បោះឆ្នោតឃុំ-សង្កាត់៖ ក្រុមអ្នកសង្កេតការណ៍អន្តរជាតិ ថា សេរី យុត្តិធម៌ តែអង្គការអន្តរជាតិខ្លះ ថា មិនមានប្រជាធិបតេយ្យ
ក្រុមអ្នកសង្កេតការណ៍អន្តរជាតិមួយចំនួន ដែលបានដាក់អ្នកសង្កេតការណ៍ នាអំឡុងពេលបោះឆ្នោតឃុំ-សង្កាត់ អាណត្តិទី៥ បានវាយតម្លៃ និងចាត់ទុកថា ការបោះឆ្នោតជ្រើសរើសក្រុមប្រឹក្សាឃុំ-សង្កាត់ ថ្ងៃទី០៥មិថុនា បានប្រពឹត្តទៅដោយសេរី យុត្តិធម៌។ ក៏ប៉ុន្តែក្រុមអ្នកឃ្លាំមើលអន្តរជាតិខ្លះ បានលើកឡើងថា ការបោះឆ្នោតពេលនេះ មិនមានប្រជាធិបតេយ្យ ដ្បិតមានការគាបសង្កត់លើសិទ្ធិសេរីភាពពលរដ្ឋ។
ចុះផ្សាយនៅថ្ងៃ៖
ស្តាប់ - ០២:២៩
ថ្លែងនៅក្នុងសន្និសីទសារព័ត៌មាន អំពីលទ្ធផលសង្កេតការណ៍បោះឆ្នោត នាព្រឹកនេះ ក្រុមអ្នកសង្កេតការណ៍អន្តរជាតិ ដែលមកពីបណ្តាប្រទេសមួយចំនួន ដូចជា ចិន ម៉ាឡេស៊ី និងហ្វីលីពីន ជាដើម បានគូសបញ្ជាក់ពីសភាពការណ៍បោះឆ្នោតឃុំ-សង្កាត់ អាណត្តិទី០៥ នៅកម្ពុជា ថា បានប្រព្រឹត្តទៅដោយរលូន និងមានភាពល្អប្រសើរ។
ដោយដាក់អ្នកសង្កេតការណ៍ចំនួន៣រាជធានី-ខេត្ត ក្រុមអ្នកសង្កេតការណ៍អន្តរជាតិ បានវាយតម្លៃជាទូទៅ ថា ការបោះឆ្នោតឃុំ-សង្កាត់ ពេលនេះ ធ្វើឡើងដោយសេរី យុត្តិធម៌ ដែលជាការបញ្ជាក់ពីការអនុវត្តនូវលទ្ធិប្រជាធិបតេយ្យនៅកម្ពុជា នាពេលបច្ចុប្បន្ន។ ក្រុមអ្នកសង្កេតការណ៍អន្តរជាតិ ដែលមកតាមការអញ្ជើញរបស់គណៈកម្មាធិការជាតិរៀបចំការបោះឆ្នោត ទាំងនោះ បានកត់សម្គាល់ថា បរិយាកាសនៅថ្ងៃបោះឆ្នោត មានភាពស្ងប់ស្ងាត់ ដោយគ្មានបាតុភាពហិង្សា ឬការតវ៉ាណាមួយឡើយ។
ក៏ប៉ុន្តែសម្រាប់ក្រុមអង្គការសង្គមស៊ីវិលនៅក្នុងប្រទេស បានកត់សម្គាល់ ពីបញ្ហាបំភិតបំភ័យសិទ្ធិរបស់ពលរដ្ឋ ដែលកើតមាន នៅតាមការិយាល័យនាអំឡុងពេលបោះឆ្នោត។ អង្គការលីកាដូ ដែលធ្វើការពាក់ព័ន្ធផ្នែកសិទ្ធិមនុស្ស បានអះអាងថា ខ្លួនទទួលការរាយការណ៍ពីរាជធានី-ខេត្តមួយចំនួន ថា មានមេឃុំ ចៅសង្កាត់ បានកត់ត្រាឈ្មោះ ឬចំនួនប្រជាពលរដ្ឋដែលបានទៅបោះឆ្នោត ។ ហើយករណីខ្លះ មេភូមិ និងអនុប្រធានភូមិ អង្គុយនៅក្រៅច្រកចូលនៃទីតាំងបោះឆ្នោត និងតម្រូវឱ្យពលរដ្ឋប្រាប់ឈ្មោះ ក្រោយពីការបោះឆ្នោតរួចរាល់។
បញ្ហាបំភិតបំភ័យ និងគាបសង្កត់លំហពលរដ្ឋ ក៏ជាបញ្ហាដែលអង្គការអន្តរជាតិមួយចំនួន កត់សម្គាល់ផងដែរ។ បណ្តាញអាស៊ីដើម្បីការបោះឆ្នោតដោយសេរី (ANFREL) បានចេញរបាយការណ៍វាយតម្លៃជាមុនថា ការបោះឆ្នោតឃុំ-សង្កាត់ នឹងមិនមានលទ្ធផលបោះឆ្នោតពិតប្រាកដ និងត្រឹមត្រូវតាមច្បាប់នោះទេ ប្រសិនបើការគំរាមកំហែងប្រឆាំងនឹងគណបក្សជំទាស់ និងសង្គមស៊ីវិល នៅតែកើតមាន។ បើតាមអង្គការអន្តរជាតិមួយនេះ ប្រទេសកម្ពុជានៅតែខ្វះស្ដង់ដារបោះឆ្នោតតាមលទ្ធិប្រជាធិបតេយ្យ។
គួរបញ្ជាក់ថា សម្រាប់ការបោះឆ្នោតឃុំ-សង្កាត់ អាណត្តិទី៥នេះ សហភាពអឺរ៉ុប បានបន្តប្រកាសថា មិនដាក់អ្នកសង្កេតការណ៍សម្រាប់ការបោះឆ្នោត ដ្បិតមិនមានវត្តមាននៃគណបក្សប្រឆាំង។ ក៏ប៉ុន្តែ អវត្តមានអ្នកសង្កេតការណ៍សហភាពអឺរ៉ុបពេលនេះ សម្រាប់ គ.ជ.ប មិនមែនជាបញ្ហានោះទេ។ ដោយថ្លែងនៅក្នុងសន្និសីទសារព័ត៌មាន ក្រោយបញ្ចប់ការបោះឆ្នោត លោក ប្រាជ្ញ ចន្ទ ដែលជាប្រធានគ.ជ.ប បានឆ្លើយទៅនឹងសំណួរអ្នកសារព័ត៌មានថា អវត្តមានអ្នកសង្កេតការណ៍សហភាពអឺរ៉ុប គួរសួរទៅសហគមន៍អឺរ៉ុប មិនគួរសួរមកគ.ជ.ប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ