លោក គង់ រ៉ៃយ៉ា ត្រៀមប្តឹងជំទាស់មកគជបថ្នាក់ជាតិ ក្រោយរងការផាកពិន័យប្រាក់៥លានរៀលពីគខបខេត្តកំពង់ចាម
លោក គង់ រ៉ៃយ៉ា ប្រធានក្រុមទ្រទ្រង់ស្រុកកង់មាស និងជាប្រធានគណបក្សភ្លើងទៀនឃុំស្តៅបានអះអាងមកវិទ្យុបារាំងអន្តរជាតិនាព្រឹកថ្ងៃទី២៩ ឧសភានេះថា លោកនឹងរៀបចំពាក្យបណ្តឹងប្តឹងជំទាស់ទៅកាន់គណៈកម្មាធិការជាតិរៀបចំការបោះឆ្នោត បន្ទាប់ពីគណៈកម្មាធិការរៀបចំការបោះឆ្នោតខេត្តកំពង់ចាមបានសម្រេចផាកពិន័យលោកចំនួន៥លានរៀល ពីបទចែកថវិកា និងអំណោយដល់បេក្ខជនចំនួន១១ឃុំ។ តាមរយៈសំណុំរឿងនេះ លោក គង់ រ៉ៃយ៉ាយល់ថា ជារឿងអយុត្តិធម៌សម្រាប់រូបលោក និងចាត់ទុកថា ជាការបំផិតបំភ័យមកដល់គណបក្សភ្លើងទៀនពីសំណាក់គណបក្សប្រជាជនកម្ពុជា។
ចុះផ្សាយនៅថ្ងៃ៖
ស្តាប់ - ០២:៥៨
ថ្លែងមកវិទ្យុបារាំងអន្តរជាតិRFI លោក គង់ រ៉ៃយ៉ា ក្នុងនាមជាប្រធានក្រុមទ្រទ្រង់ស្រុកកង់មាស និងជាប្រធានគណបក្សភ្លើងទៀនឃុំស្តៅបាននិយាយថា លោកមិនមានលទ្ធភាពឯណាទៅបង់ប្រាក់ផាកពិន័យចំនួន៥លានរៀល តាមការបង្គាប់របស់គខបខេត្តកំពង់ចាមនោះទេ។ ផ្ទុយទៅវិញ លោកនឹងពិភាក្សាជាមួយមេធាវី ដើម្បីរៀបចំនីតិវិធីប្តឹងជំទាស់ទៅកាន់គជបថ្នាក់ជាតិ ដើម្បីស្វែងរកយុត្តិធម៌មកឱ្យរូបលោកវិញ។
ការបញ្ជាក់ពីលោក គង់ រ៉ៃយ៉ាងបែបនេះ ក្រោយពីគខបខេត្តកំពង់ចាមសម្រេចផាកពិន័យរូបលោកចំនួន៥លានរៀលពីបទចែកថវិកានិងអំណោយដល់បេក្ខជន១១ឃុំស្របតាមមាត្រា១៧១ និងមាត្រា ១៨១ ស្តីពីការបោះឆ្នោតជ្រើសរើសក្រុមប្រឹក្សាឃុំសង្កាត់។ ការសម្រេចផាកពិន័យបែបនេះ បន្ទាប់ពីតំណាងគណបក្សប្រជាជនកម្ពុជា អ្នកស្រី ជឹន ដាវី ដាក់ពាក្យបណ្តឹងមកគខបខេត្តកំពង់ចាមឱ្យដកបេក្ខជនគណបក្សភ្លើងទៀនទាំង១១ឃុំចេញពីបញ្ជីបោះឆ្នោត។ ប៉ុន្តែត្រូវបានគខបខេត្តកំពង់ចាម បដិសេធការដកឈ្មោះចេញ ដោយតម្រូវបង់ប្រាក់ផាកពិន័យជំនួសវិញ។
ចំណែក លោក គង់ រ៉ៃយ៉ា បានអះអាងថា សកម្មភាពចែកថវិកាដល់បេក្ខជន១១ឃុំកាលពីថ្ងៃ២១ ខែឧសភាកន្លងមក មិនមានជាការទិញទឹកចិត្តប្រជាពលរដ្ឋនោះទេ ប៉ុន្តែថវិកាម្នាក់១០០ដុល្លារនេះ គឺដើម្បីយកទៅផ្គត់ផ្គង់រាល់ការចំណាយសម្រាប់ដំណើរការឃោសនាបោះឆ្នោតរបស់បក្សប៉ុណ្ណោះ។
ប្រធានគណបក្សភ្លើងទៀនឃុំស្តៅរូបនេះចាត់ទុកថា ការប្តឹងពីសំណាក់តំណាងគណបក្សប្រជាជនកម្ពុជា អ្នកស្រី ជឹន ដាវី គឺមិនមានយោងទៅតាមទិដ្ឋភាពច្បាប់នោះទេ តែនេះជាប់ពាក់ព័ន្ធនឹងបញ្ហានយោបាយច្រើនជាង។ ខណៈលោក រ៉ៃយ៉ា បំភ្លឺថា ការចែកថវិកានាពេលកន្លងមក គឺចែកដល់បេក្ខជនឈរឈ្មោះទាំង១១ឃុំនៃស្រុកកង់មាស ដោយមិនមែនចែកឱ្យប្រជាពលរដ្ឋជាម្ចាស់ឆ្នោតឡើយ។
ជុំវិញការអះអាងថា ការដាក់ពាក្យបណ្តឹងពីតំណាងគណបក្សប្រជាជនមកគជបខេត្តកំពង់ចាម ស្ថិតក្រោមទិដ្ឋភាពនយោបាយច្រើនជាង លោករ៉ៃយ៉ាបញ្ជាក់ថា ភាគីបក្សកាន់អំណាចមិនចង់ឱ្យគណបក្សភ្លើងទៀនអាចឃោសនារកសម្លេងឆ្នោតបាន។ ហើយទង្វើនេះ លោកចាត់ទុកថា ជាការធ្វើទុកបុកម្នេញ និងបំភិតបំភ័យដល់បេក្ខជនក្នុងស្រុកកង់មាស។
ចំណែក លោកស្រី យឹម សុធានី ប្រធានក្រុមប្រឹក្សាប្រជុំផ្សះផ្សារនៃគណៈកម្មការជាតិរៀបចំការបោះឆ្នោតខេត្តកំពង់ចាមបានឱ្យដឹងថា គខបបានបើកផ្លូវឱ្យលោក គង់ រ៉ៃយ៉ាង ដើម្បីប្តឹងជំទាស់ទៅកាន់គណៈកម្មជាតិរៀបចំការបោះឆ្នោតតាមកំណត់នៃច្បាប់។ ហើយចំណែករឿងចែកអំណោយនេះវិញ លោកស្រី សុធានីថា ប្រសិនបើគណបក្សណាមួយមិនពេញចិត្ត អាចដាក់ពាក្យបណ្តឹងមក នោះគខបខេត្តនឹងធ្វើការដោះស្រាយជូន ដោយមិនលំអៀងទៅភាគីខាងណានោះទេ។
បើតាម លោកស្រី សុធានី គខបខេត្តកំពង់ចាមមិនកត់សម្គាល់ឃើញមានបាតុភាពមិនប្រក្រតី និងអំពើហឹង្សាណាមួយធ្ងន់ធរដែលបានកើតមានឡើងក្នុងខេត្តកំពង់ចាមនោះទេ ដោយលើកលែងតែករណីលោក គង់ រ៉ៃយ៉ាមួយនេះប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ