លោក សម រង្ស៊ី ថា គ.ជ.ប និងបក្សកាន់អំណាចមិនអាចលួចសន្លឹកឆ្នោតទាំងស្រុងទេ ខណៈភ្លើងទៀនទទួលបានជាង២ពាន់អាសនៈ
ប៉ុន្មានម៉ោងក្រោយការបោះឆ្នោត និងរាប់សន្លឹកឆ្នោតកាលពីថ្ងៃអាទិត្យម្សិលមិញ លោក សម រង្ស៊ី ដែលជាស្ថាបនិកគណបក្សភ្លើងទៀន បានសរសេរនៅលើទំព័រហ្វេសប៊ុករបស់លោកថា លទ្ធផលដំបូងនៃការបោះឆ្នោត ឃុំ សង្កាត់នៅថ្ងៃទី០៥ មិថុនាបង្ហាញឲ្យឃើញថាគ្មានជនផ្តាច់ការណាអាចរំលាយទឹកចិត្តប្រជាពលរដ្ឋខ្មែរបានឡើយ។ ការលើកឡើងរបស់លោក សម រង្ស៊ី ដូច្នេះគឺធ្វើឡើងបន្ទាប់ពីលទ្ធផលបឋមនៃការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥នេះបង្ហាញថា គណបក្សកាន់អំណាចមិនអាចឈ្នះទាំងអស់តែម្នាក់ឯងបានទេ។
ចុះផ្សាយនៅថ្ងៃ៖
ស្តាប់ - ០២:៣២
នៅក្នុងសំណេរលោក សម រង្ស៊ី ដែលជាស្ថាបនិកគណបក្សភ្លើងទៀន ហើយពេលនេះបាននិរទេសខ្លួននៅឯក្រៅប្រទេសនោះ បង្ហាញថាគណបក្សប្រជាជនកម្ពុជា ដែលកាន់អំណាចបច្ចុប្បន្នមិនអាចក្តោបក្តាប់អាសនៈក្រុមប្រឹក្សាឃុំ សង្កាត់ អាណត្តិទី៥នេះ ១០០%តែឯងទេ គឺគណបក្សភ្លើងទៀន ដែលជាគណបក្សប្រឆាំងក៏បានជាប់ជាមេឃុំ និងក្រុមប្រឹក្សាខ្លះដែរ បើទោះណាជាការបោះឆ្នោតនេះត្រូវលោកចោទប្រកាន់ថា មិនសេរី ត្រឹមត្រូវ និងយុត្តិធម៌ក៏ដោយ។
តាមលោក សម រង្ស៊ី ទោះជាមានបរិយាកាសគំរាមកំហែង បំភិតបំភ័យ ក្រោយពីការរំលាយគណបក្សសង្គ្រោះជាតិកាលពីឆ្នាំ២០១៧ ក៏ដោយក៏មកទល់ពេលនេះ សន្លឹកឆ្នោតតាមរយៈគណបក្សភ្លើងទៀន ក៏បាននៅសេសសល់មួយចំនួនដែរ បន្ទាប់ពីការលួចបន្លំ។ សន្លឹកឆ្នោត ដែលនៅសេសសល់នោះ គឺជាអាសនៈក្រុមប្រឹក្សាឃុំ សង្កាត់ ដែលអាសនៈទាំងនេះ គណបក្សភ្លើងទៀនដណ្តើមបានមកវិញខ្លះនោះ ត្រូវលោក សម រង្ស៊ី ថាជាការបរាជ័យរបស់គណបក្សកាន់អំណាចទៅវិញ។
មេដឹកនាំនយោបាយប្រឆាំងដែលជាប់បណ្តឹង និងការផ្តន្ទាទោសជាច្រើនសំណុំរឿងពីក្រុងភ្នំពេញរូបនេះ អះអាងថាសន្ទុះនៃកម្លាំងប្រជាធិបតេយ្យ ដែលនៅសេសសល់ពេលនេះ គឺជាកម្លាំងដែលអាចវាយបំបែកនៅក្នុងការបោះឆ្នោតថ្នាក់ជាតិនៅឆ្នាំ២០២៣ខាងមុខ។
ជុំវិញការលើកឡើងរបស់លោក សម រង្ស៊ី បែបនេះ នៅមិនមានការឆ្លងឆ្លើយណាមួយពីគណបក្សកាន់អំណាច ឬគណៈកម្មាធិការជាតិរៀបចំការបោះឆ្នោត(គ.ជ.ប)ទេ ក៏ប៉ុន្តែចាប់តាំងពីការរាប់សន្លឹកឆ្នោតរហូតដល់ការប្រកាសលទ្ធផលឆ្នោតបឋម គណបក្សកាន់អំណាច និងគ.ជ.ប តែងអះអាងថាបរិយាកាសនៃការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥នេះ មានភាពសេរី ត្រឹមត្រូវ និងយុត្តិធម៌ ដោយគ.ជ.ប បញ្ជាក់ថាខ្លួនបានប្រឹងប្រែងយ៉ាងខ្លាំង ព្រមទាំងមានការទទួលស្គាល់ពីអ្នកសង្កេតការណ៍ជាតិ និងអន្តរជាតិផងដែរ។
សូមរំលឹកថា កាលពីឆ្នាំ ២០១៧ អតីតគណបក្សសង្គ្រោះជាតិបានឈ្នះអាសនៈក្រុមប្រឹក្សាចំនួន ៥០០៧ អាសនៈ ក៏ប៉ុន្តែត្រូវបានធ្លាក់ទៅលើគណបក្សប្រជាជនវិញទាំងអស់ ក្រោយពីតុលាការកំពូលរំលាយគណបក្សសង្គ្រោះជាតិ។ ខណៈដែលគណបក្សសង្គ្រោះជាតិមិនអាចត្រលប់មកវិញបាន គណបក្សភ្លើងទៀន ដែលជាគណបក្សសម្ព័ន្ធជាមួយគណបក្សសិទ្ធិមនុស្ស បង្កើតបានជាសង្គ្រោះជាតិនោះ បានចេញមកប្រជែងរកសម្លេងឆ្នោតក្រុមប្រឹក្សាឃុំសង្កាត់ពេលនេះ ហើយត្រូវគេរំពឹងថានឹងដណ្តើមបានអាសនៈក្រុមប្រឹក្សាបឋមប្រមាណជាង២ពាន់មកវិញ ក្នុងចំណោមអាសនៈក្រុមប្រឹក្សាសរុបជាង១ម៉ឺន និងបានឈ្នះជាមេឃុំ តែ៤ប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ