ការស្ទង់មតិ៖កុមារ និងយុវជន៨០% រងសម្ពាធផ្លូវចិត្តដោយសារតែគ្រួសារជាប់បំណុល
អង្គការសង្គមស៊ីវិលចំនួន៦ ដែលធ្វើការពាក់ព័ន្ធនឹងសិទ្ធិកុមារ បានចេញរបាយការណ៍ស្ទង់មតិមួយដោយរកឃើញថា កុមារ និងយុវជនប្រហែល៨០%រងសម្ពាធផ្លូវចិត្តដោយសារតែគ្រួសារបស់ពួកគេជាប់បំណុល ខណៈកូវីដ១៩។ ការចេញរបាយការណ៍នេះធ្វើឡើង នៅក្នុងទិវាសិទ្ធិកុមារអន្តរជាតិ១មិថុនា ដោយបានភ្ជាប់ផងដែរថា កុមារ និងយុជនច្រើនជាង៧០% នៅតែមានការបារម្ភពីអនាគតរបស់ពួកគេ ទោះបីជាសាលារៀនបានបើកទ្វារឡើងវិញ។
ចុះផ្សាយនៅថ្ងៃ៖
ស្តាប់ - ០២:១៥
ក្នុងសេចក្តីថ្លែងការណ៍រួមសម្រាប់ទិវាកុមារអន្តរជាតិ១មិថុនា២០២២ អង្គការចំនួន៦ រួមមាន អង្គការSave the Children, Plan International, ChildFund Alliance និង អង្គការទស្សនពិភពលោក(World Vision) ជាដើម បានកត់សំគាល់ថា បើទោះបីជារដ្ឋាភិបាលមានការគ្រប់គ្រងបានល្អលើបញ្ហាកូវីដ១៩ក៏ដោយ ក៏ប៉ុន្តែលទ្ធផលនៃជំងឺឆ្លងមួយនេះ បានធ្វើឲ្យគ្រួសារជាច្រើនមានសម្ពាធខាងផ្លូវសេដ្ឋកិច្ច។ សម្ពាធសេដ្ឋកិច្ចដែលរាប់បញ្ចូលការចំណាយលើម្ហូបអាហារប្រចាំថ្ងៃ ការធ្វើដំណើរ ការបង់ថ្លៃសាលារបស់ក្មេងៗជាដើម។
ជាលទ្ធផលនៃការស្ទង់មតិទៅលើកុមារ និងយុវជនចំនួន៥៣នាក់មកពីតំបន់ផ្សេងគ្នា នៃខេត្តចំនួន១៣ គឺប្រហែល៨០%ពួកគេបាននិយាយថា ពួកគេរងសម្ពាធផ្លូវចិត្ត ដោយសារតែគ្រួសារបស់ពួកគេជាប់បំណុល ខណៈកូវីដ១៩។ ក្នុងការស្ទង់មតិនេះក៏បង្ហាញដែរថា ៧០% នៃកុមារ និងយុវជន ដែលបានឆ្លើយតបនឹងការសម្ភាស គឺពួកគេនៅតែមានការបារម្ភពីអនាគតរបស់ពួកគេ ទោះបីជាសាលារៀនបានបើកទ្វារឡើងវិញ។
ជាមួយគ្នានេះ កុមារ និងយុវជនក៏បាននិយាយពីការព្រួយបារម្ភ នៃបញ្ហាសុខភាពផ្លូវចិត្ត ដូចជា អំពើហិង្សាផ្លូវអារម្មណ៍ តួយ៉ាង ត្រូវបានគេចំអក បៀតបៀន ឬស្រែកដាក់ មិនថានៅផ្ទះឬក្នុងសាលារៀន ហើយខ្លះទៀតរងនូវអំពើហិង្សាលើរាងកាយ។ ទាំងនេះជាលទ្ធផល នៃវិបត្តិសេដ្ឋកិច្ចគ្រួសារដោយសារកូវីដ១៩ ខណៈ២១% បាននិយាយថា ពួកគេមានរើសអើងដោយសារតែនិន្នាការភេទ។
ដើម្បីឆ្លើយតបនឹងបញ្ហាដែលបានរកឃើញនេះ ក្រុមអង្គការដែលធ្វើការពាក់ព័ន្ធនឹងសិទ្ធិកុមារ លើកឡើងថា រដ្ឋគួរផ្តល់ប្រាក់ឧបត្ថម្ភដល់គ្រួសារងាយរងគ្រោះ ដើម្បីជៀសវាងការបោះបង់ការសិក្សា។ ឆ្លើយតបជាបន្ទាន់នូវអំពើហិង្សារាប់ទាំងនៅក្នុងសាលារៀន។ ប្រើប្រាស់អ៊ីនធឺណែតដោយសុវត្ថិភាពដើម្បីឆ្លើយតបនឹងការកេងប្រវ័ញ្ចផ្លូវភេទ និងផ្សព្វផ្សាយបន្ថែមពីសិទ្ធិកុមារនៅក្នុងសហគមន៍តាមរយៈយុទ្ធនាការជាមួយឳពុកម្តាយ និងអ្នកថែទាំកុមារ ដើម្បីធានាថា កុមារគ្រប់រូបត្រូវបានការពារនូវសិទ្ធិរបស់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ