន អំពីលទ្ធផលសង្កេតការណ៍បោះឆ្នោត កាលពីថ្ងៃទី០៦ ខែមិថុនា ក្រុមអ្នកសង្កេតការណ៍អន្តរជាតិ ដែលមកពីបណ្តាប្រទេសមួយចំនួន ដូចជា ចិន ម៉ាឡេស៊ី និងហ្វីលីពីន ជាដើម បានគូសបញ្ជាក់ពីសភាពការណ៍បោះឆ្នោតឃុំ-សង្កាត់ អាណត្តិទី០៥ នៅកម្ពុជា ថា បានប្រព្រឹត្តទៅដោយរលូន និងមានភាពល្អប្រសើរ។ប៉ុន្តែសម្រាប់ក្រុមអង្គការសង្គមស៊ីវិលនៅក្នុងស្រុក បានកត់សម្គាល់ ពីបញ្ហាបំភិតបំភ័យសិទ្ធិរបស់ពលរដ្ឋ ដែលកើតមាន នៅតាមការិយាល័យនាអំឡុងពេលបោះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ