សង្គមស៊ីវិល៖ សភាពការណ៍ទូទៅបឋមក្នុងមណ្ឌលបោះឆ្នោតមួយចំនួនក្នុងភ្នំពេញ ដំណើរការប្រក្រតី
តាមការអង្កេតការណ៍របស់អង្គការនិចហ្វិកនិងអង្គការComfrel ក្នុងពេលប្រមាណ២ម៉ោងក្រោយការិយាល័យបោះឆ្នោតបានបើកទ្វារដំណើរការ ដំណើរការបោះឆ្នោតក្នុងមណ្ឌលមួយចំនួនក្នុងរាជធានីភ្នំពេញ បានប្រព្រឹត្តទៅដោយប្រក្រតី។ ជាទិដ្ឋភាពរួម តាមមណ្ឌលបោះឆ្នោត មានអ្នកទៅបោះឆ្នោតយ៉ាងកុះករ និងមានវត្តមានពីបណ្ដាអ្នកអង្កេតការណ៍ ភ្នាក់ងារគណបក្ស កម្លាំងសន្តិសុខជាច្រើនរូប។
ចុះផ្សាយនៅថ្ងៃ៖
ស្តាប់ - ០១:២៥
ចាស់ជរា និងជនពិការ បានចូលរួមបោះឆ្នោតយ៉ាងសស្រាក់សស្រាំ ដោយមានទាំងអ្នកខ្លះសែងនិងគ្រាពី ពីរ៉ឺម៉កកង់បី ចូលក្នុងការិយាល័យបោះឆ្នោត។ នេះជាការពិពណ៌នារបស់ លោក កន សាវ៉ាន អ្នកសម្របសម្រួលនិងអ្នកអង្កេតតស៊ូមតិComfrel ពីទិដ្ឋភាពទូទៅក្នុងមណ្ឌលបោះឆ្នោតមួយកន្លែងក្នុងវត្តមង្គត់បុរី រាជធានីភ្នំពេញ។ ក្រៅពីនេះ នគរបាលចរាចរណ៍ថែមទាំងបានសម្របសម្រួលចរាចរណ៍ក្នុងមណ្ឌលបោះឆ្នោតនេះផងដែរ។
ជាការកត់សម្គាល់ របស់លោកកន សាវ៉ាន ការិយាល័យបោះឆ្នោតចំនួន២នៃមណ្ឌលបោះឆ្នោតក្នុងវត្តមង្គត់បុរី មានអ្នកទៅតម្រង់ជួរបោះឆ្នោតច្រើនកុះករ គឺការិយាល័យលេខ១៣៦៤ និង១៣៦៥ ចំណែកការិយាល័យផ្សេងទៀតមានអ្នកទៅបោះឆ្នោតតិចតួច និងគ្មានតែម្ដង។
ដោយឡែក នៅតាមមណ្ឌលបោះឆ្នោតមួយចំនួនផ្សេងទៀត នៅក្នុងរាជធានីភ្នំពេញ ដូចជានៅសាលារៀនសន្ធរម៉ុក សាលារៀនទឹកល្អក់ និងសាលារៀនអនុវត្ត តាមលោក សម សុគន្ធាមី ប្រធានអង្កការនិចហ្វិក ក្នុងរយៈពេលពីរម៉ោងក្រោយការបោះឆ្នោតក្រុមប្រឹក្សាឃុំសង្កាត់បានចាប់ផ្ដើម មានអ្នកមកបោះឆ្នោតក្នុងកម្រិតច្រើនបង្គួរ។
ក្រៅពីនេះ តាមមណ្ឌលបោះឆ្នោតទាំងនោះ មានវត្តមានភ្នាក់ងារគណបក្ស និងអ្នកសង្កេតការណ៍ពីអង្គការក្រៅរដ្ឋាភិបាល និងកម្លាំងសន្តិសុខដើម្បីរក្សារៀបរយ ក្នុងដំណើរការបោះឆ្នោតនេះ។
គួរបញ្ជាក់ថា ការិយាល័យបោះឆ្នោតនៅទូទាំងប្រទេសបានបើកដំណើរ សម្រាប់ការបោះឆ្នោតក្រុមប្រឹក្សាឃុំសង្កាត់ នៅថ្ងៃទី៥ខែមិថុនា ចាប់ពីម៉ោង៧ព្រឹកមក។ បើតាមគណៈកម្មាធិការជាតិរៀបចំការបោះឆ្នោត ការបោះឆ្នោតនឹងត្រូវបិទបញ្ចប់នៅម៉ោង៣រសៀល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ